San Lucas 4
4
Mu̶jku'u joot'íxy winma'añ'íxy je̱'e̱ Jesús
(Mt 4.1-11; Mc 1.12-13)
1Jesús myu̶dajtypy najty je̱'e̱ Espíritu Santo ko jim choñ jim Jordán mu̶jnu̶u̶, chi je̱'e̱ Espíritu Santo yajnú̶kxu̶ adu'ugtuum. 2Jim adu'ugtuum je̱'e̱ Jesús y'ijty juxytyikxy xu̶u̶, chi je̱'e̱ mu̶jku'u jyoot'ijx wyinma'añ'ijxu̶, jaygyay jim y'ijty. Y ko juxytyikxy xu̶u̶ ñajxnu̶, chi oy yuu'o'kkodyii. 3Mu̶'it je̱'e̱ mu̶jku'u ñu̶maayu̶:
—Pu̶nu̶ jaanch je̱'e̱ Dios miich xy'ung'aty, nu̶ma'a adaa tzaa ko wan wimbity tzajkaagy.
4Chi je̱'e̱ Jesús y'adzooy:
—Du'un kuja'ay y'ity ma je̱'e̱ Dios ñakyu̶ñ: ‘Ka'p je̱'e̱ ja'ay tzajkaagytyu̶'ajty je'eyu̶ jyatytyimyñijugy'ajtypy ajku̶xy.’#4.4 Nije̱' jaaybyu̶du̶jk myu̶naangu̶xy: nan yajmayjyajtku̶xypy nandu'un ku̶xyu̶ je̱'e̱ Dios y'ayuuk tyu̶y'ajt.
5Chi je̱'e̱ mu̶jku'u mu̶dnu̶kxy je̱'e̱ Jesús, ma tu'ug kopt janchkú̶xpu̶ju̶ñ, chi tu'kjaxu̶'u̶gy yajni'ixu̶u̶ydyaay ku̶xyu̶ je̱'e̱ naax kajpt mu̶dyiibu̶ jii naaxwiimbu̶'ajtpu̶ñ. 6Chi je̱'e̱ mu̶jku'u myu̶naañ:
—U̶u̶ch miich nmo'owu̶py ku̶xyu̶ adaa mu̶k'ajtu̶ñ, y adaa naaxwiimbu̶ myu̶j'ajtu̶ñ, je̱' ko u̶u̶ch ngu̶'u̶'aam adaa ku̶xyu̶ y'ity, y nmo'owu̶u̶ybyu̶ch pu̶n u̶u̶ch naty ndimychojkypyu̶ñ nmo'owa'añu̶ch. 7Pu̶nu̶ xywyingojxtu̶naaybyu̶ch y pu̶nu̶ xy'o'owu̶dajtpu̶ch miich, agu̶ miich adaa mje̱' ku̶xyu̶ y'ity.
8Chi je̱'e̱ Jesús y'adzooy:#4.8 Nije̱' wiingpu̶ versión myu̶na'añ: winwa'ktuutku̶ch miich mu̶jku'u.
—Du'un je̱'e̱ Dios y'ayuuk kuja'ay y'ity mu̶dyiibu̶ du'un mu̶naambu̶ñ: ‘Je̱'e̱ Windzú̶n miich mDios mwindzu̶gu̶'u̶wu̶py, y je̱' tu'kpajk mu̶dúnu̶py.’
9Chi je̱'e̱ mu̶jku'u yajnúkxy je̱'e̱ Jesús ma je̱'e̱ Jerusalén kajptu̶ñ, chi mu̶dpejty mu̶jtzajptu̶jkku'uduuy, jim janchku̶xtu̶goy, y nu̶maay:
—Pu̶nu̶ jaanch je̱'e̱ Dios miich xy'ung'aty ku'udu̶jpnáx ya mu̶jtzajptu̶jkku'uduuy. 10Je̱' ko kuja'ay du'un y'ity ma je̱'e̱ Dios ñakyu̶ñ:
‘Kyé̱xu̶py je̱'e̱ Dios y'ángelestu̶jk ajku̶xy
je̱' xykyweentu̶'ádu̶p ajku̶xy y xyñiwa'anu̶p ajku̶xy.
