Hechos 2
2
Bë' La'ay kie' Dios rdxin
1Kati bdxin lni Pentecostés yugute'ke bënni tayajle'ke Xan'ru nadzaag'ke tza'xhën. 2Kati ka zua ka' guk ruzbë' xhën le za' yewayuba, ka rak kati reikj'tzka bë', len byën gdu nu'yu'u ga nakua'ke'a, 3len gulului'lau'i ga nakua'ke'a gi' le nak ka nak luudxi'ru, le gulagis kuini len tu tu'ke. 4Ati yugute'ke bdze'iz leke Bë' La'ay kie' Dios len gulazulau'ke tui'ke diidza zitu, le gnabe'i leke Bë' La'ay kie' Dios lui'ke.
5Nakua'ke Jerusalén bënni Judea tayiijilaadxi'ke Dios, bënni za'ke gdu gabi'i yëdz'lyu. 6Len kati gulayëën'de ruzbë' ni bunach zian guludzaage len gulakgani'de, koma tayëën'de ki bënni tayajle'ke ni tui'ke xhtiidza'ke tu tu'ke. 7Len tzka'ti'ga tubaan'de tanáke:
¿Naru keg bënni Galilea yugute'ke bënni'a tui'ke diidza ni? 8¿Nakxh rak na'a tu tu'ru ryëëni'ru tui'ke xhtiidza'ru? 9Bënni nakua'ke ni biiz yëdz ka' za'ke, ki Partia, ki Media, ki Elam, ki Mesopotamia, ki Judea, ki Capadocia, ki Ponto len ki Asia, 10ki Frigia len Panfilia, ki Egipto, ki yu Libia ga'la'z yëdz Cirene. Lekz'ka' nakua'ke ni bënni yëdz Roma; 11la'ke nak'ke bënni Judea tayajle'ke ati ye la'ke zia'a yajta'l'ke bënni Judea ni, lekz'ka' nakua'ke bënni za'ke Creta len ki Arabia. ¡Len ryëënik'ru'ne ki len xhtiidza'ru tun'ke Xhën Dios!
12Yugute'ke nakua'ke tubaan'de len ti tadzëël'de bixh lanáke len tunaabi lza'a'ke:
—¿Bixh re'e'ni gna le ni?
13Ati ye la'ke tutitj'de leke, tanáke:
—¡Tazuudxi bënni'a!
Pedro rui'leene diidza bunach
14Na'ar gulazui'de bënni Gbaaz kie' Jesús ati Pedro pchis chi'e gne': «Guluzenaag bënni Judea len yugute'li tzka'li zuaali Jerusalén diidza le re'en'da kixhji'da lbi'ili. 15Bënni ni ti tazuudxi'de ka lbi'ili raki'li, koma ni zuaaru bayën. 16Le ni rak ni nak le Joel bënni be'e diidza ulaaz kie' Dios gne':
17“Ki' gak dza zia'a za' rne' Dios
usë'la'a Bë' La'ay kia' sua len yugute' bunach;
len bi'i kieeli bi bënni bi nguul
ului'bi diidza ulaaz kia'
le zian le glui'i'kda'bi bi'i kuidi kieeli,
len lu yeel gliidz'ka'ne yugu bënni guul.
18Lekz'ka' kieke bënni wendxin kia' bënni len nguul
usë'la'a Bë' La'ay kia' kati ladxin dza ni,
len ului'ke diidza ulaaz kia'.
19Yëla wak xhën glui'a lu xhba
len lu yëdz'lyu glui'a rën, gi' len kë' dzën ka buaj.
20Uchul lau'i gbiidz
len beu' gna' ka rna' rën.
Na'ar gdxin dza kie' Xan'ru
dza ki yëla wak xhën gak.
21San yugute'ke bënni layajle'ke le' Xan'ru
ulade'li'i'de yëla ruslá.”
22»Guluzenaag bënni Israel le gie'a lbi'ili: ka chik'z nëëzi'li dxia'a, Dios blui'de lbi'ili yëla rnabe' kie' Jesús ki Nazaret, len beene lu ne'e Le' le rgu'u yëla rubaani, len yëla wak xhën le Le' blui'de ro'u. 23Bënni ni, ka Dios chi nukëëze len nuune kie' gxhën'li'ne len bdëëdi'li'ne, bda'li'ne lu yaag kruuz lu naa'ke bënni dula. 24Ati Dios buspaane Le', busle' Le' lu ne'i yëla gut, koma yëla gut ni ti gunn gnabe'i Le'. 25David bënni gnabe'e kati be'e diidza kie' Jesús, gne':
“Rle'i'tikz'da'ne Xan'ru zue' len neda;
tibi gunn grixh neda, koma le' ze' kuiti le'a yubeel.
26Lena'a rudziiji laadxi'dau'a
ati len yëla ruzakalaadxi'i rula.
Len li' rxhënilaadxa'a.
27Koma ti jka'anu neda lu ba
len ti gnëëdzju latj gak'ditji
xhpeele'e bënni wendxin kiu'.
28Blui'du neda nëëz ki yëla naban
len nudze'iz'du neda yëla rudziiji le zu' len neda.”
29»Bë'cha'a gdu diidza kixhji'da lbi'ili ki xuuz'xhtau'ru guul David gutie' len guluka'che'e le', len ni de rle'i'ru na'dza ba kie'. 30San David ni guke bënni be'e diidza ulaaz kie' Dios, len nëëz'de ki Dios pxënelaadxe'e len gxhi'lu'ne'e gzue' tu bënni xi'in'xhzue' gnabe'e xhlatje. 31Lena'a le' ble'i'de zia'al ki Cristo ubaane lu yëla gut, len be'e diidza len gne' ki Cristo ti jga'ane lu ba len xhpeele'e ti gak'ditji. 32Na'a Dios buspaane larakz Jesús ni lu yëla gut, len le ni yugute'tu rdujxaka'lau'tu. 33Dios beene Le' xhën len glekie Le' kuiti le'e yubeel len bnëëdzje kie' Bë' La'ay kie' le pxënelaadxi'ru, ati Le' buz'së'la'ge kieeru, ley'a nak lea na'a rle'i'li len ryëëni'li. 34Koma David ti bubeene yewayuba, la kuin'kze gne':
“Xan'ru gudxe Xaana:
Gri'i kuiti le'a yubeel,
35tzal Neda guuna ki bënni'a ti tale'i'de li' dxia'a lakua'ke xhni'u.”
36»Lbi'ili bënni Israel rala gnëëzi'li ka'teez nak ki larakz Jesús bënni'a bda'li'ne lu yaag kruuz, Dios chi beene le' Xan'ru len Cristo.»
37Kati gulayëën'de le ni bënni'a nakua'ke'a, guluwi'i'ni'tzki'de len gulunaab'de Pedro len ye la'ke bënni gbaaz kie' Jesús:
—Bënni bë'cha'a, ¿Bixh rala gun'tu?
38Pedro bubi'e diidza:
—Gulubi'i'laadxi'li len Dios len guludiil nis lu le' Jesucristo, naar Dios si'xhëëne xhtu'la'li len le' gunne kieeli Bë' La'ay kie'. 39Koma lea pxënelaadxi'li ni nak kieeli len kiek'bi bi kieeli, len lekz'ka' kieke yugute'ke bënni nakua'ke zitu, bënni'a gliidze leke Xan'ru Dios.
40Len diidza ni len ye la'k diidza Pedro rzeajni'i'de leke rne':
—¡Guluslá kuin'li ki bunach ni ku tabëëz dxia'a!
41Ati tzka'ke bënni gulazi'ke diidza ni guludiile nis, len ka tson mil bunach yajitza'ke len bënni'a tayajle'ke Xan'ru. 42Len tzutzu gulakua'ke len le tuseed'de leke bënni gbaaz kie' Xan'ru, len tuune tuuz le de kieke, ati tudzaage kati tui'leene diidza Dios len kati ta'we yët'xhtiil'a ka pseed'de leke Xan'ru.
Yëla naban kieke bënni'a gulayajle'ke zia'a
43Yugute'ke tubaan'de nia'a ki yëla wak xhën le tale'i'de, len le rlui'e Dios lu naa'ke bënni gbaaz kie' 44Yugute'ke bënni'a tayajle'ke gulakua'ke tza'xhën len tuune tuuz le de kieke. 45Gluti'ke xhyu'ke len zura le de kieke ati dumi'a tun'gatzje tzka le nayaadzji'kde tu tu'ke. 46Yugu dza tudzaage lu gdou', len nu'yu'u tuxhuuxhje yët'xhtiil'a ka pseed'de leke Xan'ru len tza'xhën ta'we len yëla rudziiji len yëla nëxhj'laadxi. 47Tagu'u'ke ba Dios len yugute'ke tale'i'de leke dxia'a, len tu tu dza ueaj Xan'ru ziije rxëne yëdz kie' len bënni'a Le' rusle'.
Valgt i Øjeblikket:
Hechos 2: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC