Psom 77
77
Konsolasion kan lavi pa fasil
Pou sef koral. Dapre Yedoutoun. Enn Psom Asaf.
1Mo kriye for, “Bondie ed mwa!”
Mo kriye for e Bondie tann mwa.
2Kan lavi pa fasil mo priye e rod sekour Lesegner;
tout lanwit mo lev lame lao pou priye;
me mo pa gagn rekonfor.
3Ler mo pans Bondie, mo soupire;
ler mo fer meditasion, dekourazman sezi mwa.
4Aswar to pa les mo lizie ferme;
traka anpes mwa koze.
5Mo mazinn lepase;
souvenir letan lontan.
6Tout lanwit mo reflesi;
mo medite e ala seki vinn dan mo latet:
7“Eski Lesegner finn rezet nou pou touletan?
Eski zame li pa pou favorab anver nou ankor?
8Eski so lamour infini pou nou finn mor?
Eski li finn ramas so promes pou debon?
9Eski Bondie finn aret montre konpasion?
Eski so lakoler finn ferm so leker?”
10Apre mo dir momem, “Seki fer mwa plis dimal
se kikfwa Bondie Pli Lao
nepli servi so pouvwar dan nou faver.”
11Mo pou rapel bann gran explwa LESEGNER;
mo pou rapel tou bann mirak to ti fer;
12mo pou medit lor tou seki to finn fer;
mo pou reflesi lor tou to bann gran explwa.
13Tou seki to fer Bondie, li sin.
Eski ena lot bondie osi gran ki nou Bondie?
14To tousel Bondie ki fer bann aksion etonan,
ki ti montre tou bann tribi to gran pouvwar
15ki to ti servi pou sov to pep,
desandan Zakob ek Zozef.
16Ler lamer ti trouv twa, Bondie,
ler lamer trouv twa, li ti krake;
profonder losean ti tranble.
17Bann niaz ti devers lapli kouma toran partou;
loraz ti kraz baraz dan lesiel;
zekler kouma fles ti alim partou.
18Loraz ti roule ar enn son asourdisan;
zekler to avoye ti ekler lemond;
later ti gagn sok e li ti tranble.
19To fer to sime atraver lamer,
to fer enn pasaz atraver profonder lamer,
me okenn plas pa ti ena to tras.
20To ti gid to pep kouma enn troupo
atraver Moiz ek Aaron.
Valgt i Øjeblikket:
Psom 77: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.