MARK 13
13
Arnam Ahem Kipreldet Alam Jisu Kangje
(Mot. 24:1-8; Luk. 21:5-11)
1Arnam ahem para Jisu olene kiwang amun adun ihut pulo, “O Paklang po, langnot te, pot badi arlong aro pot badi arlong kapachirhap ahem!” 2Jisu pu phakngo, “Nali labang hem akithe kaparjak thekdo ma? Isi arlong ri-reye, holek isi arlong athak isi pachirhap ke bibesi wardetne.”
Aduk Pen Honjat Kipi Alam
(Mot. 24:3-14; Luk. 21:7-19)
3Konam Jisu Olip anglong kartulpelong Arnam ahem pamahangsi kangning amun, Pitor po, Jams po, Johon po aro Andriu po jolsi Jisu yok arjulo, 4“Lamehel konam chiplange? aro labang ahuwit chokpleng ponyok kahonjok asin pot te?” 5Aro Jisu analiyok kipu chengpono, “Kaita nali kachobe un-eh yok, trepne donot. 6Amokha hane menpen wangsi, ne si labang po pusi amokha arleng yok chobele. 7Manta nali dhawa aro dhawa kidoye kapangjar alam karju hlong amun angthin aduk doyek, labangke chiplang pene manta ki-or aporke wangwe lang. 8Isi ason para isi ason chilang setsetne aro along-alongke chiklik wange. Lamehel ke aso kiplang ango abi kiwang badi.
Honjat Alam Kangje
(Mot. 24:9-14; Luk. 21:12-19)
9“Nali abithangyok, chilangwen; piyokte pu tene anali tarang ahemyok nangnep pone; aro naliyok kachirdom ahemlong nali pame; aro nemen anat naliyok gobornor ango aro recho ango, hakhi than hlonge. 10Aro la ango ason helyok kime-alamthe paharpen nange. 11Konam lahel naliyok bisar ahem nangnep pone, aro la-amun pot punange, angoke bangpo chiron hap mek; manta labang apor naliyok potsi pathan hlonge bangpo thanot, piyok pu tene labang kithan po nali kalek, manta Jiuli-Kangthir parasi thane. 12Akorte hel abithang amuso kamariyok champiye, aro ihut apa po asohelyok, asohel ape-apoyok lang setsetne aro analiyok mari ye; 13aro ne men anatsi naliyok sime. Manta inghosi kijutyok chihisi doye anangsi joknge.
Phere-Meme Apor Kiwang Alam
(Mot. 24:15-28; Luk. 21:20-24)
14“Manta konam nang kido nangne athem long arjap hlonge, aro sim-meme kapangho abihini thek hlonge.” (kachiporhe abang abhu hlongot) Laparake Judiya kido abangke inglong ayok kat hlonge; 15ihut sarnuk athak kido pasun nek, lale hem arlo lutdam ke bihini en damek; 16ihut bithar along kido anang phan hem chol pa-en damek. 17Agat kido arloso aro oso mok kipi arloso labang arni konbak kaphere me-me doye! 18Labang hel kichum arni kichokche aphan pingkit. 19Piyok pu tene labang arni potbadi aduk doye, Arnam kahurji long kicheng arni para minihok ladi aduk jatsi hlonghle yong aro hlonghle ye. 20Aro Hemphu si lamehel aporhel pakomke nangtene, kaita ralreye; manta karwal tang aphan ke, inghoyok anang arwal, anang phanke labang arnihel pakome. 21“Aro la-amun inghone bak naliyok than, ‘Langnot, Khristo holeksi do!’ lale ‘Langnot, anang lalong do,’— yongta bangpo krolek. 22Asisik khristo aro asisik turki wang chiklange, aro ajatjat asin, aro apharan, arleng hel yok pharlep pone, un tene karwal tang abangyok ta chobel pone. 23Manta chilang wenne donot; ne naliyok ahuwit pango dapsi nali thano.
Arleng Aso Kiwang Alam
(Mot. 24:29-31; Luk. 21:25-28)
24“Manta lamehel adin, labang aduk aphel, arnipe ingting detne, chiklo aklar pipeye, 25aro suneng para klolangso hel jange, aro suneng athak kido apharan hel hujuk detne. 26Lapara ke Arleng Aso yok, kihal apharan aro jakong akar pensi inghun along kiwang thek hlonge. 27Laparake anang tharlon helyok angtolsi, pirthimipe ahol para sunengpe aholyok, atok phili para Arnam karwal arleng helyok wansi pangrume.
Dumuru Arongpe Para Kachirli Alam
(Mot. 24:32-35; Luk. 21:29-33)
28“Dumuru arongpe para isi athenghlan alam chirli: konam kangduk arwo wang olesi, angjok wangman, la-amun phang-oh adin adung wanghlengo pusi nali thekman. 29Labadisi konam lamehel kachiplang theknge, la-amun anang wang hlengsi, hem-honthu wanghlengo pusi nali bithangta chitheknge. 30Khanangsi ne nali thando, lamehel apot chiplangple lengke, labang owepo arleng prelpre ye. 31Suneng aro pirthimipe chilutne, manta ne lamthe chilutle ye.
Labang Arni Pen Apor Ihut-ta Than Un-eh
(Mot. 24:36-44; Luk. 21:34-36)
32“Manta Apa aparke ethakpe long kido tharlonhel, lale Aso, kaita labang adin lale labang aporpo than un-eh. 33Chilang wenot, inghongne donot; piyok pu tene labang apor konamsi wanghlenge nali than-un eh. 34Ihut arleng kamprek alongri kidam arlengpo badi, anang aturu hel yok aro abangten analiyok salpeksi, ahem tikangsi kidam apor duwar kihon poyok inghong dingsi kidoyok kithan, labadi chiplangdo. 35Lasi, trepne donot; piyok pu tene hem ahemphu po anithu tong wangmene, lale jarlo tong wangmene, lale wo-kiku apor tong wang mene, lale katha-angbo amun wangmene, nali chithan un-eh, 36lale anang photsi kiwang amun anang nalimek kijang thek hlonge mene. 37Aro ne potsi pudo, ne ahuwit aphan pudo: trepne do.”
Valgt i Øjeblikket:
MARK 13: AMRI-BSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.