Juan 10
10
Bënni'a run'chi'e'ba bëku'xhiila
1Na' Jesús gudxe leke: «Le nak'te rea' lbi'ili ki bënni ti ryaazie ra puert ki li'aj kiek'ba bëku'xhiila, bënni gban len bënni tulatje yu'u nak'ke. 2San bënni ryaazie ra puert nake bënni'a run'chi'e'ba bëku'xhiila. 3Bënni ze' ra puert rsaalje len bënni'a run'chi'e'ba bëku'xhiila tu tuuba rliidze'ba laaba, lek'ba tumbe'ba chi'e; na' rbiije'ba lu li'aj'a, 4len kati chi guladach'ba gularoj'ba rnëëre lauk'ba len lek'ba rajak'leema le' koma tumbe'ba chi'e. 5San, bënni'a ti numbek'ba ti rajak'leema le', taxhunjil'ba le', koma ti tumbe'ba chi'e.»
6Jesús bnëëdzje kieke diidza run lsaki'i ni, san leke ti gulayajni'i'de lea gu'un'de gie' leke.
Jesús, bënni run'chi'e'ba dxia'a bëku'xhiila
7Jesús yubl gudxe leke: «Le nak'te rea' lbi'ili: Neda naka puert'a ga tayaaz'ba bëku'xhiila. 8Yugute'ke bënni'a gliide zia'al ka neda, glake bënni gban len bënni tulatje yu'u; san bëku'xhiila ti guluzenaagik'ba leke. 9Neda naka puert'a: bënni ryaazie neda, ule'. Ryaazie len r'rooje ati rdzëël'de daka.
10»Bënni gban riid'ze rdulaane, rdudëëd'de len rdujenditj'de; san neda za'a ki ga'ta kieeli yëla naban, tu yëla naban ras'rdxia. 11Neda naka bënni'a run'chi'e'ba dxia'a bëku'xhiila. Bënni'a run'chi'e'ba dxia'a bëku'xhiila rnëëdzje yëla naban kie' nia'a kiek'ba; 12san bënni'a run'ze dxin ki laaxhje, kati za'ba bëku'zuuga rka'ane'ba na' bëku'xhiila'a len rxhunje koma ti nake bënni run'chi'e'ba bëku'xhiila ati keg nak'kba bëku'xhiila kie'. Ati bëku'zuuga'a rlaag'ba bëku'xhiila'a len rus'laz'z'ba ka lek'ba. 13Bënni ni rxhunje koma rki'iz le' laaxhje ti rki'i le' kiek'ba bëku'xhiila'a.
14-15»Neda naka bënni'a run'chi'e'ba dxia'a bëku'xhiila. Ka numbe'e neda Xuuza len neda numbe'a'ne, lekz'ka' numbe'ka'ba bëku'xhiila kia' len lek'ba numbek'ba neda. Neda rdëëda yëla naban kia' nia'a kiek'ba bëku'xhiila. 16Nakuak'ba ye la'kba bëku'xhiila kia' ti dzë'ë'ba lu li'aj ni; lekz'ka' lek'ba rala tzajxhi'ka'ba. Lek'ba uluzenaagik'ba neda len tuuz li'aj layu'u'ba, len tuuza neda gaka bënni gun'chi'e'ba.
17»Xuuz'ru nadxi'i'de neda koma neda rdëëda yëla naban kia' naar yuzi'a ley yubl. 18Nutunu rgua yëla naban kia' kuin'kza rdëëda ley. Napa yëla rnabe' gdëëda ley len yuzi'a ley. Le ni gnabe'i'de neda Xuuza.»
19Kati bënni Judea gulayëën'de diidza, yubl ka gularooje chop'l 20Bënni zian tanáke:
—¿Bixhkia' rzeenagi'li'ne, la bë' xëwi yu'u Le' len chi rchixh ikje?
21San ye la'ke tanáke:
—Bënni yu'u le' bë' xëwi ti gunn gui'e ka diidza. ¿Naru wak bë' xëwi un le'ke bënni lau'chul?
Bënni Judea ti tazi'e Jesús
22Nak beu' bë'gi', ati Jerusalén tuune lni ki kati gulagu'u'ke lu ne'e Dios gdou'. 23Jesús zue' lu gdou', len rde' ga nazi' lei' Nchiil kie' Salomón. 24Na' bënni Judea gulabia'niidi'de le' len gulunaab'de le':
—¿Batxh'kz ksaanu gzu' netu bagi'i? Xhki li' naku Le' Cristo, gdixhji'i'ti netu.
25Jesús bubi'e diidza:
—Chi gdixhjë'a san lbi'ili ti gyajle'li neda. Yugu le ruuna len yëla rnabe' kie' Xuuza, ley tunn'be dxia'a'tit; 26san lbi'ili ti rajle'li, koma ti nak'li bëku'xhiila kia'. 27Bëku'xhiila kia' numbek'ba chi'a len neda numbe'ka'ba ati rdujak'leema neda. 28Neda rnëëdzja kiek'ba yëla naban tzalzu len ti lat'kz'ba ati nutunu kua lek'ba lu na'a. 29Xuuza nunn'ke'ba kia', le nake xhën'te ka yugute', len nutunu gunn kua lek'ba lu ne'e. 30Neda len Xuuz'ru tuuz nak'tu.
31Bënni Judea gulagie'le'e le yubl giaj ki lulaadxi'ke Jesús. 32Ati Jesús gudxe leke:
—Lu yëla wak kie' Xuuza le zian le dxia'a chi beena lau'li; ¿Nia'a ki bil'le glaadxi'li neda giaj?
33Bënni Judea gulubi'e diidza
—Ti glaadxi'tu li giaj nia'a ki le beenu dxia'a, san nia'a ki diidza le rui'u koma nak diidza ku nak lau'e Dios, koma Li' naku bënni bunach ati rdëëdu kuinu ka Dios.
34Jesús gudxe leke:
—Lu xhba kieeli nayoj: “Neda gnia' ki lbi'ili nak'li dios.” 35Nëëzi'ru ki le rna Diidza La'ay nutunu gunn udabaaga; len Dios psi'e lake dios bënni'a psë'le'e kieke xhtiidze'e. 36Ati xhki Dios gliije neda kiizi ati psë'le'e neda yëdz'lyu, ¿Bixhkia' rnaali ki neda rui'a diidza ku nak lau'e Dios, le gnaaza ki naka Xi'ine Dios? 37Xhki ti ruuna le ruune Xuuza ti tzajle'li neda. 38San xhki ruuna ley zala ti tzajle'li neda, gultzajle' lea ruuna'a, naar gnëëzi'ti'li ki Xuuza zue' len neda ati neda zua' len Xuuza.
39Yubl gle'en'de lazëëne Le', san Jesús bxhunji'de leke.
40Jesús zuwëëje tzala'a yeego Jordán, ati ni' bga'ane, latj'a ga Juan pkiile nis. 41Bënni zian dujyu'ke Le' len tanáke:
Leel, zala Juan ti beene tu le gunn'be' yëla wak, yugute' le gne' kie' bënni ni ti gxhi'ye'e.
42Ati bënni zian gulayajle'ke Jesús.
Valgt i Øjeblikket:
Juan 10: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC
