Psom 71
71
Lapriyer enn vie dimounn
1SEGNER, mo finn vinn ver twa
pou gagn to proteksion;
pa les mwa zame konn laont.
2Parski tomem ki drwatir ed mwa, sekour mwa.
Ekout mo lapriyer e sov mwa.
3Tomem refiz ek fortres
landrwa kot mo touletan kapav vini;
to finn desid pou sov mwa,
tomem mo proteksion, mo sitadel.
4Bondie, anpes move dimounn fer mwa ditor;
anpes kriote ek lemal fer mwa soufer.
5Segner, tomem mo lespwar;
depi ki mo zenn, mo konfians li an twa.
6Depi mo nesans mo depann lor twa,
twa ki ti tir mwa dan vant mo mama.
Touletan mo pou sant to louanz.
7Boukou dimounn finn vey kouma mo viv
parski to finn touletan protez mwa.
8Toutlazourne mo loue twa
e mo proklam to laglwar.
9Pa rezet mwa aster ki mo finn vinn vie;
pa abandonn mwa aster ki mo nepli for.
10Mo bann lennmi pe koz kont mwa;
bann ki vey mwa pe konplote.
11Zot dir, “Bondie finn abandonn li;
anou lasas li, may li;
personn pa pou donn li koudme.”
12Bondie, pa res lwin ar mwa.
Mo Bondie, vit-vit vinn ed mwa.
13Fer dimounn ki akiz mwa tom dan laont;
bann ki rod bles mwa tom dan dezoner ek imiliasion.
14Mo pou touletan met mo lespwar dan to pouvwar;
mo pou loue twa plizanpli for.
15Mo pou rakont to drwatir,
tout lazourne mo pou koz lor
tou seki to finn fer pou sov nou
mem si mo pa bien konpran tou.
16Mo pou vinn rakont to bann explwa, Segner BONDIE,
e mo pou proklam to lazistis, zis lor twa tousel.
17Depi mo zanfan to finn ansegn mwa
e malgre mo laz mo kontinie rakont tou to bienfe.
18Aster ki mo finn vinn vie, ki mo seve finn vinn blan
pa abandonn mwa Bondie.
Les mwa proklam to lafors ar zenerasion ki pe vini,
e rakont to pwisans ar bann zenerasion fitir.
19To drwatir, Bondie,
mont lao dan lesiel.
To finn fer bann gran mirak;
pena to segon, Bondie.
20Mem si to finn avoy traka ek soufrans lor mwa
mo kone to pou re-donn mwa lavi.
Mo kone to pou relev mwa,
remont mwa depi profonder later.
21To pou ogmant mo loner,
e to pou re-konsol mwa.
22Mo pou sant to louanz ar laarp;
mo pou sant to fidelite, mo Bondie.
Ar mo sitar mo pou sant to louanz,
Bondie ki Sin, ki Izrael adore.
23Mo pou kriye mo lazwa ler mo zwe pou twa;
avek tou seki mo ete, mo pou sant to grander
parski to finn sov mwa.
24Touletan mo pou koz lor to drwatir
parski bann ki ti rod fer mwa ditor
finn kouver ar laont ek dezoner.
Valgt i Øjeblikket:
Psom 71: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.