11Xyche̱nu̶'kku̶xu̶p,
ka'pu̶ maa mgu'uné̱p mgu'ugóxu̶ch ma chaajootyu̶chu̶ñ.’
12Chi je̱'e̱ Jesús y'adzooy:
—Nandu'un je̱'e̱ Dios y'ayuuk myu̶na'añ: ‘Ka'p mjoot'íx mwinma'añ'íxu̶ch je̱'e̱ mWindzú̶n Dios.’
13Ko je̱'e̱ mu̶jku'u y'aa jyoot yajku̶jxy yajka'pxy du'un neby najty tu̶ joot'íxy tu̶ winma'añ'íxy je̱'e̱ Jesús, chi tu'ktiempo winwa'ktuuty.
Jesús tyuung yajtzonda'agy jim Galilea
(Mt 4.12-17; Mc 1.14-15)
14Chi je̱'e̱ Jesús wyimbijttu̶gajch jim Galilea, y myu̶dajtypy najty je̱'e̱ Espíritu Santo, y yajnigápxp yajnimu̶dyaakp najty ma je̱'e̱ naax kajpt ku̶xyu̶ winduuy wingonbu̶ tijaty najty tyuumbyu̶ñ. 15Kajpt kajpt najty yaj'u̶xpú̶ky majaty je̱'e̱ judío ja'ay ñaymyujktaakt ajku̶xyu̶ñ, y ku̶xyu̶ je̱'e̱ ja'ay najty jyanchku'umayii.
Jesús yajpaady jim Nazaret
(Mt 13.53-58; Mc 6.1-6)
16Chi je̱'e̱ Jesús ñu̶kxy jim Nazaret je̱'e̱ kajpt ma najty tu̶ yeegyu̶ñ. Pokxyxyu̶u̶#4.16 pokxyxyu̶u̶: Adaa Sábado du'un tyijpy tyu̶gu̶u̶y ma je̱'e̱ naymyujktaaktu̶ñ, du'un neby je̱'e̱ kostumbre najty mu̶u̶du̶chu̶ñ. Chi tyu̶naayu̶'ky ko najty je̱'e̱ Dios ñaky kapxaanu̶. 17Chi je̱'e̱ naky myooyu̶ mu̶dyiibu̶ je̱'e̱ Dios y'ayuuknajtzkapxu̶u̶ybyu̶ Isaías jyaayu̶ñ. Y chi je̱'e̱ naky ku̶u̶ywa'kxy, paaty jiiby tu'k'ít ma najty du'un kyuja'ayu̶chu̶ñ:
18“Je̱'e̱ Windzú̶n Dios y'Espíritu xymyu̶dajtpu̶ch.
Tu̶ xykyunúkxyu̶ch ko u̶u̶ch je̱'e̱ ayoobu̶du̶jk nyajnu̶ma'awu̶ch ajku̶xy je̱'e̱ oybyu̶ ayuuk tu̶y'ajt#4.18 Nije̱' wiingpu̶ versión myu̶na'añ: Tu̶ xykyéxyu̶ch ko u̶u̶ch nyajjootkugu̶'u̶wu̶ch je̱'e̱ ja'ay mu̶dyiibu̶ jootmaymyu̶u̶du̶ñ ajku̶xy.
Tu̶ xykyéxyu̶ch ko u̶u̶ch nwinmé̱kxu̶ch je̱'e̱ mu̶dyiibu̶ pujxtu̶gooty yajpaatku̶xpu̶ñ,
y nan nyajwiindu̶kxu̶'u̶gu̶chu̶ch je̱'e̱ ja'ay mu̶dyiibu̶ wiindzu̶ñ ajku̶xy.
Y nbu̶da'agu̶chu̶ch awa'adztuum je̱'e̱ mu̶dyiibu̶ yajtzaachtyuumbu̶ñ ajku̶xy.
19Tu̶ xykyéxyu̶ch ko u̶u̶ch ngapxwa'kxu̶ch ko tu̶ je̱'e̱
tiempo cham paady mu̶naa je̱'e̱ Windzú̶n Dios may'ajt oy'ajt
tuna'añu̶ñ ma je̱'e̱ ja'ay ajku̶xyu̶ñ.”
