San Mateo 26
26
Ñayxiiku̶gu̶xy ñaygyápxu̶gu̶xy ko je̱'e̱ Jesús madzaangu̶xy
(Mc 14.1-2; Lc 22.1-2; Jn 11.45-53)
1Ko je̱'e̱ Jesús du'un myu̶naandaay, chi je̱'e̱ dyiscípulotu̶jk nu̶maay:
2—Du'un neby miich mnejwu̶u̶ygyu̶xyu̶ñ, juxtu̶kp je̱'e̱ Pascua xu̶u̶ju̶ñ, y u̶u̶ch je̱' je̱'e̱ ja'ay mu̶dyiibu̶ tzon tzajpjooty yajku̶'u̶yé̱gu̶bu̶ch wan u̶u̶ch xyajcruutzpe̱jtku̶xu̶ch.
3Je̱'e̱ mu̶'it tiempo je̱'e̱ teedy windzu̶ndu̶jk, y je̱'e̱ judío ja'ay y'amu̶jja'aydyu̶jk ñayyo'oymyujku̶gu̶xy ma je̱'e̱ Caifás myu̶jtu̶jku̶ñ, je̱'e̱ teedy windzú̶n nigu'ubajk'ajtpu̶, 4chi ñaygyápxu̶gu̶xy ko je̱'e̱ Jesús madzaangu̶xy ju̶gu'uwin'u̶u̶nu̶'u̶ y yaj'o'ogaangu̶xy. 5Peru̶ chi ñayñu̶maayu̶gu̶xy:
—Ka'p du'un y'óyu̶ch ko xu̶u̶jooty nmajtzu̶mu̶ch ajku̶xy, je̱' ko je̱'e̱ ja'ay yaaxtu̶gu̶u̶y jyojktu̶gu̶u̶ygyu̶xu̶ch.
Tu'ug je̱'e̱ to'oxyu̶jk perfume yajjaaxy je̱'e̱ Jesús
(Mc 14.3-9; Jn 12.1-8)
6Jim Betania najty je̱'e̱ Jesús, ma je̱'e̱ Simón tyu̶jku̶ñ, je̱'e̱ mu̶dyiibu̶ najty tyijku̶xypyu̶ñ je̱'e̱ ju̶bu̶kpu'udzpa'ammu̶u̶dpu̶; 7chi je̱'e̱ to'oxyu̶jk tu'ug ñimiinu̶ tzaavidrio kon ujtz mu̶u̶d je̱'e̱ perfume janch tzoowu̶ba. Jimnu̶ najty je̱'e̱ Jesús ma je̱'e̱ meesu̶ju̶ñ, chi je̱'e̱ to'oxyu̶jk perfume yajku'uyogu̶u̶yu̶. 8Ko je̱'e̱ discípulotu̶jk du'un ijxy ajku̶xy, chi jyootma'ty ajku̶xy y myu̶naandu̶gu̶u̶y ajku̶xy:
—¿Ti adaa perfume ko du'un nigoo y'ayoy? 9Tu̶ u̶xyu̶py yu̶'u̶ tzoowu̶ yajtoogy, neby je̱'e̱ ayoobu̶du̶jk mu̶baad yajpubétyu̶ñ ajku̶xy.
10Jesús myu̶doow je̱'e̱ du'un, y chi ñu̶maayu̶ ajku̶xy:
—¿Ti adaa to'oxyu̶jk ko myaj'ojku̶xy? Du'un neby u̶u̶ch adaa tu̶ xytyuñu̶ñ oy je̱'e̱ du'un. 11Je̱'e̱ ayoobu̶du̶jk ajku̶xy ka'p je̱'e̱ nimu̶naaxu̶u̶ tyu̶goy'ádu̶ch ma miich ajku̶xyu̶ñ, peru̶ u̶u̶ch ka'p u̶u̶ch miich ya jeky xymyu̶dadaangu̶xy. 12Adaa, mu̶dyiibu̶ adaa to'oxyu̶jk tu̶ tuñu̶ñ, ko u̶u̶ch je̱'e̱ perfume tu̶ xyajku'uyogu̶'u̶y, je̱' yu̶'u̶ du'un jyu̶jp'ijxypy mu̶naa u̶u̶ch naaxtu̶gu̶'u̶wa'añu̶ñ. 13Janch tu̶y'ajtu̶ñ du'un nnu̶maaygyu̶xy ko wan ma'e̱e̱mbyu̶ch ya naaxwiiñ, majaty naty adaa ayuuk tu̶y'ajt yajkapxwa'kxyu̶ñ je̱'e̱ mu̶dyiibu̶ aanu̶mu̶ ni'idzooku̶ñ ye̱jkpu̶ñ, yajnigápx yajnimu̶dya'agu̶p adaa to'oxyu̶jk nandu'un mu̶dyiibu̶ tu̶ tuñu̶ñ, y du'un yajja'aymyédzu̶ch.
Judas je̱'e̱ Jesús ku̶'u̶yéky ma je̱'e̱ myu̶dzipu̶ñ
(Mc 14.10-11; Lc 22.3-6)
14Nidu'ugtu̶ je̱'e̱ nimajmé̱tzkpu̶ discípulotu̶jk je̱'e̱ mu̶dyiibu̶ najty xu̶u̶'ajtpu̶ñ Judas Iscariote, oy ixy je̱'e̱ teedy windzu̶ndu̶jk, 15y chi nu̶maay ajku̶xy:
—¿Du'uñdyu̶ u̶u̶ch xymyu̶juuygyu̶xu̶ch, y u̶u̶ch miich je̱'e̱ Jesús nyajku̶'u̶du̶gu̶'u̶wu̶py ajku̶xy?
Chi je̱' y'adzooy ajku̶xy: ipxmajk platu̶ meeñ. 16Y Mu̶'it je̱'e̱ Judas winma'añ u̶xtaaydyu̶gu̶u̶y neby mu̶baad ku̶'u̶yékyu̶ñ je̱'e̱ Jesús.
Je̱'e̱ Windzú̶n Jesús y'adzuu
(Mc 14.12-25; Lc 22.7-23; Jn 13.21-30; 1 Co 11.23-26)
17Ma je̱'e̱ xu̶u̶ chonda'agyu̶ñ mu̶naa je̱'e̱ judío ja'ay tzajkaagy kaaygyu̶xy je̱'e̱ mu̶dyiibu̶ ka'p lyevaduru̶ mu̶u̶du̶chu̶ñ, chi je̱'e̱ discípulotu̶jk nimu̶jwa'kku̶xy je̱'e̱ Jesús y yajtu̶u̶y ajku̶xy:
—¿Ma mdzoky ni'ixu̶u̶yu̶ch ajku̶xy je̱'e̱ Pascua adzuu?
18Chi je̱' y'adzoowu̶ ajku̶xy:
—Nú̶kxku̶x kajptjooty ma je̱'e̱ ja'ay tyu̶jku̶ñ y nu̶maaygyu̶x: ‘Je̱'e̱ Windzú̶n du'un mu̶naamb: Tu̶ u̶u̶ch je̱'e̱ n'o'ku̶ñ wyingoonu̶, y jim u̶u̶ch nnu̶kxy ma je̱'e̱ mdu̶jku̶ñ ma u̶u̶ch je̱'e̱ Pascua adzuu ngáyu̶chu̶ñ mu̶u̶d u̶u̶ch je̱'e̱ ndiscípulotu̶jk ajku̶xy.’
19Je̱'e̱ discípulotu̶jk kyuydyuungu̶x je̱'e̱ du'un neby je̱'e̱ Jesús najty tu̶ y'ane'emyiiju̶ñ ajku̶xy, y jim je̱'e̱ Pascua adzuu ni'ixu̶u̶y ajku̶xy.
20Ko kyoodzu̶u̶y, jim najty je̱'e̱ Jesús y'u̶ña'ay ma je̱'e̱ meesu̶ju̶ñ mu̶u̶d je̱'e̱ nimajmé̱tzkpu̶ dyiscípulotu̶jk; 21y cham najty kyaaygyu̶xy, chi je̱'e̱ Jesús ñu̶maayu̶ ajku̶xy:
—Janch tu̶y'ajtu̶ñ du'un nnu̶maaygyu̶xy ko miich nidu'ugtu̶ xykyu̶'u̶ye̱gaamb ajku̶xy ma u̶u̶ch je̱'e̱ nmu̶dzipu̶ñ.
