Psom 72
72
Enn lapriyer pou lerwa
Enn Psom Salomon.
1Bondie, montre lerwa kouma zize dan drwatir;
fer garson rwayal konpran ki to lazistis ete
2pou ki li regne lor lepep dan lazistis
e gouvern bann oprime dan ladrwatir.
3Fer ki bann montagn raport prosperite
e bann kolinn amenn lazistis tou dimounn.
4Montre lerwa kouma pas zizman
pou ki bann pov pa soufer;
edik li pou ki li ed bann feb
e anpes explwater fer dominer.
5Ki lerwa viv lontan, zenerasion apre zenerasion,
tanki soley briye,
tanki lalinn ekler nou aswar.
6Fer lerwa vinn parey kouma lapli ki rafresi later,
parey kouma gro lapli ki fer karo vinn fertil.
7Ed li pou ki drwatir fleri pandan so regn
e ki ena prosperite tanki lalinn eklere.
8Li pou regn lor enn lamer ziska enn lot,
li pou gouvern depi Efrat ziska dernie bout later.
9Bann tribi dan dezer pou rekonet so pouvwar;
so lennmi pou depoz zarm dan zot defet.
10Lerwa dan Lespagn ek alantour
pou montre respe ar bann kado,
lerwa Seba ek Saba
pou rekonet so lotorite par bann prezan.
11Tou bann lerwa pou prostern divan li,
tou bann tribi pou servi li.
12Lerwa donn sekour bann pov ki vinn get li
ek bann malere gagn so led.
13Li pitie bann pov ek bann feb;
li sap lavi bann ki bizin led.
14Li anpes dominer fer bann feb ek pov pas mizer
parski pou lerwa tou lavi imin ena valer.
15Bondie, donn lerwa enn long lavi!
Fer li gagn lor ki sorti Seba;
fer ki dimounn fer lapriyer pou li touletan;
fer ki benediksion Bondie touletan lor li.
16Fer ki so rwayom gagn lakoup rekor;
fer ki karo ek vale donn manze an kantite
kouma lor bann montagn Liban.
Fer ki bann lavil ranpli ar dimounn
kouma karo ranpli ar lerb.
17Fer ki lerwa so nom res dan nou memwar;
fer ki so repitasion dire osi lontan ki lalimier soley.
Tou bann pep pou konn benediksion par li,
e zot pou deklar li bienere.
18Nou tou, anou loue LESEGNER, Bondie Izrael!
Li tousel kapav fer mirak extraordiner.
19Anou sant so laglwar eternelman!
Ki so laglwar ranpli liniver.
Amen! Amen!
20Lafin lapriyer David, garson Zese.
Valgt i Øjeblikket:
Psom 72: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.