Psom 106
106
Bonte Lesegner Bondie pou so pep
1Loue LESEGNER!
Nou dir mersi LESEGNER parski li bon
e so lamour infini li eternel.
2Kisann-la kapav rakont tou bann explwa LESEGNER?
Kisann-la kapav exprim tou so louanz partou?
3Bienere dimounn ki obzerv lazistis,
ki pratik drwatir touletan.
4Pa bliye mwa SEGNER, ler to montre faver to pep;
pa bliye mwa ler to pe sov to pep.
5Mo ti'a kontan trouv prosperite to pep
e partaz lazwa ek boner lepep Bondie,
e partaz fierte lepep ki apartenir a twa.
6Parey kouma nou bann anset
nou osi nou finn fer pese;
nou finn partisip dan lemal ek dan pese.
7Nou bann anset dan Lezip pa ti bien konpran
to bann explwa extraordiner;
zot ti souvan bliye to gran lamour infini
e kot Lamer Rouz zot ti revolte kont twa.
8Me li ti sov zot pou loner so nom,
pou fer zot rapel so gran pouvwar.
9Li ti donn lord Lamer Rouz e toutswit dilo ti sek;
li ti gid so pep ki travers lamer lor later ferm;
10Li ti protez so pep kont bann ki ti ayir zot;
li ti sap zot lavi ler lennmi ti atake.
11Ler lamer retourne lennmi ti mor nwaye;
pena enn ki ti sape.
12Lerla lepep rapel promes Bondie
e zot sant so louanz.
13Me zot memwar kourt; zot bliye vit tou seki li ti fer;
zot azir san atann so konsey.
14Dan dezer zot ti an mank e zot ti teste Bondie,
zot ti provok li dan sa later arid la;
15e li ti donn zot seki zot ti pe rode
me anplis li ti donn zot enn maladi ki fer deperi.
16Dan dezer kot ti kanpe, zot koumans zalou Moiz
ek Aaron, serviter lwayal LESEGNER.
17Lerla later ouver e aval Datan
e li anter Abiram ek so bann konplis;
18dife desann depi lesiel
e bril bann dimounn ki pratik lemal.
19Lor montagn Oreb zot fer enn vodor
e koumans ador enn idol;
20zot ranplas laglwar ki Bondie ti donn zot,
par zimaz enn ti toro, enn manzer lerb.
21Zot nepli rapel Bondie, zot Sover,
ki ti fer bann gran mirak dan Lezip,
22bann aksion etonan lor later Ezipsien,
bann mervey terib pre ar Lamer Rouz.
23Kan Bondie menas pou detrir so pep
so prop serviter ki li ti swazire, Moiz,
ti plas li devan Bondie
pou detourn so koler e pa detrir zot.
24Lerla zot rezet enn pei merveye
parski zot nepli fer konfians promes Bondie.
25Zot ti mirmire anba latant,
e zot ti refiz ekout LESEGNER.
26LESEGNER lev so lame pou fer enn serman
ki li pou les zot mor dan dezer;
27li pou fann zot desandan parmi bann infidel
e les zot mor dan bann pei etranze.
28Dan Peor, lepep Bondie angaz zot dan adorasion Baal;
zot manz lofrand ki ti ofer bondie mor.
29Sa manier-la ti anflam lakoler LESEGNER
e li avoy enn maladi mortel lor zot.
30Me Fineas ti leve pou intervenir,
e fleo-la ti arete.
31Sa aksion-la ti rekonet dan so faver kouma drwatir,
ti res dan memwar bann zenerasion pou touzour.
32Kot lasours Meriba dimounn ti fer LESEGNER ankoler
e akoz zot, Moiz ti gagn bien traka,
33parski zot ti fer li exaspere
e li ti pe koze san panse.
34Zot pa ti eliminn bann infidel
kouma LESEGNER ti dimann zot
35me zot ti marye ar bann nasion ki pa konn Bondie
e ti adopte zot koutim ek zot pratik.
36Lepep Bondie ti ador idol bann-la
e samem ki ti amenn zot ver destriksion.
37Zot ofer bann idol Kanaan zot prop tifi ek garson
kouma sakrifis;
38zot ti touy zanfan inosan
e disan inosan ti polie later.
39Zot konportman ti fer zot vinn inpir,
zot pratik ti infidel parey kouma prostitision.
40LESEGNER ti bien ankoler ar so pep
e li ti degoute ar zot, so prop pep.
41Li ti les zot dan lame infidel
e zot ti pe dirize par zot lennmi.
42Zot lennmi ti kontrol zot;
zot ti kouma esklav.
43Boukou fwa LESEGNER ti sov so pep
me sak fwa zot ti revolte kont li
e zot koul dan fon pese.
44Malgre sa, li tann zot ler zot kriy osekour
e li pran kont zot detres.
45Akoz li kontan zot li rapel so lalians;
akoz so lamour infini li ti montre konpasion.
46Li ti adousi leker bann ki ti pe tini zot an kaptivite,
e bann-la ti ena pitie pou zot.
47Sov nou O SEGNER, nou Bondie,
tir nou parmi bann nasion e rasanble nou,
pou ki nou kapav remersie twa
e loue to gran nom sakre.
48Nou loue LESEGNER, Bondie Izrael;
Nou loue li aster ek touletan!
Nou tou, anou dir “Amen!”
Alelouya, nou loue LESEGNER!
Valgt i Øjeblikket:
Psom 106: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.