20Chi je̱'e̱ Jesús naky abu̶dijtnu̶, yajku̶'u̶du̶gu̶u̶y je̱'e̱ naymyujktaakt tuungmu̶u̶dpu̶, y mu̶'it ñaxwech. Ku̶xyu̶ je̱'e̱ mayjya'ay mu̶dyiibu̶ najty jiiby ma je̱'e̱ naymyujktaaktu̶ñ wyindu̶kx'adu̶u̶tzku̶xypy najty je̱'e̱ Jesús. 21Chi je̱'e̱ Jesús myu̶naandu̶gu̶u̶y:
—Cham tu̶ yajkuydyúñ adaa mu̶dyiibu̶ kuja'ay ma je̱'e̱ Dios ñakyu̶ñ du'un neby miich cham tu̶ mmu̶doogu̶xyu̶ñ.
22Chi oy nigu̶xyu̶ ku'umaaygyu̶xy neby je̱'e̱ Jesús myu̶naañu̶ñ y yajnú̶kxy yajju̶wu̶u̶y ajku̶xy mu̶u̶d je̱'e̱ janch'oybyu̶ yajxónbu̶ ayuuk mu̶dyiibu̶ kyapxu̶ñ. Chi ñayyajtu̶u̶wu̶ ajku̶xy:
—¿Nej ka'p adaa jye̱'e̱ju̶ch je̱'e̱ José y'ung?
23Chi je̱'e̱ Jesús y'adzoowu̶ ajku̶xy:
—Ka'p jékyu̶ch xyñu̶ma'awu̶chu̶ch miich ajku̶xy neby je̱'e̱ ayuuk tu'ug myu̶na'añu̶ñ: ‘Tzooydyuumbu̶, naychooyu̶'u̶wu̶u̶ ku̶'u̶m.’ Y nan xyñu̶ma'awu̶chu̶ch miich ajku̶xy: ‘Du'un neby u̶u̶ch tu̶ nmu̶doogu̶xyu̶ñ tu̶ mduñ jim Capernaum, nan oktún ya nandu'un ma je̱'e̱ mgu̶'u̶mgajptu̶ñ.’
24Chi jyakmu̶naañ:
—Janch tu̶y'ajtu̶ñ du'un nnu̶maaygyu̶xy, ko ni tu'ug je̱'e̱ Dios y'ayuuknajtzkapxu̶u̶ybyu̶ ka'p oy yajxón yajku'ubu̶jkku̶xy ma je̱'e̱ kyu̶'u̶mgajptu̶ñ. 25Janch tu̶y'ajtu̶ñ du'un, ko janchmay najty ku'o'ogytyo'oxyu̶jk yaa Israel jékyu̶p, ko je̱'e̱ Dios y'ayuuknajtzkapxu̶u̶ybyu̶ Elías chu̶naay, ko je̱'e̱ tzajp y'adujky y ka'p tyuuy tu̶gu̶u̶g jumu̶jt ja'atudujkpo'o, y ko je̱'e̱ mu̶j'yuu myiiñ ma ku̶xyu̶ naax kajptu̶ñ; 26y Dios ka'p je̱'e̱ Elías kejxy ma je̱'e̱ Israel ku'o'ogytyo'oxyu̶jktu̶jk ajku̶xyu̶ñ; jim Sarepta oy kexy mu̶wingón je̱'e̱ Sidón naaxjooty, ma tu'ug ku'o'ogytyo'oxyu̶jku̶ñ. 27Nan janchmay najty ja'ay ju̶bu̶k pu'udzpa'ammu̶u̶dpu̶ yaa Israel jékyu̶p, ko je̱'e̱ Dios y'ayuuknajtzkapxu̶u̶ybyu̶ Eliseo chu̶naay; y ka'p je̱'e̱ ni tu'ug chooky ajku̶xy, je'eyu̶ tu'kpajk chooky je̱'e̱ mu̶dyiibu̶ najty xu̶u̶'ajtpu̶ñ Naamán, mu̶dyiibu̶ najty Siria naaxjooty tzombu̶ñ.