22Chi mu̶k tyajtu̶gu̶u̶y myaaydyu̶gu̶u̶y ajku̶xy y yajtu̶u̶du̶gu̶u̶ygyu̶xy nidu'ugjáty nidu'ugjáty:
—Windzú̶n, ¿nej u̶u̶ch je̱'e̱ da'aju̶?
23Chi je̱'e̱ Jesús y'adzoowu̶ ajku̶xy:
—Nidu'ugtu̶ je̱'e̱ mu̶dyiibu̶ je̱'e̱ tzajkaagy yam tu'ug texy ku'umujp mu̶u̶d u̶u̶ch, je̱' u̶u̶ch xykyu̶'u̶ye̱gaamb ma u̶u̶ch je̱'e̱ nmu̶dzipu̶ñ. 24U̶u̶ch je̱' je̱'e̱ ja'ay mu̶dyiibu̶ tzon tzajpjooty nmu̶nax nyajnáxu̶byu̶ch je̱'e̱ tzaachpyu̶ ayo'on du'un neby je̱'e̱ Dios ñaky myu̶na'añu̶ñ; peru̶ ¡ayo'onbadaamb je̱'e̱ ja'ay y'yoobu̶ mu̶dyiibu̶ u̶u̶ch xykyu̶'u̶ye̱gaamb ma u̶u̶ch je̱'e̱ nmu̶dzipu̶ñ! Ni'igu̶ oy kogu̶ kya'adimymya'axung'ajty.
25Mu̶'it je̱'e̱ Judas, je̱'e̱ mu̶dyiibu̶ najty ku̶'u̶ye̱gaanu̶bu̶ñ yajtu̶u̶y:
—Windzú̶n, ¿nej u̶u̶ch je̱'e̱ da'aju̶?
—Chi je̱'e̱ Jesús y'adzooy —Miich du'un tu̶ mmu̶na'añ.
26Cham najty kyaaygyu̶xy, chi je̱'e̱ Jesús tzajkaagy konu̶'ky, y ko je̱'e̱ Dioskujuuyu̶p yejky, chi adugu̶u̶y y mooy je̱'e̱ dyiscípulotu̶jk, nu̶maay ajku̶xy:
—Kaaygyu̶x adaa tzajkaagy, u̶u̶ch adaa nni'kx.
27Mu̶'it je̱'e̱ u'ugy konu̶'ky, y ko je̱'e̱ Dioskujuuyu̶p yejky, chi je̱'e̱ dyiscípulotu̶jk mooy, nu̶maay ajku̶xy:
—Uukku̶x adaa u'ugy miich nigu̶xyu̶ ajku̶xy, 28je̱' ko je̱' u̶u̶ch adaa nne'pty, je̱'e̱ adaa je̱'e̱ Dios kyapxytyuunu̶ñ #26.28 Je̱'e̱ Dios kyapxytyuunu̶ñ: nije̱' jaaybyu̶du̶jk myu̶naangu̶xy: je̱'e̱ jembyu̶ Dios kyapxytyuunu̶ñ je̱'e̱ mu̶dyiibu̶ Dios yejkypyu̶ñ, je̱'e̱ nne'pty mu̶dyiibu̶ te̱maamb yogaambu̶ñ neby je̱'e̱ mayñaaxwiiñjya'ay pyoky kyu̶dyeey yajwinmé̱kxku̶xu̶chu̶ñ. 29Peru̶ nnu̶maaygyu̶xypy miich du'un ko ka'p u̶u̶ch adaa viino n'ok'uuknu̶ch, u̶xtu̶ mu̶'itnu̶ u̶u̶ch je̱'e̱ jemyvyiino ja'adu'ook n'u'ugu̶ch mu̶u̶d miich ajku̶xy ko u̶u̶ch naty tzajpjooty nja'ady ma u̶u̶ch je̱'e̱ nDeedy y'ane'emyu̶ñ.
