Psom 18
18
Sante laviktwar
Pou sef koral. Enn Psom David, serviter LESEGNER. Li ti sant bann parol sa sante-la letan LESEGNER ti delivre li de so bann lennmi e depi lame Sail.
1Mo kontan twa, SEGNER! Tomem mo lafors.
2LESEGNER, limem mo sitadel, mo veritab fortres, mo liberater,
mo Bondie, sitadel kot mo santi mwa an sekirite,
boukliye ki protez mwa, ki defann mwa, ki sov mwa.
3Mo apel LESEGNER osekour, ki merit tou louanz!
E li delivre mwa kont mo lennmi.
4Danze lamor ti pe fer mo letour;
gro vag destriksion ti pe roul ver mwa.
5Danze lamor ti antour mwa,
bann tom ti pare pou aval mwa.
6Dan mo detres mo kriye LESEGNER,
mo ti dimann mo Bondie vinn ed mwa.
Depi dan so Tanp li ti tann mo soufrans;
mo lavwa finn ariv ziska li.
7Lerla later ti tranble ek bouze;
fondasion montagn sakouye ek vibre
parski Bondie ti bien ankoler.
8Lafime ti pe sorti par so nene;
depi so labous, laflam ki griy partou,
ti akonpagne par labrez anflame.
9Li ti deroul lesiel kouma enn tapi,
e li desann lor later
lor enn gro niaz nwar.
10Li ti mont lor enn seribin, li ti anvole,
li ti plane lor lezel divan.
11Enn lanvlop marenwar ti kasiet li
e bann niaz nwar epe gonfle ar dilo ti kouver li.
12Enn lalimier bien for ti divan li,
lagrel ek labrez anflame ki ti pers bann niaz.
13Lavwa LESEGNER ti eklate kouma loraz
e lavwa Bondie Pli Lao ti rezone partou.
14Li lans so bann fles e so bann lennmi sove,
ar enn filwar zekler li ti fer zot galoup an-dezord, disparet.
15SEGNER, to koler kouma siklonn,
ler to exprim to menas e to laraz
li fer fon lamer paret,
li met fondasion later touni.
16LESEGNER ti desann net depi lao
e ti tir mwa depi kot mo ti pe nwaye.
17Li ti liber mwa, kas mo lasenn,
parski mo lennmi ti tro for, mo adverser tro pwisan.
18Zot ti profit mo maler pou atak mwa
me LESEGNER ti vinn defann mwa.
19Li ti tir mwa dan danze, ti liber mwa,
e ti sov mwa parski li ti kontan mwa.
20LESEGNER rekonpans mwa dapre mo drwatir;
li beni mwa parski mo lame prop.
21Mo finn touzour swiv sime LESEGNER
e zame mo pa finn tourn mo ledo ar mo Bondie.
22So bann lalwa touletan divan mwa,
e mo pa finn dezobeir so bann instriksion.
23Li kone ki pena okenn blam kont mwa,
e ki mo pran boukou prekosion pou pa fer pese.
24Li rekonpans mwa dapre mo drwatir
me osi parski li trouve ki mo lame prop.
25SEGNER to fidel ar seki montre limem fidel;
to montre to san repros ar seki san repros;
26Ar seki sinser, to montre ki to sinser,
me ar move dimounn to montre to pli malin.
27To sov ti-dimounn ki konn imiliasion,
to abes bann ki ranpli ar lorgey.
28SEGNER mo Bondie, to lalimier mo lavi,
to ekler mwa dan teneb.
29Gras-a twa mo kapav fer fas enn latroup gerye;
ar to lafors mo kapav fransi enn miray.
30Sa Bondie la, li plis ki parfe;
LESEGNER so parol ena valer
e kouma enn boukliye
li protez seki rod so proteksion.
31LESEGNER tousel ki Bondie!
Bondie tousel kapav defann nou.
32Limem ki donn mwa lafors
e montre mwa sime ki sir.
33Kouma serf dan kaskad ek lor montagn
li montre mwa galoupe san tonbe.
34Li antrenn mwa pou konba,
mo lebra kapav redi enn ark an-bronz.
35To finn donn mwa to boukliye ki sov mwa;
to lame drwat finn soutenir mwa;
to bonte finn rann mwa for.
36To finn donn mwa plis lespas pou mo kapav avanse,
sa finn anpes mwa tonbe.
37Mo finn pourswiv mo lennmi ziska mo finn zwenn zot;
mo finn lager ar zot ziska mo finn fini zot;
38mo finn koup-koup zot, fors zot larg lekor;
e kot mo lipie, zot tonbe dan ladefet.
39To nouri mo kouraz pou konba,
pou fer mo lennmi pliye devan mwa.
40To fer mo lennmi sove ale;
mo finn detrir mo bann adverser.
41Zot dimann sekour me personn pa tann zot;
zot rod koudme LESEGNER me li pa reponn zot;
42mo kraz zot ziska zot vinn lapousier ki divan sarye ale;
mo kraz zot kouma labou lor sime.
43To finn protez mwa kont dimounn rebel,
e to finn swazir mwa kouma lerwa diferan nasion;
dimounn ki mo pa ti kone, zordi form parti lepep ki mo pe dirize.
44Pep etranze akeyir mwa kouma zot lerwa;
kouma zot tann mo koze, zot aksepte obeir mwa;
45zot kouraz fonn;
zot tranble letan zot kit zot fortres.
46Mo SEGNER li vivan! Mo loue mo Bondie solid!
Mo loue Bondie ki finn sov mwa!
47Limem ki donn mwa laviktwar kont mo lennmi;
Limem ki fors bann lezot nasion aksepte mo regn;
48tomem ki protez mwa kont lennmi.
To finn ed mwa ena viktwar lor bann adverser,
e to finn delivre mwa kont dimounn violan.
49Pou tousala, SEGNER, mo pou dir to grander parmi bann nasion ki pa konn twa;
e for-for mo pou sant to louanz.
50Bondie donn laviktwar lerwa ki li finn swazir;
li montre so gran lamour infini pou lerwa ki li finn konsakre,
pou David ek so desandan pou touletan.
Valgt i Øjeblikket:
Psom 18: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.