28Mu̶'it je̱'e̱ ja'ay ku̶xyu̶ mu̶dyiibu̶ najty jiiby ajku̶xy ma je̱'e̱ naymyujktaaktu̶ñ, oy mu̶k jyootma'ttaaygyu̶xy ko adayaaba ayuuk du'un mu̶dooy ajku̶xy. 29Chi je̱'e̱ mayjya'ay nibu̶du̶'kku̶xy je̱'e̱ Jesús y yajkajppu̶dzu̶u̶my ajku̶xy. Chi jim yajnú̶kxy ajku̶xy ma je̱'e̱ kopt janchkú̶xpu̶ju̶ñ. Je̱' ko koptku̶xp najty je̱'e̱ Nazaret kajpt yajpaady, y jim najty ku'uju̶bijpnaxaangu̶xy. 30Chi je̱'e̱ Jesús mayjya'ay'agujk ñaxu̶u̶y, chi ñu̶kxnu̶.
Tu'ug je̱'e̱ ja'ay mu̶dyiibu̶ najty ka'a'óybyu̶ mu̶u̶d
(Mc 1.21-28)
31Chi je̱'e̱ Jesús ñu̶kxy Capernaum. Capernaum jim je̱'e̱ yajpaady jim Galilea naaxjooty, y chi yaj'u̶xpu̶jktu̶gu̶u̶y pokxyxyu̶u̶. 32Y je̱'e̱ ja'ay mu̶k je̱'e̱ yajnú̶kxy yajju̶wu̶u̶y ajku̶xy neby najty yaj'u̶xpu̶jku̶gu̶xyu̶ñ, je̱' ko du'un najty je̱'e̱ yaj'u̶xpú̶ky mu̶u̶d je̱'e̱ y'ane̱'e̱mu̶ñ ku̶xyu̶.
33Jiiby ma je̱'e̱ naymyujktaaktu̶ñ jiiby najty ja'ay tu'ug mu̶dyiibu̶ ka'a'óybyu̶ mu̶u̶du̶ñ, chi je̱'e̱ ka'a'óybyu̶ ja'ay janchmu̶k yaj'yaaxkeeky, myu̶naañ:
34—¡U̶xmajtzku̶ch ajku̶xy! ¿Ti u̶u̶ch ko xymyu̶mayu̶u̶ygyu̶xy Jesús je̱'e̱ mu̶dyiibu̶ Nazaret tzombu̶ñ? ¿Nej paady tu̶ mmiñ du'undu̶mu̶ch xyajwindu̶goyaangu̶xyu̶? U̶u̶ch n'u̶xkajpy miich y nejwu̶u̶ybyu̶ch ko miich je̱' je̱'e̱ Wa'adzpu̶ja'ay, mu̶dyiibu̶ je̱'e̱ Dios tu̶ kexyu̶ñ.
35Chi je̱'e̱ Jesús je̱'e̱ ka'a'óybyu̶ u̶x'ojy, nu̶maay:
—¡Amón y pu̶dzu̶m ma adaa ja'ayu̶ñ!
Mu̶'it je̱'e̱ ka'a'óybyu̶ je̱'e̱ ja'ay najtztiju̶u̶y mayjya'ay'agujk, y pyu̶dzu̶u̶my, ka'p nej oktuunu̶. 36Ku̶xyu̶ je̱'e̱ jimbu̶ ja'ay mu̶k je̱'e̱ ñay'adzu̶gu̶u̶y ñay'aju̶wu̶u̶yu̶ ajku̶xy y ñayñu̶maayu̶gu̶xy amíñ u̶xyu̶py:
—¿Ti ayuuk adaa du'un da'a? Adaa ja'ay y'ane'emby je̱'e̱ ka'a'óybyu̶ mu̶u̶d je̱'e̱ y'ane̱'e̱mu̶ñ ku̶xyu̶ y myu̶k'ajtu̶ñ y yajpu̶dzú̶my ma je̱'e̱ ja'ayu̶ñ, ¡y pu̶dzu̶u̶mgu̶xp je̱'e̱ du'un!
37Y yajnigápxp yajnimu̶dyaakp najty je̱'e̱ Jesús ma je̱'e̱ naax kajpt ku̶xyu̶ winduuy wingonbu̶ nebyjyaty najty tyuñu̶ñ.
