Juan 19
19
1Pilato gde'le'e Jesús len gnabe'i'de lagiine Le'. 2Bënni rajake gdil gluune tu breegi yëtzi, guludxie' ikje Jesús len guluxua'ke kuudze'e tu laari gach le zaki'i'tzki. 3Chi nak ka gulabiige'e ga zue' Jesús, gulanake:
—¡Xhën'te nake Bënni Rnabe' kieke bënni Judea!
Len taga'pa'ke xage'e.
4Pilato yubl brooje, len gudxe leke:
—Guluyu'tzka, ni nuche'a'ne, naar gak'be'i'li ki tibi xhgia' budzëël'da nuune.
5Jesús brooje dxia ikje breegi yëtzi'a len nakue' laari gach'da. Pilato gne':
—¡Ni zue' bënni ni!
6Kati bënni tunabe'i'de pxuuz len bënni tun'chi'ke gdou' gulale'i'de Le', gulazulau'ke tuskua'ke:
¡Bde'e lu yaag kruuz! ¡Bde'e lu yaag kruuz!
Pilato gudxe leke:
Guluche'e lbi'ili len gulude'e lu yaag kruuz, koma neda tibi xhgia' budzëël'da nuune.
7Bënni tunabe'i'de bënni Judea, gulubi'ke kie' diidza:
—Netu de xhba kietu, len lu xhba kietu rna ki rala gatie', koma bdëëde kuine ka Xi'ine Dios.
8Kati Pilato byëën'de le ni guudxi'rde. 9Yubl buaazie yulau'i len bnaab'de Jesús:
—¿Gaxh bënni Li'?
Ati Jesús tibi diidza bubi'e kie'. 10Pilato gudxe Le':
—¿Naru ti ubi'u kia' diidza? ¿Naru ti nëëz'du ki napa yëla rnabe' gda'a Li' lu yaag kruuz, len lekz'ka' napa yëla rnabe' ksaana Li'?
11Na' Jesús bubi'e diidza:
—Tibi yëla rnabe' napu kia', nar'la Dios ti nunne lsenz; lena'a bënni'a bdëëde neda lu no'u dxia're xhgia' ka li'.
12Na'teez, Pilato rgiilje nakxh gunn ksaane Jesús; san bënni Judea guluskua'ke:
—¡Xhki li' ksaanu'ne ti rdzaagu'ne dxia'a bënni rnabe'e yëdz'lyu ni! ¡Nu'ti'teez bënni, bënni ruune kuine bënni rnabe', ti rle'i'de dxia'a bënni rnabe'e yëdz'lyu ni!
13Kati Pilato byëën'de le ni gliije Jesús len chi nak ka grë'e yulau'i, latj ga gxhi' lei' Gabatá lu diidza Hebreo, le ni re'e'ni gna Empedrado. 14Nak dza'a tupa'a'ke kieke ki kie'la lni ki Pascua, gdu lau'i dza'a Pilato gudxe bënni Judea:
—¡Na' zue' bënni rnabe' kieeli!
15San leke guluskua'ke:
¡Gyaaj'leene ki'il! ¡Gyaaj'leene ki'il! ¡Bde'e lu yaag kruuz!
Pilato bnaab'de leke:
—¿Naru uda'ane lu yaag kruuz bënni rnabe'i'de lbi'ili?
Len bënni tunabe'i'de pxuuz gulubi'ke diidza:
—¡Tuuze bënni rnabe'i'de netu zue', bënni rnabe'e yëdz'lyu!
16Na' Pilato bdëëde Jesús lu naa'ke naar luda'ke Le' lu yaag kruuz len leke guluche'e Le'.
Tude'e Jesús lu yaag kruuz
(Mt 27:32-44; Mr 15:21-32; Lc 23:26-43)
17Jesús brooje nue'e yaag kruuz kie' naar tziije latj nazi' lei' «Dxit Ikji bunach» (lu diidza Hebreo nazi' lei' Gólgota). 18Na' gulude'e Le' lu yaag kruuz, len kuiti le'e gulude'e ye chope' bënni, Le' bga'ane gatzj'lau'i. 19Pilato bzooje lu blaag diidza le rna ki: «Jesús bënni Nazaret, Bënni Rnabe' kieke bënni Judea», len gnabe'e luga'la'ke ikji kruuz'a. 20Bënni zian bënni Judea glul'e lea nayoj'a koma latj ga guluda'ke Jesús lu yaag kruuz ga'la'z ra yëdz de, len lea nayoj'a, nayoj lu diidza hebreo, latín len griego. 21Lena'a bënni tunabe'i'de pxuuz ki Judea gle'ke Pilato.
—Ti gzooju: “Bënni Rnabe' kieke bënni Judea”, bzoj: “Bënni rne' ki nake Bënni Rnabe' kieke bënni Judea”.
