Hechos 1
1
Dios pxënelaadxi'ke ksë'le'e Bë' La'ay kie'
1Teófilo lu gich le beena zia'a bzooja yugute' le Jesús gzulau'e ruune len rseed'de 2na' bdxin'te dza bubeene yewayuba. Kati zia'a wëëje, len Bë' La'ay kie' Dios gnabe'i'de gbaaz kie' bënni'a grëe' le rala lun'ke. 3Len kati gdëëd gutie' kuin'kze yajlui'lau'e len blui'de leke le tunn'be' ki yu'u yëla naban kie'. Chua' dza blui'lau'e len leke len be'leene leke diidza ki yëla rnabe' kie' Dios.
4Kati ni zue' len bënni gbaaz kie', Jesús ti gu'un'de luze'e Jerusalén len gudxe leke:
—Gulkëëz gak le pxënelaadxi'li Xuuza ka neda chik'z guudxa lbi'ili. 5Koma Juan pkiile bunach len nis, san tir rdzei zian dza kati Dios jkiile lbi'ili len Bë' La'ay kie'.
Jesús rubeene yewayuba
6Bënni nakua'leene Jesús gulunaab'de le':
—Xan, ¿Ati gun'tiu' na'a ga luzi'ke yëla rnabe' bënni Israel?
7Jesús bubi'e diidza:
—Ti rné lbi'ili gnëëzi'li bixh dza u batxh'tek guune Dios le zua lu ne'e guune. 8San kati si'li'ne Bë' La'ay kie' Dios, wap'li yëla wak len uroj'li tzajxaka'lau'li nia'a kia' lu yëdz Jerusalén, gdu yu ki Judea len yu ki Samaria len gdu gabi'i yëdz'lyu.
9Buudx gne' ki, tzal nakua'ke tuyu'ke le', Jesús bubeene ati tu buaj pka'chi' le', len tir gulale'i'de le'. 10Len tzal tuyu'ke ka rubeene Jesús yewayuba, chop'ke bënni naku'ke laari xhkich gulului'lau'ke ga nakua'ke'a 11len gle'ke leke:
—Bënni Galilea, ¿Bixhkia' zeeli ryuuli lu xhba? Larakz Jesús ni bënni'a gzue' len lbi'ili ati na'a chi bubeene yewayuba, wëëde le yubl lekz'ka' ka na' ble'i'li'ne zuwëëje.
Matías buzue' xhlatje Judas
12Na' lati'iz guluza'ke Gia'a ki Olivos len guludxiine Jerusalén tzkaaz nap'ke lsenz laza'ke dza tu'ueak'laadxi'ke bënni Judea. 13Kati guludxiine lu yëdz'a gulabeene yu'u zua xhtza' ki yu'u ga taga'ane'a. Bënni ni nak'ke Pedro, Juan, Santiago, Andrés, Felipe, Tomás, Bartolomé, Mateo, Santiago bënni xi'ine Alfeo, Simón bënni'a nadxi'i'de laadze, len Judas bënni xi'ine Santiago. 14Yugute'ke bënni ni tudzaag'tekze tui'leene diidza Dios, len ye la'knu nguul lekz'ka' María xhne'e Jesús len bënni bë'che'e.
15Larakz dza niiz ka tu'gayua'galj'ke bënni'a nudzaag'ke ni', ati Pedro gzui'de len gudxe leke: 16«Bënni bë'cha'a, ben bayuudx guk le gne' Bë' La'ay kie' Dios lu Diidza La'ay bzooje David kie' Judas, bënni'a pche'e bënni'a gulazëëne Jesús. 17Koma bitze'e len ro'u len tza'xhën ben'ru dxin. 18Ati len laaxhji xhtu'le'e gyiije len gu'uwe tu yu, na' gbixe kus'wiidjl ati brëëza le'e len gularoj xhajlue'. 19Kati gulanëëz'de bënni nakua'ke Jerusalén gulusi'ke lei' yu ni Hacéldama, diidza ni re'e'ni gna: “Yu Rën” 20Len ka' nayoj lu Gich ki Salmo rna:
“Liidxe nit'lau
len nutunu sua le'i.”
Lekz'ka' rna:
“Bënni yubl sue' xhlatje.”
21»Nakua'ke ni bënni chi gulakua'leen'tekze ro'u gdu tzka gzue' len ro'u Xan'ru Jesús, 22le gde'la' kati Juan pkiile le' nis len bdxin'te dza bubeene yewayuba. Na'a run bayuudx uzua'ru'ne bënni sue' len netu ki nadzaag'tu ka' tzajxaka'lau'tu ki Jesús bubaane lu yëla gut.»
23Na' guluzua'ke chope': José bënni le' Barsabás ati te'ke le' Justo len Matías. 24Ati glui'leene diidza Dios gle'ke Le': «Xan, li' numbe'u laadxi'dau'ke yugute'ke, blui'i netu nuxh'lke rdzag'laadxu'ne 25naar gake gbaaz kiu' xhlatje Judas le bnitie' nia'a ki xhtu'le'e len ziije ga rné le' tziije.»
26Na' guluzooje lu giaj lake ati guluzale' len broj le' Matías len na'teez gbaab'leene bënni ye chi'niaj'ke gbaaz kie' Jesús.
Valgt i Øjeblikket:
Hechos 1: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC