Psom 60
60
Enn lapriyer delivrans
Pou sef koral. Dapre “Lis Temwaniaz”. Enn poem David. Pou instriksion. David ti al konbat bann Arameen Mezopotami e bann ki sorti Soba. Letan Zoab, enn zeneral David, retourne li ti eliminn 12,000 Edomit dan Vale Disel.
1Bondie, to finn abandonn nou,
e nou finn disloke.
To ankoler ar nou;
aster-la, relev nou latet.
2To finn fer later tranble
e partou vant later finn ouver;
nou sipliy twa konble bann fant ek fose
parski tou pe grene.
3To pe fer to pep soufer gran douler;
nou pe balote kouma soular ar divin.
4To finn donn bann fidel enn banier kouma enn signal
pou ki zot sove divan bann fles ki atake.
5Servi to pouvwar pou sov nou;
exos nou lapriyer
pou ki pep ki to kontan gagn delivrans.
6Depi so Tanp sakre Bondie ti dir,
“Ar mo pouvwar mo pou diviz Sikem
e partaz vale Soukot.
7Galaad li pou mwa, Manase osi;
Efraim samem mo elmet;
Zide li sinbol mo pouvwar rwayal.
8Mo pou servi Moab kouma mo kivet;
Mo pou zet mo savat lor Edom
pou fer kone mo dibien sa.
Mo kriye laviktwar lor bann Filistin.”
9Kisann-la pou amenn mwa dan lavil bien proteze?
Kisann-la pou gid mwa lor sime Edom?
10Vremem to finn abandonn nou?
To pa pou mars ar nou ver laviktwar?
11Twa, Bondie, ed nou kont nou lennmi!
Lafors imin pena gran valer.
12Kan Bondie mars ar nou
laviktwar li dan nou lame
parski li pou kraz nou lennmi.
Valgt i Øjeblikket:
Psom 60: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.