Juan 18
18
Tazëëne Jesús
(Mt 26:47-56; Mr 14:43-50; Lc 22:47-53)
1Buudx be'e diidza ni, Jesús len bënni useed kie' gularooje yajake tzala'a yeego ki Cedrón, ni' de tu layeel ga gyaazie Jesús len bënni useed kie'. 2Lekz'ka' Judas bënni'a rdëëde Le' lu naa'ke bunach, numbe'e latj'a, koma zian lzu Jesús budzaage na' len bënni useed kie'. 3Na' Judas bdxiine dzaage yugute'ke bënni rajake gdil len la'ke bënni tun'chi'ke gdou' bënni nusë'la'ke leke bënni tunabe'i'de pxuuz len bënni fariseo. Nua'ke gia'tuchi, gi' len gi' yëër. 4San koma Jesús chik'z nëëz'de le rala gak, brooje len bnaab'de leke:
—¿Nuxh rugiilj'li?
5Leke gulubi'ke diidza:
—Jesús bënni Nazaret
Jesús gne':
Needa'a.
Judas, bënni'a rdëëde Le' lu naa'ke, na' ze'leene leke. 6Kati Jesús gudxe leke: «Needa'a», gulubi'ke kuz'kuudzu'ul len gulabixe'. 7Jesús yubl bnaab'de leke:
¿Nuxh rugiilj'li?
Leke yubl gulubi'ke diidza:
—Jesús bënni Nazaret.
8Jesús yubl gudxe leke:
—Chi guudxa lbi'ili ki needa'a. Xhki neda rugiilj'li, gulgui'ke latj bënni ni tzawake.
9Le ni guk naar yajtzaag le kuin'kze Jesús gne': «Xuuza, keg tue' bënni'a benn'ku'ne kia' gnitie'.» 10Na' Simón Pedro nue'e tu gia'tuchi, gliije ley len pchuuge naage yubeel Malco, bënni'a nake bënni wendxin kie' pxuuz blou. 11Jesús gudxe Pedro:
—Bugu'u gia'tuchi'a xhlatji. Xhki Xuuz'ru nuune ga tëëda yëla rzi'be' ni, ¿Naru ti rala tëëda ley?
Jesús rdxiine lau'e Anás
(Mt 26:57-58; Mr 14:53-54; Lc 22:54)
12Bënni'a rajake gdil dzaag'ke bënni'a rnabe'i'de leke len bënni'a tun'chi'ke gdou', gulazëëne Jesús len gluuge'e Le'. 13Zia'a liidxe pxuuz blou Anás guluche'e Le', koma nake xhtau'e Caifás, pxuuz blou zue' iz'a. 14Larakz Caifás ni nake bënni'a gudxe bënni Judea ki nak'r dxia'a kieke ki tuuze bënni gatie' nia'a ki gdu yëdz.
Pedro ti rzi'lu'ne'e ki numbe'e Jesús
(Mt 26:69-70; Mr 14:66-68; Lc 22:55-57)
15Simón Pedro len ye tue' bënni useed kie' Jesús zjak'leene Le'. Bënni'a ye tue' ben gyaaz'leene Jesús nu'yu'ut, koma le' pxuuz blou numbe'e le'. 16Ati Pedro rayu'uz bga'ane, ra puert. Lena'a bënni'a ye tue', bënni'a numbe'e le' pxuuz'a brooje len be'leene'nu diidza nguul'a run'chi'nu puert'a, len bnëëdzj'nu latj tzaazie Pedro. 17Nguul ni bnaabi'nu'ne Pedro:
—¿Naru keg bënni useed kie' Jesús naku li'?
Pedro bubi'e diidza:
Ën'ën', Ti naka.
18Ati le rak ziaag bënni wendxin len bënni tun'chi'ke gdou' gulabekie gi', len na' tutze'i kuin'ke. Pedro lekz'ka' rë'leene leke rutze'i'de kuine ra gi'a.
Pxuuz blou rnaab'yuudxe Jesús
(Mt 26:59-66; Mr 14:55-64; Lc 22:66-71)
19Pxuuz blou gzulau'e rnaab'de Jesús le rak ki bënni useed kie' len le pseed'de. 20Jesús gudxe le':
—Lau'i lau ka' chi be'a diidza lau'ke yugute'ke bënni yëdz'lyu; chi pseedi'tikz'da lu yu'u useed len lu gdou', ga tudzaage bënni Judea; tibi diidza rui'da baga'chi'z. 21¿Bixhkia' rnaab'du neda? Bnaabi'kde bënni chi gulayëën'de neda len leke lagixhjë'ke bixh diidza be'leen'ka'ne. Leke nëëzi'kde bixh diidza be'a.
22Kati Jesús gne' le ni, tue' bënni run'chi'e gdou' gdape'e xage'e, gudxe Le':
—¿Naru ka rala ubi'u diidza kie' pxuuz blou?
23Jesús bubi'e kie' diidza:
—Xhki gnia' le ku nak, gdixhji'i neda bixh gnia'; len xhki le gnia' nak dxia'a, ¿Bixhkia' rgapu'u neda?
24Ka naaga'ze ka' Jesús, Anás psë'le'e Le' lau'e Caifás, le' pxuuz blou.
Pedro yubl ti rzi'lu'ne'e ki numbe'e Jesús
(Mt 26:71-75; Mr 14:69-72; Lc 22:58-62)
25Tzal'za, Pedro ni ze' rutze'i'de kuine ra gi'a. Gulunaab'de Le':
—¿Naru keg bënni useed kie' Bënni'a, naku li'?
Pedro ti gxhi'lu'ne'e numbe'e Jesús, gne':
—Ën'ën', Ti naka.
26Chi nak ka bnaab'de le' tue' bënni wendxin kie' pxuuz blou, bënni bë'che'e bënni'a Pedro pchuuge naage:
—¿Naru keg li'a ble'i'da dzaagu'ne lu layeel'a?
27Yubl ka' Pedro ti gxhi'lu'ne'e ki numbe'e Jesús, na'teez grëëdx'ba xi'in'druuz.
Jesús rdxiine lau'e Pilato
(Mt 27:1-2,11-14; Mr 15:1-5; Lc 23:1-5)
28Guluche'ke Jesús liidxe Caifás, yulau'i kie' bënni rnabe'e Roma. Koma chi za reni, bënni Judea ti gulayaazie yulau'i'a, koma xhki na'a ulagitzje xhba ki le naleeb'kde tuune kati tupa'a kuin'ke, ati ti gunn la'we xhtzë' ki Pascua. 29Lena'a Pilato brooje ki gui'leene leke diidza. Gudxe leke:
—¿Bixh xhgia' rdxia'li'ne bënni ni?
30—Nar'la bënni ni tibi xhgia' dxie' —gulubi'ke kie' diidza— ti gdëëd'tu'ne lu no'u.
31Pilato gudxe leke:
—Guluche'e lbi'ili, guluchuug'be' kie' ka rna' xhba kieeli.
San bënni tunabe'ke bënni Judea gulubi'ke diidza:
Netu bënni Judea ti nap'tu lsenz nu gdëëdi'tu.
32Ki yajtzaag ka'teez gudxe leke Jesús ki nakxh rala gatie'. 33Pilato buaazie yulau'i bliidze Jesús len bnaab'de Le':
—¿Ati li' naku Bënni Rnabe' kieke bënni Judea?
34Jesús gudxe le':
—¿Ati le rak'z kiu' rnaabu u rnaabu koma bënni yubl gulagixhji'de li' kia'?
35Pilato bubi'e kie' diidza:
—¿Naru rle'i'du bënni Judea neda? Bënni laadzu len bënni tunabe'i'de pxuuz guludëëde Li' lu na'a. ¿Bixh beenu?
36Jesús bubi'e diidza:
—Yëla rnabe' kia' ti nak ki yëdz'lyu ni. Nar'la ka', ulakua'ke bënni luune kia' dxin len ladil'e ulaaz kia' naar ti ludëëde neda lu naa'ke bënni Judea. San yëla rnabe' kia' ti nak ki ni.
37Na' Pilato bnaab'de Le':
—¿Ati Li' naku Bënni Rnabe'?
Jesús bubi'e kie' diidza:
—Li' buudx gnou': naka Bënni rnabe'. Neda guulja len biida yëdz'lyu naar kixhjë'a le nak li. Len yugute'ke bënni nakik'de ki yëla li, tuzenaage neda.
38Pilato gudxe Le':
—¿Ati bixha yëla li?
Tuchuug'be'e ki gatie' Jesús
(Mt 27:15-31; Mr 15:6-20; Lc 23:13-25)
Buudx bnaabe le ni, Pilato yubl brooje yaje'leene diidza bënni Judea, gudxe leke:
—Tibi xhgia' rudzëël'da nuune bënni ni. 39San lbi'ili chi naleebi'li rsaana'ne tue' bënni yu'e liidx'gia tzal yu'u lni ki Pascua: ¿Re'eni'li ksaana'ne Bënni Rnabe' kieke bënni Judea?
40Yugute'ke guluskua'ke yubl:
—¡Ti ksaanu'ne bënni'a! ¡Psaane Barrabás!
Len Barrabás nake tue' bënni rlatje yu'u.
Valgt i Øjeblikket:
Juan 18: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC
