Psom 51
51
Bondie, pardonn mwa
Pou sef koral. Psom David apre ki profet Natan ti al koz ar li lor so relasion avek Betseba.
1Ena pitie pou mwa, Bondie,
dan to gran lamour infini.
Dan to gran mizerikord
efas tou mo pese.
2Lav mwa, retir tou mo bann fot,
pirifie mwa, retir mo bann pese.
3Mo rekonet mo bann tor;
mo bann pese touzour divan mo lizie.
4Kont twa, kont to tousel ki mo finn fer pese,
e mo finn al fer seki to konsider lemal.
To ena rezon trouv mwa koupab
santans ki to prononse, li zis.
5Mo finn ne dan pese;
depi dan vant mama mo dan pese.
6To kontan laverite dan profon nou leker;
ansegn mwa to sazes dan profon mo panse.
7Efas mo pese e mo pou vinn prop;
netway mwa e mo pou vinn pli blan ki lanez.
8Fer mwa regagn lazwa ek boner;
e ki lezo ki finn kas-kase retrouv zot lazwa.
9Aret get mo bann pese
efas tou bann fot dan mwa.
10Bondie, kree an mwa enn leker pir ek prop
renouvel an mwa enn lespri nouvo ek lwayal.
11Pa avoy mwa lwin ar twa;
pa ras to lespri sin ki dan mwa.
12Re-donn mwa lazwa ki enn peser gagne
kan to sov li;
donn mwa enn lespri obeisans, pou soutenir mwa.
13Alor mo pou ansegn bann peser to bon sime
e zot pou retourn ver twa.
14Kot ena disan verse, sov mwa, Bondie, Bondie mo liberater,
e mo pou dir for-for ki tomem vre drwatir.
15Segner, rann mwa laparol
pou ki mo kapav sant to louanz.
16Mo kone ki to pa pe rod sakrifis;
pa mem enn sakrifis zanimo ki nou brile net.
17Sakrifis ki Bondie oule, li enn leker brize.
Bondie akeyir enn peser leker brize ki finn repanti.
18Sion bizin to bonte;
ed li e re-konstrir miray Zerizalem.
19Apre sa to pou aksepte vre sakrifis,
nou ofrand e nou bann sakrifis konple,
lerla pou kapav sakrifie bann toro lor lotel dan to Tanp.
Valgt i Øjeblikket:
Psom 51: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.