22Ati Pilato bubi'e kieke diidza:
—Ka chi nuzooja'a, ka jka'ana ley.
23Bënni rajake gdil buudx gulude'e Jesús lu yaag kruuz, guluzi'e xhe' gulabiije ley tap'l len gulagis'ke tu ueaj kieke. Lekz'ka' gulazi'e laari'a rakue' lau'il xhe' san tibi diá ki sua, tuuz laari nak, 24bënni rajake gdil gle' lza'a'ke:
—Ti kchëëza'ru ley, jkitj'ru le gunn'be' nuul'ru gala'ru laari'a.
Naar yajtzaag ka nayoj lu Diidza La'ay: «Gulula'a'ke xha' len gulukitj'ke le gunn'be' nuxh'lke la'la'ke laari'a rakua' lau'il xha'.» Ki gluune bënni rajake gdil.
25Kuiti yaag Kruuz'a zeenu xhne'e Jesús len nguul xhiil'nu, María nguul kie' Cleofás len María Magdalena. 26Kati Jesús ble'i'de'nu xhne'e, len kuiti le'e'nu ze' bënni useed kie' bënni'a nadxi'i'tzki'de, gudxe'nu xhne'e:
—Nguul, na' zue' bënni xi'inu.
27Chi nak ka gudxe bënni useed kie':
—Na' zuaanu xhno'u.
Na'teez bënni useed ni gxhi'e'nu liidxe.
Jesús ratie'
(Mt 27:45-56; Mr 15:33-41; Lc 23:44-49)
28Gdëëd le ni, Jesús nëëz'de ki yugute' chi glak, len naar gza'a le rna' Diidza La'ay: gne':
—Rbiidxa.
29Na' zua tu yu'su yuudz nup uva zi. Guluspise tu laari lu nup uva, gluuge'e ley lu tu xhuuza'ne'i hisopo len guluze'ke ley rue'e. 30Jesús gui'e nup uva zi len gne':
—Yugute' chi bza'a.
Chi nak ka bzechu ikje len gutie'.
Tune'e gia'tuchi kuiti le'e Jesús
31Nak dza'a tupa'a'ke kieke ki kie'la lni ki Pascua, ati bënni Judea ti te'en'de ki bënni nat'a laga'ane lu yaag kruuz dza tu'ueak'laadxi'ke bënni Judea koma le'te dza'a ni nak'tzka blou. Lena'a gulunaab'de Pilato ki gnabe'e lagitzje ni'a'ke bënni'a gulada'ke lu yaag kruuz len luzëtje leke. 32Bënni rajake gdil yajake len gulagitzje ni'a'ke bënni'a guluda'ke lu yaag kruuz kuiti le'e Jesús. 33San kati gulabiige'e kuiti le'e Jesús, gulak'be'i'de ki chi natie'. Lena'a tir gulagitzje ni'e.
34San tue' kieke bënni'a rajake gdil bne'e kuiti le'e Jesús tu gia'tuchi len na'teez broj rën len nis. 35Bënni rlaabe le ni ble'i'de ley len ti rzi'ye'e; le' nëëz'de ki ti rzi'ye'e naar lekz'ka' lbi'ili tzajle'li. 36Koma le ni glakgak naar yajtzaag le rna' Diidza La'ay: «Gat'ga zua dxit kie' lagitzje.» 37Len ga yubl Diidza La'ay rna': «Ulale'i'de bënni'a gulune'e gia'tuchi kuiti le'e.»
Tuka'che'e Jesús
(Mt 27:57-61; Mr 15:42-47; Lc 23:50-56)
38Gdëëd le ni, José bënni Arimatea, bnaab'de lsenz Pilato naar ue'e Jesús. José nake bënni useed kie' Jesús baga'chi'z, koma raadxi'de bënni tunabe'ke Judea. Pilato bnëëdzje lsenz kie' José, ati le' bue'e Jesús. 39Lekz'ka' Nicodemo, bënni'a yaje'leene diidza Jesús chi'dzë'ël, bdxiine nue'e ka tu'gayua' gia le rla' xhixh, nuchixhi'de mirra len áloe. 40Na' José len Nicodemo guluzi'e Jesús len guluchël'de Le' laari le rla' xhixh, ka naleeb'kde tuune bënni Judea kati tuka'che'e bënni nat kieke. 41Latj ga gulude'e Jesús lu yaag kruuz zua' tu layeel len lu layeel ni zua tu ba kub ga nutunu tagui'i'de. 42Na' gulagu'e Jesús, koma baa zua ga'la ati chi zua sulau dza tu'ueak'laadxi'ke bënni Judea.
Valgt i Øjeblikket:
Juan 19: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC
