Psom 56
56
Segner Bondie, mo fer twa konfians
Pou sef koral. Lor ler “Enn kolonb lor pie lwin laba. “Enn poem David letan bann Filistin ti kaptir Gat.
1Pran pitie, O mo Bondie, dimounn pe pourswiv mwa;
toulezour mo lennmi pe atake, pe kraz mwa;
2bann ki kont mwa persekit mwa touletan;
zot enn kantite sa bann arogan ki pe atake la.
3Kan mo gagn per,
mo met mo konfians dan twa.
4Mo sant louanz Bondie parski li gard so parol;
mo met mo konfians dan Bondie; mo pena okenn freyer.
Ki enn imin ordiner kapav fer kont mwa?
5Gramatin-tanto zot parol bles mwa;
zot nek panse kouma pou fer mwa ditor.
6Zot vinn ansam, dan kasiet zot louk mwa,
zot vey mo bann mouvman,
e zot atann pou touy mwa.
7Bondie, pa les zot sape pou zot krim,
ar to lakoler zet zot anba.
8Twa to kone komie mo finn soufer;
To finn gard enn kont mo sagrin ek mo larm.
Dan to gran liv to pa finn gard enn kont?
9Zour mo dimann to led
mo lennmi oblize kile.
Mo kone ki LESEGNER
li ar mwa, li lor mo kote.
10Dan Bondie - mo loue so parol -
dan LESEGNER - mo loue so parol -
11dan Bondie mo met konfians; mo pena lafreyer.
Ki enn imin ordiner kapav fer kont mwa?
12Bondie, mo pou ofer twa seki mo ti promet;
mo pou ofer mo sakrifis remersiman
13parski to finn anpes lamor kokin mwa ale
e to finn anpes mwa tonbe,
pou ki mo kontign mars divan Bondie
dan so lalimier ki donn lavi.
Valgt i Øjeblikket:
Psom 56: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.