Juan 20
20
Nutunu yu'u lu ba
(Mt 28:1-10; Mr 16:1-8; Lc 24:1-12)
1Bayën ziil kati rugie'la' seman kati ni na'chul, María Magdalena gyaj'nu lu ba, len ble'i'nu na'dua giaj'a nusiaj baa. 2Na' rxiti'znu zuwaj'nu ga zue' Simón Pedro len ye tue' bënni useed kie' Jesús, bënni'a nadxi'i'tzki'de, len guudx'nu'ne:
—¡Nua'ke Xan'ru, len ti nëëzi'tu gaxh nagu'u'ke Le'!
3Pedro len ye tue' bënni useed kie' Jesús gularooje len yajake lu baa. 4Tuuz zjake; san bënni'a ye tue' pxiti're ka Pedro len zia'a le' bdxiine lu baa. 5Gyechue' bdun'lau'e len ble'i'de laari'a bdul'de, san ti gyaazie. 6Kuudze'e bdxiine Simón Pedro ati gyaazie lu baa, lekz'ka' le' ble'i'de laari'a; 7Ati lekz'ka' ble'i'de ki laari'a guluchël'de ikje ti de kuiti laari'a, nuduub len xhua ga yubl. 8Na' gyaazie ye tue' bënni useed'a, bënni'a bdxiine zia'al lu baa, len ble'i'de lea guk ati gyajle'e. 9Koma ti rajni'ni'kde le rna' Diidza La'ay, ki Le' rala ubaane lu yëla gut. 10Chi nak ka' bënni useed kie' Jesús zawake liidx'ke.
Jesús rlui'lau'e len María
(Mr 16:9-11)
11María bga'an'nu rayu'ul rbëëdx'nu, kuiti baa. Ka rbëëdx'nu ka' gyechu'nu bdun'lau'nu le'il, 12ati ble'i'nu'ne chope' gbaaz la'ay naku'ke laari xhkich, tue' rë'e ikji'l len ye tue' rë'e xhni'il ga gute'e Jesús. 13Gbaaz la'ay ni gulunaab'de'nu:
—Nguul, ¿Bixhkia' rbëëdxu?
Leenu guudx'nu'ne:
—Koma nua'ke Le' Xaana, len ti nëëz'da gaxh nagu'u'ke Le'.
14Buudx'z gnaanu ka', bueikj'nu len ble'i'nu'ne Jesús san ti nëëzi'nu ki le'a. 15Jesús bnaab'de'nu:
—Nguul, ¿Bixhkia' rbëëdxu? ¿Nuxh rugiilju?
Leenu guki'nu ki bënni'a run'chi'e layeel'a, len guudx'nu'ne:
—Bënni, xhki li' nu'u'ne, guudx neda gaxh nagu'u'ne, naar tzajdiilja'ne.
16Na' Jesús gudxe'nu:
—¡María!
Leenu bueikj'nu len lu diidza hebreo guudx'nu'ne:
—¡Rabuni! (Le ni re'e'ni gna': «Bënni Useed»).
17Jesús gudxe'nu:
—Ti sëënu neda, koma ti rajdzaag'da'ne Xuuza. San gyaj len guudx'ke bënni bë'cha'a ki ziija zajdzaaga'ne nu nak Xuuza len lekz'ka' nake Xuuz'li, Dios kia' len lekz'ka' Dios kieeli.
18Na' María Magdalena yajlaab'nu kieke bënni useed kie' Jesús ki ble'i'nu'ne len gdixhjik'nu'ne le gudxe'nu.
Jesús blui'lau'e len bënni useed kie'
(Mt 28:16-20; Mr 16:14-18; Lc 24:36-49)
19Chi'dzë'ël'a ki dza'a kati rugie'la' seman, bënni useed kie' Jesús nudzaag'ke len nusiaj'ke puert koma taadx'de bënni tunabe'ke Judea. Jesús gyaazie len gze' gatzj'lau'i kieke bënni useed kie', bliidz'tzawi'e leke, gne':
—¡Yëla rë'dxi sua len lbi'ili!
20Buudx gne' ki, blui'de leke ne'e len kuiti le'e. Ati leke guludziij'de gulale'i'de Xan'ru. 21Chi nak ka Jesús yubl gudxe leke:
¡Yëla rë'dxi sua len lbi'ili! Ka psë'le'e neda Xuuz'ru, ka' neda rsë'la'a lbi'ili.
22Bluube leke, len gudxe leke:
Gulsi'e Bë' La'ay kie' Dios. 23Bënni si'xhëën'li xhtu'la'ke, ulazi'ke yëla rzi'xhën; len Bënni ti si'xhëën'li xhtu'la'ke, ti lazi'ke yëla rzi'xhën.
Tomás rle'i'de Jesús nubaane lu yëla gut
24Tomás, tue' bënni useed kie' Jesús, bënni'a te'ke le' Bënni Kuach, ti zue' len leke kati bdxiine Jesús. 25Gdëëd'a Bënni useed kie' Jesús gle'ke le'.
—Ble'i'tu'ne Xan'ru.
Ati Tomás bubi'e kieke diidza:
—Xhki ti gle'i'da ne'e dxia we' ki bdiidj len ti gne'a xhbënni'na'a le'i len xhki ti gne'a na'a kuiti le'e, ti tzajle'a.
26Gdëëd xuunu dza, yubl nudzaag'ke bënni useed kie' Jesús lu tu yu'u ati na' zue' lekz'ka' Tomás. Zala nusiaj'ke puert'a Jesús gyaazie, gze' gatzj'lau'i len bliidz'tzawi'e leke, gne':
—¡Yëla rë'dxi sua len lbi'ili!
27Chi nak ka gudxe Tomás:
—Bne' ni xhbënni'no'u len byu' na'a; benn no'u len bne' ley kuiti le'a. ¡Gyajle'! tir guuni'z li'.
28Na' Tomás gne':
—¡Xaana len Dios kia'!
29Jesús gudxe le':
—¿Gyajle'u koma ble'i'du neda? ¡Bixhgaba'ke bënni tayajle'ke zala ti gulale'i'de!
Bixhkia' byoj Gich La'ay ni
30Le zian le runn'be' yëla wak beene Jesús lau'ke bënni useed kie', le ni ti nayoj'k lu Gich ni. 31San le ni nayoj'k naar lbi'ili tzajle'li ki Jesús nake Le' Cristo, Xi'ine Dios, len na' tzajle'li gap'li yëla naban lu ne'e Le'.
Valgt i Øjeblikket:
Juan 20: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC
