Matfei 11
11
KEN ON IISUS? 11-12
Iivan Ristijän kyzymys Iisusale
(Luk. 7:18-23)
1Konzu Iisus andoi kahteletostu opastujale kai nämä n՚evvot, Häi lähti sen lohkon toizih linnoih opastamah da sanelemah. 2Konzu Iivan Ristii tyrmäs olles kuuli Iisusan ruadolois, häi työndi Hänen luo omii opastujii 3kyzymäh: «Oletgo Sinä se, kudamal pidäy tulla, vai pidäy meil vie vuottua tostu?» 4Iisus vastai heile: «Mengiä da sanelkua Iivanale, midä kuuletto da näittö:
5– Sogiet nähtäh,
rammat kävelläh,
prokuazal voimattomat puhtastutah,
kuurnehet kuultah,
kuolluot nostah,
köyhät kuultah hyvä viesti.
6Ozakas on se, ken ei hairehtu uskos minuh.»
Iisus sanelou Iivan Ristijäh näh
(Luk. 7:24-35)
7Konzu Iivan Ristijän opastujat lähtiettih, Iisus rubei sanelemah rahvahale Iivanah näh: «Midäbo kaččomah työ kävyittö elämättömäh muah? Kortehtugo, kudamua tuuli lekuttau? 8Vai midä kaččomah työ kävyittö? Toinah miesty ylen čomis sovis? Suariloin linnois työ lövvättö niilöi, ket muga sellitäh! 9Midäbo sit kaččomah kävyittö? Jumalan iänenkandajuago? Juuri sidä, i minä sanon teile: häi on suurembi ku iänenkandai. 10Häi on se, kudamah näh on sanottu Pyhis Kirjutuksis:
– Minä työnnän viestinvedäjän iel Sinuu, häi avuau Sinule dorogan.
11Toven sanon teile: ei ole naizen suaduloin keskes suurembua ku Iivan Ristii, no vähävägizin Taivahallizen vallas eläjis on suurembi händy. 12Iivan Ristijän päivis algajen nämih päivih suate Taivahallizen valdua vastah toratah, i vägivallan luadijat ylen äijäl tahtotah suaja sen omih käzih. 13Kai Jumalan iänenkandajat da Moisein Zakon Iivanah suate ennustettih täh valdah näh, 14i uskokkua libo älgiä, juuri Iivan on se Il՚l՚u, kudamal pidi tulla muailmah. 15Kel on korvat, se kuulkah! 16Mittuine sit on tämän polven rahvas? Hyö ollah ku pihal istujat lapset, kudamat kirrutah toine toizele: 17‘Myö soitimmo teile pillil, no työ etto pläššinyh, myö luvettelimmo itkuvirzilöi, työ etto itkenyh.’ 18Iivan tuli, häi eigo syö, eigo juo, a rahvas sanotah: ‘Hänes on karu.’ 19Ristikanzan Poigu tuli, Häi syöy da juou, i rahvas sanotah: ‘Mittuine syömäri da juomari, maksuloinkeriäjien da muijien riähkähizien dovariššu!’ No Mielevyön ozutetah oigiekse sen ruavot!»
Iisus soimuau Galilein linnoi
(Luk. 10:13-15)
20Sit Iisus rubei soimuamah niilöi Galilein linnoi, kudamis Häi oli luadinuh enimät omis suuris ruadolois, gu net ei hyllätty riähkii da ei kiännytty Jumalan puoleh: 21«Paha rodieu sinule, Horazin! Paha rodieu sinule, Vifsaidu! Ku net suuret ruavot, kudamat oli luajittu teijän pihoil, ollus luajittu Tiiras da Sidonas, sit niilöin rahvas ribusovis da tuhkua piäle huškuttajen jo ammui hyllätännys riähkät da kiännytännys Jumalan puoleh. 22Minä sanon teile: Tiiru da Sidon suudopäivänny piästäh hoivembal ku työ. 23I sinä, Kapernaumu, nostetahgo sinuu taivahah? Alah sortah sinuu, alah uaduh! Ku sinun pihoil luajitut suuret ruavot ollus luajittu Sodomas, se olis pystyi vie tänäpäigi. 24Minä sanon teile: Sodoman mua piäzöy suudopäivänny hoivembal ku sinä.»
Tulgua minun luo da huogavukkua
(Luk. 10:21-22)
25Sih aigah Iisus sanoi nenga: «Minä ylendän Sinuu, Tuatto, taivahan da muan Ižändy, ku piit nämä dielot peitos mielevis da opastunnuzis, a avait net lapsen mielele. 26Moine oli, Tuatto, Sinun hyvä tahto. 27Minun Tuatto on andanuh kai minun valdah. Poigua ei tunne niken, vai Tuatto, eigo Tuattua tunne niken, vai Poigu da se, kelle Poigu tahtou avata Händy. 28Tulgua minun luo kaikin ruavol vaivatut da kel on jygei takku kannettavannu. Minä annan teile huogavuo. 29Otakkua minun takku omile hardieloile da opastukkua minus: minä olen hyväsydämelline da sanankuulii. Muga työ suatto hengele hoivua. 30Minun kandamustu on hyvä kandua, minun takku on kebjei.»
Valgt i Øjeblikket:
Matfei 11: LIVVI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
(c) Biblienkiännändyinstituuttu, Helsinki 2003