Jesús yajtzo'ogy je̱'e̱ Simón Pedro myu̶'u̶d'amu̶jja'ay
(Mt 8.14-15; Mc 1.29-31)
38Chi je̱'e̱ Jesús choñ ma je̱'e̱ naymyujktaaktu̶ñ y tyu̶gu̶u̶y ma je̱'e̱ Simón tyu̶jku̶ñ. Je̱'e̱ Simón pu̶jku̶p najty myu̶'u̶d'amu̶jja'ay je̱', mu̶k najty je̱'e̱ jyanchju̶u̶nmu̶u̶du̶ch, chi je̱'e̱ Jesús mu̶waandaaky mu̶nukxtaaky ajku̶xy mu̶u̶d je̱' gyu̶xpu̶. 39Chi je̱'e̱ Jesús wyindaaky ma je̱'e̱ pa'amja'ay kyu'uduuyu̶ñ y u̶x'ojy je̱'e̱ ju̶u̶nba'am, y timytyu̶jtz je̱'e̱ jyu̶u̶n du'un. Chi je̱'e̱ pa'amja'ay mu̶k'eemby pyu̶du̶'ky, yajkaay yaj'uuky je̱'e̱ Jesús ajku̶xy.
Jesús maybya'amja'ay yajtzo'ogy
(Mt 8.16-17; Mc 1.32-34)
40Ko je̱'e̱ xu̶u̶ kya'anu̶, ku̶xyu̶ je̱'e̱ ja'ay mu̶dyiibu̶ pya'amja'ay mu̶dajtku̶xpu̶ñ mu̶u̶d je̱'e̱ yuu pa'am ka'anaagnáx, yajnú̶kxy ajku̶xy ma je̱'e̱ Jesúsu̶ñ, je̱'e̱ Jesús ku̶'u̶ni'ixajy nidu'ug nidu'ug y yajtzooky ajku̶xy. 41Y nan yajpu̶dzu̶u̶m je̱'e̱ ka'a'óybyu̶ may ma je̱'e̱ ja'ay ajku̶xyu̶ñ. Cham jyanchyaaxke̱e̱kku̶xy mu̶kjaty myu̶naangu̶xy:
—¡Miich je̱'e̱ Dios xy'Ung'ajtp!
Peru̶ je̱'e̱ Jesús y'u̶x'ojpy najty je̱'e̱ ka'a'oybyu̶du̶jk ni'igyu̶ y ka'p najty ni'igu̶ yajkápxku̶xy, je̱' ko ñejwu̶u̶ygyu̶xypy je̱'e̱ najty ko je̱' je̱'e̱ Cristo.
Jesús y'ayuuk tyu̶y'ajt kapxwa'kxy jim majaty je̱'e̱ judío ja'ay ñaymyujktaaktu̶ñ ajku̶xy
(Mc 1.35-39)
42Ko xyu̶u̶mu̶u̶y, chi je̱'e̱ Jesús choñ kajptjooty y ñu̶kxy ma tu'ug it lugaar ma ka'p pu̶nu̶ñ. Chi je̱'e̱ ja'ay oy y'u̶xta'ayii, y ko oy jim jya'tku̶xy ma je̱' najtyu̶ñ, chi ja'ayajwa'kxu̶baañ ajku̶xy, ka'pu̶ ñú̶kxu̶ch. 43Chi je̱'e̱ Jesús ñu̶maayu̶ ajku̶xy:
—Jatytimyñu̶kxaambu̶ch nandu'un majaty je̱'e̱ wiingpu̶ kajptu̶ñ, ngapxwa'kxa'añu̶ch je̱'e̱ oybyu̶ ayuuk tu̶y'ajt neby je̱'e̱ Dios y'ane'emyu̶ñ, je̱' ko paady u̶u̶ch je̱'e̱ Dios yaa naaxwiiñ tu̶ xykyexy.
44Du'un najty je̱'e̱ Jesús wyu̶dity kapxwa'kxy je̱'e̱ ayuuk tu̶y'ajt majaty je̱'e̱ judío ja'ay ñaymyujktaaktu̶ñ ajku̶xy jim Judea.#4.44 Ku̶xyu̶ je̱'e̱ Lucas Palestina kajpt du'un tijy ko du'un myu̶na'añ: Judea. (Ijxku̶x 1:5; 6:17; 7:17; 23:5.)
Valgt i Øjeblikket:
San Lucas 4: MIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005