Jesús nigapxy ko je̱'e̱ Pedro kyuyu'udza'añyii
(Mc 14.26-31; Lc 22.31-34; Jn 13.36-38)
30Ko je̱'e̱ Salmo u̶y tu'ug u̶u̶y ajku̶xy, chi ñú̶kxku̶xy ma je̱'e̱ Olivos koptu̶ñ. 31Y chi je̱'e̱ Jesús ñu̶maayu̶ ajku̶xy:
—Nigu̶xyu̶ je̱'e̱ mmu̶bu̶jku̶ñ myajtu̶goydya'awaangu̶xy ma u̶u̶chu̶ñ jada'achám goodz. Du'un je̱'e̱ Dios ñaky myu̶na'añ: ‘Nyaj'o'ogu̶byu̶ch je̱'e̱ borreegu̶ kweentu̶'ajtpu̶, y mu̶'it je̱'e̱ borreegu̶ y'ayo'oyu̶ydyaaygyu̶xu̶ch.’ 32Peru̶ ko u̶u̶ch naty njuugypyú̶ky, nú̶kxu̶bu̶ch jim Galilea jayu̶jp ka'anu̶ naty jim miich mnú̶kxku̶xyñu̶.
33Chi je̱'e̱ Pedro y'adzoowu̶:
—Oy naty je̱'e̱ myu̶bu̶jku̶ñ nigu̶xyu̶ ja'ayajtu̶gooydyaaygyu̶xpu̶ ma miichu̶ñ, peru̶ u̶u̶ch ka'p u̶u̶ch je̱'e̱ nyajtu̶góyu̶ch.
34Chi je̱'e̱ Jesús ñu̶maayu̶:
—Janch tu̶y'ajtu̶ñ du'un nnu̶ma'ay, ko cham koodz ka'anu̶ naty je̱'e̱ tzeyñu̶'u̶'aa yaxu̶'u̶gyñu̶, tu̶ u̶u̶ch miich naty tu̶gu̶u̶g'ook xyñi'ikuyu'tznu̶, ko u̶u̶ch miich ka'p xy'ixy'aty.
35Chi je̱'e̱ Pedro y'ayuuk jaktimyñi'igapxpejty:
—Oy u̶u̶ch u̶xyu̶py ndimy'o'kpu̶ mu̶u̶d miich, ka'p u̶u̶ch miich nguyu'udzu̶ch.
—Y nigu̶xyu̶ najty je̱'e̱ discípulotu̶jk agu̶ du'un myu̶naangu̶xy.
Jesús Dios mu̶bu̶jktzóy jim Getzemaní
(Mc 14.32-42; Lc 22.39-46)
36Chi je̱'e̱ Jesús ñu̶kxy mu̶u̶d je̱'e̱ dyiscípulotu̶jk ma je̱'e̱ it lugaar mu̶dyiibu̶ xu̶u̶'ajtpu̶ñ Getzemaní, y chi ñu̶maayu̶ ajku̶xy:
—U̶ñaaygyu̶x yaa, nú̶kxyu̶ch jim'eemby n'okDiosmu̶bu̶jktzóy.
37Y chi je̱'e̱ Pedro mu̶dnu̶kxy mu̶u̶d je̱'e̱ me̱tzkpu̶ Zebedeo y'ung, y chi jyootmaybyaattu̶ y tyajtu̶gu̶u̶y myaaydyu̶gu̶u̶y. 38Chi ñu̶maayu̶ ajku̶xy:
—Nju̶wu̶u̶ybyu̶ch je̱'e̱ taju̶u̶ mayu̶u̶ ma u̶u̶ch je̱'e̱ njoot nwinma'añ neby o'ogy'aambu̶ju̶ñ. Wu̶'u̶mgu̶x miich yaa, y juugy ijtku̶x mu̶u̶d u̶u̶ch.
39Chi je̱'e̱ Jesús we̱e̱nu̶ jyaknajtzyo'oyu̶u̶y, chi ñayñajtzkojxtu̶na'awu̶u̶yu̶ u̶xtu̶ yajnaaxpaaty je̱'e̱ wyimbok, y mu̶bu̶jktzooy je̱'e̱ Dios, myu̶naañ: “Dios Teedy, pu̶nu̶ m'a'ixu̶u̶by du'un miich, pu̶jku̶gyu̶ch adaa tzaachpyu̶ ayo'on; peru̶ ka'p du'un tyunu̶u̶ jyadu̶u̶ju̶ch neby u̶u̶ch ndzokyu̶ñ, du'un wan tuñyii jadyii neby miich mdzokyu̶ñ.”
