Psom 105
105
Lesegner Bondie ek so pep
1Nou dir mersi LESEGNER, nou proklam so nom!
Nou bizin fer tou bann nasion kone tou seki li finn fer.
2Sant pou li, zwe lamizik pou li,
rakont tou so bann explwa.
3Rann glwar so sin nom!
Bann ki rod LESEGNER pou dan lazwa.
4Tourn ver LESEGNER e rod so pwisans;
zame pa aret rod so prezans.
5Rapel bann mervey ki li finn fer,
so bann mirak ek bann zizman li finn prononse,
6zot tou bann desandan Abraam,
zot tou bann desandan Zakob, ki li finn swazire.
7LESEGNER, limem nou Bondie;
li gouvern lemond antie.
8Zame li pa finn bliye so lalians ki pou dire pou touzour;
so promes tini zenerasion apre zenerasion.
9Li pou onor aranzman ki li ti fer ar Abraam;
promes li ti fer ar Izaak.
10Li ti konfirm sa ar Zakob kouma enn dekre,
ar Izrael kouma enn lalians ki pou tini ziska lafin.
11“Mo pou donn twa pei Kanaan,” li ti dir.
“Sa li pou zot; zot par sa.”
12Sa lepok-la serviter Bondie ti bien tigit
e zot ti bann imigran dan pei Kanaan.
13Zot ale-vini, sorti dan enn rezion al dan lot;
sorti dan enn rwayom al dan lot.
14Me Bondie pa ti les personn fer dominer ar zot;
li ti donn avertisman bann lerwa:
15“Pa fer ditor mo bann serviter ki mo finn swazire;
pa tous mo bann profet.”
16LESEGNER ti avoy lafaminn dan zot pei
e ti detrir zot nouritir.
17Li ti avoy kikenn divan-divan;
Zozef ti so nom, ti vann li kouma esklav.
18Li ti ena lasenn dan lipie,
serk lasie otour so likou
19ziska ki so prediksion vinn vre,
ziska ki parol LESEGNER prouve li ena rezon.
20Lerwa Lezip ti fer larg li;
lerwa ki ti pe diriz plizier tribi ti rann li so liberte.
21Li ti fer Zozef vinn sef gouvernman
ki ti gouvern pei-la net;
22li ti gagn drwa donn lord bann ofisie lerwa;
li ti ena pouvwar dir bann konseye ki bizin fer.
23Lerla Izrael ti al Lezip
Zakob ti viv dan pei Lezip kouma imigran.
24LESEGNER ti donn so bann serviter boukou zanfan;
ti fer zot vinn pli for ki zot lennmi.
25Me li ti fer bann Ezipsien ayir so prop pep
e zot fer konplo kont so bann serviter.
26Lerla li ti avoy so serviter Moiz
ek Aaron ki limem ti swazir.
27Zot ti fer bann sign extraordiner,
bann veritab mirak dan Lezip.
28Li avoy marenwar lor pei Lezip
me bann Ezipsien refiz ekout so parol.
29Li fer larivier dilo vinn disan
e touy tou pwason.
30Ti ena enn invazion krapo;
zot ti rant partou, mem dan sato.
31Bondie koze, enn larme mous ki pike,
ek moustik anvayir pei-la.
32Li avoy lagrel olie avoy lapli
ek zekler ti eklate partou;
33li detrir plantasion, potaze ek verze;
li met bann pie partou plat.
34Kouma li koze, ala enn gran niaz sotrel,
sotrel par milion, desann lor pei;
35zot balie tou bann plant prop,
pa les nanye deryer zot dan pei.
36Li touy tou bann premie garson dan sak fami Ezipsien,
premie prodwi zot lafors.
37Lerla li gid bann Izraelit lor sime liberte, ranpli ar lor ek larzan,
parski zot ti for ek an bonn sante personn pa ti res deryer.
38Bann Ezipsien ti per zot
e bann-la ti kontan ler bann Izraelit ti ale.
39Bondie ti plas enn niaz lor so pep pou protez zot;
enn dife pou donn zot lalimier aswar.
40Ler zot rod manze li ti avoy zot bann kay,
manze pou plin zot vant ti sorti direk dan lesiel.
41Li ti ouver enn ros e dilo kler ti koumans koule
e bien vit enn larivier ti pe travers dezer.
42Li ti rapel so promes sakre
ki li ti fer ar Abraam, so serviter.
43Alor li ti fer zot sorti Lezip dan lazwa,
pep ki li ti swazir ti sante for-for dan lalegres.
44Li ti partaz ar zot later lezot tribi;
zot ti pran posesion larises bann lezot pep.
45Koumsa li ti sir ki so pep ti pou gard so komannman,
e pou rapel so bann lalwa.
Alelouya, nou sant louanz LESEGNER!
Valgt i Øjeblikket:
Psom 105: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.