MARK 12
12
Rihanthu Barik Kihon Arlenghel Athenghlan
(Mot. 21:33-46; Luk. 20:9-19)
1Laparake anang athenghlan pensi analiyok than pono, “Ihut arlengpo rihanthu barik chikomo, labang komwolsi gomora pal hrep detno, alang kisor ahilik tuksi, tong kemo; aro anang rihanthu barikpo kihon abangyok adhi pisi kamprek alongri yok damo. 2La-aphel athe kiwang aporo, kihon abang para anang rihanthu barik athe abhakpo kapahlongyok, anang anali dungyok ihut murkiya yok wangtolo. 3Manta lahel anangyok nepsi pamsi, anangyok ari hunasi angtol hrolo. 4Aro prek ihut murkiya ayok anang analidung wangtolo, lahel anang aphulong pamsi, anangyok ta patharak-jokngo. 5Laparake prek ihutyok wangtolo lahel anangyok marilo, aro prek ako-ong abangyok pamo, aro angkhanyok marilo. 6Aphel yok ke, anang ihutdet asopo detsi dolo, labangke anang nengdok aso; laparake ‘neso poyok aman piye’ pusi, kijut amun asopo yoksi anali dungyok wangtolo. 7Manta lungle adhi ki-en abang chipujosi pulo, ‘Labangpo ke ahemphu kicho aidot aso po, wangot, ili anangyok mari minang, tangsi lungle-phalang kihlonge aidot ke ilisi chiplange.’ 8Lasi lahel anangyok nepsi, marisi, rihanthu barik apar mokolyok waro. 9Labang rihanthu barik ahemphupo pot inghole? Anang wangsi, la adhi ki-en helyok mariphrotsi, aro labang rihanthu barikpo bangyok piye. 10Labang lo-kangthir long nali chiporhe hlonghle yong ma? “Hem kikem abang potsi arlong kise, labangsi atok long aghai arlongpo chiplango. 11Labang ke Hemphu parasi chokngo, aro ili mek ango konbak asombhik?” 12Konam anang anali yok ado kipi athenghlan thano pusi chithan unsi, anali Jisu yok kinep awak lango, manta ratyok chipheresi, anangyok tikang hrolsi dam phlungo.
Khajana Kipi Alam Karju
(Mot. 22:15-22; Luk. 20:20-26)
13Laparake anangyok lamthe ahonjat kilang aphan, anali angkhan Pharisi aro angkhan Herod po akhel arleng anang dungyok wangtolo. 14Lahel wangsi anangyok pulo, “O Paklang po, nang kikrol kangthir, aro kaiyokta kaphere ingjong, bangpo hali than-undo; piyok pu tene nang arleng amahang yok langle, manta khanang Arnam aduwarsi paklang do. Koisor po yok kanong atengke khajana pi-un ma pi un-eh?” 15Analiyok ili pinang ma pinangne? Manta anang anali anengsik than-unsi pulo, “Nali piyok te neyok honjat langdo? Hane kilangyok isi tanga atheng niphan wanot.” 16La-aphel anali isi wano, anang analiyok pulo, “Labang agoya aro amenpo ingho te do? ‘Koisor po’ pusi lahel pulo.” 17La-amun Jisu analiyok pulo, “Pot si Koisor po kihlong nange abhak ke Koisor po yok pinot, aro potsi Arnam kihlong nange abhak ke Arnam yok pinot.” La-ako lahel Jisu yok bismat hlongo.
Kithi Para Kibur Alam Karju
(Mot. 22:23-33; Luk. 20:27-40)
18Aro kithi kiburphak ingjong pusi kipuman Saduki abang Jisu adungyok wangsi anangyok arjulo, 19“Paklang po, ‘ihut arleng akortepo ihut aso chibubesi thi tene, arlengpo himepe yok chi-ensi aro kithi akortepo aphan aso paplang une, pusi Mosi po haliyok wilo.’ 20Lahel, bangthorok-isi korte kido; angopo piso ensi, aso chibubesi thilo. 21Adunpo ta anang chi-eno, aro aso chibubesi thilo aro bangkithom pota, ladisi chiplango. 22Aro bangthorok ta aso chibubesi thilo. 23Kithi para kibur arnike anali asitem bangpe ingho apiso chiplange? Piyok putene bang thorok ta anangyok chi-eno.” 24Jisu analiyok pulo, “Lo-kangthir aro Arnam ajakong kithekthe anatsi nali kangho kachiron kalek ma? 25Piyok put tene konam kithi asitem para burphak man, lalong anali jorme-chihap heye jorme-pachihap ta weh, manta ethakpe long kido tharlon badi doye. 26Manta kithi paburphak man, labang alam ne Abraham po Arnam, Aijak po Arnam, Jakup po Arnam pusi Mosi poyok Arnam pot badi kithan, bangpo nali Mosi po alo long, kijirtum arongpe atomo long, chiporhe hlonghle yong ma? 27Anang ke kithi hel Arnam kalek, kihreng hel Arnam, nali kangho chirondo!”
Kanong Akithechot Alam
(Mot. 22:34-40; Luk. 10:25-28)
28Kanong paklang ihut po adungyok wangsi, anali sitem ladi kachirwal alam arjusi, Jisu Saduki helyok me-atsi pu phleno pusi chithan unsi, anangyok arjulo, “Dak bangpo kanong ahuwit yok ango chot?” 29Jisu pu phakngo, “Ango ke lalo, ei Israyel abang onenot, Hemphu si ili Arnam, Hemphu ke ihutdet; 30aro nang ahuwit angthin, nang ajiu, nangneng aro nang ajakong pen Hemphu nang Arnam yok nengdok ngot.’ 31The-ni ke lalo, ‘Nang adung arel abangyok nang bithang yok badi nengdok ngot.’ Labang hini yok prek kanong ingjong.” 32La-amun kanong paklangpo anangyok pulo, “Paklang po, melo; nang aserengsi pudo, te anang ihutdet, anang aparke kamprek ihut ta ingjong; 33aro ahuwit ingthin, ahuwit abudhi, aro ahuwit ajakong pen anangyok nengdokngot, aro ibithangyok badi adung-arel abangyok nengdokngot, lalo ahuwit kiphi-kangton aro buli karkliyok ta songkhan chot.” 34Lalong Jisu anangyok me-at chironsi angkipu dun theksi, Jisu anang yok pulo, “Nang Arnam-alongri parake akaholo dode yong.” La-amun para anangyok lam karju yok kaita aha wangwe yongo.
Khristo Alam Karju
(Mot. 22:41-46; Luk. 20:41-44)
35Jisu Arnam ahem long paklangsi kido amun, anang pulo, Khristo ke Dabhit po agijing pusi bangpo kanong paklang hel pot badi pudo? 36Dabhit po Jiuli-Kangthir pen abithang kithan dak, “Hemphu si ne Hemphu yok pulo, ne nang hutur helyok nang kengpak arlo bibe lengke, holek ne ancho-ari aga iningot. 37Dabhit po abithang anangyok ‘Hemphu;’ kipu, tene pot badi anangso chiplange?” Aro rat ke aneng arongsi anang lamhel arjulo.
Kanong Paklang Helyok Jisu Kapaserek
(Mot. 23:1-7; Luk. 20:45-47)
38Kapaklang asitemsi, anang pulo, “Inghosi pe akiding achol chi-iksi karting-wor akime hlongman, aro hathi-chari long aman pisi kardom en-worman, 39aro Arnam ahemlong aghai anghol iningman, aro cho-jun aman kido aghai athem doman, ladi kanong paklang helyok chilangwen! 40Anali himepe ahem panghoman aro pingkit pading hrimsi amahang chipadoman, anali kanghochot adai do ye.”
Himepe Banta Kipi
(Luk. 21:1-4)
41La-aphel Jisu Arnam ahem puru kithal ahong adung iningsi, arleng hel puru long nohok kithal langdun dingsi kido. Amokha hem-kime arleng hel nohok ako-ong thalo. 42La-apor ihut kicho-kangwe hime arloso pe wangsi, tanga atheng aso hini pilo. 43Anang adun helyok inan taram pungo aro analiyok pulo, “Khanangsi ne nali thando, puru long kithal ahuwit yok kicho kangwe himepe ongchot pilo. 44Piyok pu tene anali ahuwit abithang kido-ong anohok para pilo; manta bangpe kicho kangwe yong ta anang potsi kido, lake anang ahuwit kabunsi hel pilo.”
Valgt i Øjeblikket:
MARK 12: AMRI-BSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.