Psom 55
55
Viktim trayizon
Pou sef koral. Avek bann instriman lakord. Enn poem David.
1Bondie, ekout mo lapriyer!
Pa tourn ledo ar mo siplikasion!
2Tann mo petision e donn mwa enn repons;
mo bann traka pe fini mwa.
3Mo lennmi pe kriye for kont mwa,
bann ki fer lemal pe insilte mwa.
Zot vers tourman lor mwa;
zot atak mwa ar zot lakoler.
4Mo leker finn sere andan,
lafreyer lamor finn tom lor mwa.
5Lafreyer ek tranbleman anvayir mwa,
gro frison pe trap mwa.
6Alor mo dir, “Si mo ti ena lezel kouma zwazo
mo ti pou anvole pou rod lape dan enn landrwa trankil;
7mo ti pou bat mo lezel
pou al kasiet lwin dan dezer.
8Lor vites mo ti pou al rod refiz
kot rafal siklonn pa ti pou tous mwa.”
9Segner met konfizion dan langaz mo lennmi, brouy zot;
parski mo trouv violans ek konfli dan lavil.
10Lanwit kouma lizour zot fer so letour lor so miray;
partou dan pei ena violans ek dezord;
11krim ek masak rant partou;
dominer ek koripsion pa kit laplas piblik.
12Si enn lennmi ti pe insilte mwa,
mo ti pou siporte;
si enn rival ti lev kont mwa,
mo ti kapav evit li;
13me twa, ki mo egal, ki azir koumsa,
mo konpagnon, mo prop kamarad,
14nou ki ti partaz lamitie ansam,
nou ti al Tanp ansam pou priye Bondie.
15Ki lamor tom lor mo bann lennmi par sirpriz;
ki zot desann vivan dan trou lamor,
akoz zot lakaz ek zot leker plin ar pese ek mesanste.
16Mo kriye Bondie osekour,
e LESEGNER vinn sov mwa.
17Gramatin, midi, aswar
mo rakont mo douler ek mo soufrans.
Li pa pou fer sourd ar mo lapriyer.
18Li liber mwa, mo sin e sof
dan mo lalit kont mo lennmi,
mem si zot enn lafoul kont mwa.
19Bondie, ki lerwa dan leternite,
pou tann mwa e li pou imilie mo lennmi
parski zot refiz sanze
e zot pena respe pou Bondie.
20Seki yer ti mo kamarad intim finn atak so kamarad,
li pa finn konn gard so promes.
21So parol ti dou kouma dimiel
me ti ena fiel dan so leker pou lager.
So parol ki ti paret kouma lapomad
ti an-verite enn kouto ki bien fite.
22Depoz to fardo lor LESEGNER
e li pou rekonfort twa
parski zame li abandonn dimounn ki viv drwat.
23Twa Bondie, to pou pini
asasin ek manter e zot pou rant dan trou lamor
kan zot ankor zenn.
Mwa, mo finn met mo konfians an twa.
Valgt i Øjeblikket:
Psom 55: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.