40Chi wyimbijty ma je̱'e̱ nidu̶gu̶u̶gpu̶ discípulotu̶jk najty tu̶ u̶xyo'oyu̶ñ, y chi oy paatku̶xy jyanchmaagu̶xy najty. Chi je̱'e̱ Pedro nu̶maay:
—¿Nej ni tu'k'hooru̶ miich tu̶ mga'amu̶daakku̶xy m'ijtku̶xu̶ch juugy mu̶u̶d u̶u̶ch? 41Juugy ijtku̶x y mmu̶bu̶jktzoogu̶x je̱'e̱ Dios wan xypyube̱jt xypyudu̶gu̶u̶ygyu̶xu̶ch ka'pu̶ ju̶bu̶ktuum mga'agu̶xu̶ch. Miich ajku̶xy ja'amu̶naangu̶xp je̱'e̱ mjoot du'un ko je̱'e̱ oybyu̶ mdunaangu̶xy, peru̶ amaay je̱'e̱ mni'kx ajku̶xy y ka'p myada'agy.
42Chi mu̶me̱jtz'ook ñu̶kxy y mu̶bu̶jktzooy je̱'e̱ Dios du'un: “Dios Teedy, pu̶nu̶ ka'p du'un m'a'ixu̶'u̶y xypyu̶jku̶chu̶ch adaa tzaachpyu̶ ayo'on, miich je̱'e̱ mdzojku̶ñ wan yajkuydyúñ.”
43Ko wyimbijtnu̶ba, chi je̱'e̱ discípulotu̶jk ja'adu'ook paatnu̶ba najty jyanchmaagu̶xy, je̱' ko ka'p je̱'e̱ ma'awu̶u̶ najty okmu̶madaakku̶xnu̶. 44Chi y'u̶xyo'oyu̶gu̶xnu̶bu̶ ñú̶kxnu̶bu̶ Dios mu̶bu̶jktzoobu̶ je̱'e̱ mu̶du̶gu̶u̶g'ookpu̶, nandu'un myu̶naanu̶bu̶ neby najty tu̶ y'okmu̶naambu̶ju̶ñ. 45Mu̶'it wyimbijtnu̶ba ma je̱'e̱ discípulotu̶jk najty ajku̶xyu̶ñ, y chi nu̶maay ajku̶xy:
—¿Nej jii mmaagu̶xy mbókxku̶xyñu̶ju̶? Tu̶ je̱'e̱ tiempo paady mu̶naa u̶u̶ch nyajku̶'u̶yé̱gu̶chu̶ñ, u̶u̶ch je̱' je̱'e̱ ja'ay mu̶dyiibu̶ tzon tzajpjooty, ma je̱'e̱ pokyjya'aydyu̶jk kyu̶'u̶'aam ajku̶xyu̶ñ. 46Pu̶du̶'kku̶x, tzu̶k jaamu̶m ajku̶xy, chi je̱'e̱ myiñ je̱'e̱ mu̶dyiibu̶ u̶u̶ch xykyu̶'u̶ye̱gaamb ma u̶u̶ch je̱'e̱ nmu̶dzipu̶ñ.
Jesús mach ajku̶xy
(Mc 14.43-50; Lc 22.47-53; Jn 18.2-11)
47Kapxpnu̶ najty je̱'e̱ Jesús ko je̱'e̱ Judas jya'ty, nidu'ugtu̶ je̱'e̱ nimajmé̱tzkpu̶ discípulotu̶jk, mu̶u̶d je̱'e̱ mayjya'ay agu̶ espaadu̶ mu̶u̶d y agu̶ kepykyap. Je̱'e̱ teedy windzu̶ndu̶jk y je̱'e̱ judío ja'ay y'amu̶jja'aydyu̶jk najty tu̶ kye̱jxu̶gu̶xyu̶. 48Judas, je̱'e̱ mu̶dyiibu̶ je̱'e̱ Jesús najty ku̶'u̶ye̱gaamb ma je̱'e̱ myu̶dzipu̶ñ, tu̶ najty je̱'e̱ ijxpe̱jt tu'ug yeky, nu̶maay ajku̶xy: “Je̱'e̱ mu̶dyiibu̶ u̶u̶ch naty u̶u̶ch ndzu'kxypyu̶ñ, je̱' je̱'e̱ naty; mmajtzku̶xu̶py.” 49Y chi je̱'e̱ Judas je̱'e̱ Jesús mu̶wingooñ, y nu̶maay:
—¡Maguepy Windzú̶n!
—Y chi tzu'kxy. 50Chi je̱'e̱ Jesús y'adzoowu̶:
—Mu̶gu'ug, je̱'e̱ mu̶dyiibu̶ tu̶ mnimiñ mduna'añu̶ñ; tuungoj.
Mu̶'it je̱'e̱ Jesús nimu̶jwa'ktaaygyu̶xy y majch ajku̶xy.
51Chi nidu'ugtu̶ ajku̶xy je̱'e̱ mu̶dyiibu̶ najty jim ajku̶xy mu̶u̶d je̱'e̱ Jesús; y'espaadu̶ juty y katzpujxu̶ je̱'e̱ teedy windzú̶n nigu'ubajk'ajtpu̶ tyuumbu̶ tyadzak tu'ug. 52Chi je̱'e̱ Jesús nu̶maay je̱'e̱ mu̶dyiibu̶ najty du'un tu̶ y'adu̶'u̶chu̶ñ:
—Pu̶gu̶'u̶g yu̶'u̶ m'espaadu̶ ma yu̶'u̶ ñidu̶jku̶ñ. Je̱' ko ku̶xyu̶ pu̶njaty tziptuungu̶xpu̶ñ mu̶u̶d je̱'e̱ espaadu̶, nan espaadu̶'aam je̱'e̱ y'o'kku̶xu̶ch. 53¿Nej ka'p mnejwu̶'u̶y ko u̶u̶ch je̱'e̱ nDeedy mu̶baad nmu̶nukxta'agy neby u̶u̶ch je̱'e̱ ángelestu̶jk majme̱tzkpu̶kyñáxy xyajnigué̱xu̶chu̶ñ cham cham mu̶dyiibu̶ u̶u̶ch xyñiwa'anu̶bu̶ñ? 54Peru̶ ko u̶u̶ch je̱'e̱ du'un n'oknu̶ma'awu̶ch, ¿neby je̱'e̱ Dios ñaky du'un yajkuydyúnu̶ch, je̱'e̱ mu̶dyiibu̶ du'un mu̶naamb ko du'un tyunu̶u̶ jyadu̶u̶ju̶ch?
55Chi je̱'e̱ Jesús je̱'e̱ mayjya'ay yajtu̶u̶y:
—¿Ti u̶u̶ch ko miich xyñimiingu̶xy mu̶u̶d je̱'e̱ espaadu̶ y mu̶u̶d je̱'e̱ kepyjyu̶jpxu'uñ xymyadzaangu̶xyu̶ch du'un neby u̶u̶ch nu̶wu̶'u̶y tu'ug me̱e̱tzpu̶ju̶ñ? Jaboom jaboom u̶u̶ch ijty jiiby nyaj'u̶xpú̶ky ma je̱'e̱ mu̶jtzajptu̶jku̶ñ, y ka'p u̶u̶ch miich nimu̶naa xymyajch ajku̶xy. 56Peru̶ adaa paady adaa du'un ku̶xyu̶ tyuñyii jyadyii wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶du̶jk myu̶naangu̶xyu̶ñ ma je̱'e̱ Dios ñakyu̶ñ.
Mu̶'it je̱'e̱ discípulotu̶jk nigu̶xyu̶ kye̱e̱ktaay ajku̶xy, y u̶xyo'oygyu̶xy je̱'e̱ Jesús naydyu'umbajk.
Jesús yajpaady mu̶jjuntu̶jooty
(Mc 14.53-65; Lc 22.54-55, 63-71; Jn 18.12-14, 19-24)
57Je̱'e̱ mu̶dyiibu̶ je̱'e̱ Jesús najty tu̶ majtzku̶xyu̶ñ, chi yajnú̶kxy ajku̶xy ma je̱'e̱ Caifás tyu̶jku̶ñ, je̱'e̱ mu̶dyiibu̶ je̱'e̱ teedy windzú̶n najty nigu'ubajk'ajtpu̶ñ, ma je̱'e̱ Dios y'ane̱'e̱mu̶n windzu̶ndu̶jk y je̱'e̱ amu̶jja'aydyu̶jk najty tu̶ ñayyo'oymyujku̶gu̶xyu̶ñ. 58Pedro u̶x'aam je̱'e̱ Jesús ju̶gue̱mdu̶gu̶'u̶ panu̶kxy u̶xtu̶ paja'ty ma je̱'e̱ teedy windzú̶n nigu'ubajk'ajtpu̶ tyu̶ba'agujku̶ñ. Chi tyu̶gu̶u̶y y ñaxwech mu̶u̶d je̱'e̱ mu̶jtzajptu̶jk kweentu̶'ajtpu̶ ajku̶xy, ok'ixa'añ neby ku̶xyu̶ kyugu̶x kyumayu̶'u̶wa'añu̶ñ.
59Je̱'e̱ teedy windzu̶ndu̶jk y ku̶xyu̶ je̱'e̱ judío ja'ay myu̶jjuntu̶'ajtpu̶ ajku̶xy, winma'añ u̶xtaaygyu̶xp je̱'e̱ najty neby je̱'e̱ Jesús mu̶baad ni'iwaambe̱jtku̶xyu̶ñ y neby du'un mu̶baad yaj'o'kku̶xyu̶ñ, 60Peru̶ ka'p najty je̱'e̱ winma'añ paatku̶xy neby mu̶baad ni'iwaambe̱jtku̶xyu̶ñ; oy je̱'e̱ ja'ay nigoo may ja'ani'ixu̶'u̶bejty ajku̶xy mu̶u̶d je̱'e̱ anu̶u̶. Mu̶'it je̱'e̱ ni'ixu̶'u̶be̱jtpu̶ me̱tzk jyakja'ty, 61chi jaktimyñi'igapxpejty ajku̶xy:
—Adaa ja'ay du'un mu̶naan: ‘U̶u̶ch nyajwindu̶góyu̶byu̶ch je̱'e̱ Dios myu̶jtzajptu̶jk y nyajpu̶du̶'u̶gu̶chu̶ch ja'adu'ook kudu̶gu̶u̶g xu̶u̶.’
62Mu̶'it je̱'e̱ teedy windzú̶n nigu'ubajk'ajtpu̶ tyu̶naayu̶'ky y yajtu̶u̶y je̱'e̱ Jesús:
—¿Nej ka'p nej m'adzowa'añu̶? ¿Ti adaa ja'ay du'un tyijpy ajku̶xy mu̶u̶d miich kyu̶xpu̶?
63Peru̶ je̱'e̱ Jesús ka'p je̱'e̱ ni tu'k'aa y'adzooy. Chi je̱'e̱ teedy windzú̶n nigu'ubajk'ajtpu̶ ñu̶maayu̶:
—Cham n'ane'emy mu̶u̶d je̱'e̱ Dios kyu̶xpu̶ jugy'ajtmu̶u̶dpu̶ xyu̶u̶ ko ye̱k je̱'e̱ tu̶y'ajt. Awaanu̶gyu̶ch ajku̶xy pu̶nu̶ miich je̱'e̱ Cristo, je̱'e̱ Dios y'Ung.
64Chi je̱'e̱ Jesús y'adzooy:
—Miich du'un mmu̶naamb. Y u̶u̶ch miich du'un nandu'un nnu̶maaygyu̶xypy ko u̶u̶ch miich xy'ijxku̶xu̶ch, u̶u̶ch je̱' je̱'e̱ ja'ay mu̶dyiibu̶ tzon tzajpjooty n'u̶ña'ayu̶ch naty ma je̱'e̱ Dios mu̶jmu̶k'ajtmu̶u̶dpu̶ y'a'oy'eembyu̶ñ, y ko u̶u̶ch naty jokjooty nmiñ.
65Mu̶'it je̱'e̱ teedy windzú̶n nigu'ubajk'ajtpu̶ wyit ku̶ch, je̱' je̱'e̱ du'un ijxpe̱jt'ajtp ko najty jyootma'ady, y chi myu̶naañ:
—¡Adayaaba ja'ay myu̶gapxtu̶gooby Dios yu̶'u̶ du'un mu̶u̶d je̱'e̱ y'ayuuk! ¿Ti je̱'e̱ nidu̶y'ajt'ajtpu̶ njakwaanu̶mu̶ch ajku̶xy? Miich tu̶ je̱'e̱ y'ayuuk yam mmu̶doowu̶ ajku̶xy ko tu̶ kyapxtu̶goy; 66¿neby miich m'okmu̶naangu̶xpu̶?
Chi je̱' y'adzooy ajku̶xy:
—Tu̶ yu̶'u̶ kyapxtu̶goy, y paady wan o'ogy.
67Mu̶'it je̱'e̱ Jesús windzujy ju̶jptzujy ajku̶xy y kojxy wojpy ajku̶xy. Nije̱' kojxy ajku̶xy ma je̱'e̱ wyiiñjyu̶jpu̶ñ, 68cham nu̶maaygyu̶xy:
—Miich miñ je̱'e̱ Cristo, ¡oknejwu̶'u̶ pu̶n tu̶ xykyoxy!
Pedro kuyu'uch ko ka'p ixy'aty je̱'e̱ Jesús
(Mc 14.66-72; Lc 22.56-62; Jn 18.15-18, 25-27)
69Pedro jiiby tu̶be̱'py najty je̱'e̱ y'u̶ña'ay, jiiby tu̶ba'agujk. Chi je̱'e̱ to'oxyu̶jk po'oduumbu̶ tu'ug ñimiinu̶ y ñu̶maayu̶:
—Miich najty yu̶'u̶ Jesús nandu'un mmu̶dwu̶dijtypy, je̱'e̱ mu̶dyiibu̶ Galilea tzombu̶ñ.
70Peru̶ je̱'e̱ Pedro kyuyu'tz je̱'e̱ mayjya'ayjyooty, myu̶naañ:
—Ka'p u̶u̶ch nnejwu̶'u̶y tii du'un mja'akápxypy mja'amu̶dyaakypyu̶ñ.
71Chi tu̶jk'aguuy ñu̶kxy, chi je̱'e̱ wiingpu̶ to'oxyu̶jk po'oduumbu̶ tu'ug y'ijxu̶nu̶ba, y chi je̱'e̱ to'oxyu̶jk po'oduumbu̶ myu̶gu'ugtu̶jk nu̶maay ajku̶xy:
—Adaa ja'ay najty yu̶'u̶ Jesús mu̶dwu̶dijtp, je̱'e̱ mu̶dyiibu̶ Nazaret tzombu̶ñ.
72Chi je̱'e̱ Pedro ja'adu'ook kuyu'tznu̶ba, cham je̱'e̱ xu̶u̶ Dios kapxpaady:
—¡Ka'p u̶u̶ch yu̶'u̶ jiibu̶ ja'ay n'ixy'aty!
73Ko we̱e̱nu̶ y'ijty, chi je̱'e̱ mu̶dyiibu̶ najty jim ajku̶xy je̱'e̱ Pedro ninu̶kxy ajku̶xy y nu̶maay ajku̶xy:
—Jaanch miich je̱'e̱ nandu'un nidu'ugtu̶ ajku̶xy je̱'e̱ mu̶dyiibu̶ je̱'e̱ Jesús najty mu̶dwu̶dijtpu̶ñ, jii ñi'igu̶xu̶'u̶gy neby mgapxyu̶ñ.
74Mu̶'it je̱'e̱ Pedro xu̶u̶ Dios kapxpaattu̶gu̶u̶y, cham myu̶na'añ:
—¡Ka'p u̶u̶ch yu̶'u̶ jiibu̶ ja'ay n'ixy'aty!
Je̱'e̱ timymyu̶'ityu̶ je̱'e̱ tzeyñu̶'u̶'aa oy tu'ug yaxu̶'u̶gy, 75y chi je̱'e̱ Pedro ja'aymye̱jtzpaaty ko je̱'e̱ Jesús najty du'un tu̶ ñu̶ma'ayii: ‘Ka'anu̶ naty je̱'e̱ tzeyñu̶'u̶'aa yaxu̶'u̶gyñu̶ ko u̶u̶ch miich tu̶gu̶u̶g'ook xykyuyu'udzu̶ch.’ Y chi je̱'e̱ Pedro jiiby pyu̶dzu̶u̶m, oy jyu̶'u̶y ya'axy neby ku'uwópy ku'uga'achpyu̶ju̶ñ mu̶u̶d je̱'e̱ taju̶ñ maayu̶ñ.
Valgt i Øjeblikket:
San Mateo 26: MIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005