San Marcos 16
16
Ndi̱taku Jesús
(Mt. 28:1-10; Lc. 24:1-12; Jn. 20:1-10)
1Tá ndi̱yaꞌa kivi ndíkundee na ta sa̱ta yá María Magdalena xiꞌin yá Salomé xiꞌin yá María siꞌí ra Jacobo, sa̱ta ná nduta tami xáꞌan kuaꞌan xiꞌin ná ndiyakun ná ikin kuñu Jesús. 2Ta naꞌa ni kivi núnu̱ú xaꞌa semana, kivi domingo, sikan vaxi kéta ñu̱ꞌù, kuaꞌan ná nuu ndi̱nduxin Jesús. 3Saa káꞌan ná xiꞌin taꞌan ná káchi ná saa:
―Ta vitin, ¿unku na chindee yoo sitaꞌa na yu̱ú ya ndási yuꞌu kava nuu ndi̱nduxin ra? ―káchi ná.
4Saa tá ndi̱koto ná ta xa ku̱taꞌa yu̱ú chee ni ikán. 5Ñaa ndi̱kiꞌvi ná ini kava, ta xi̱ni ná iin ra kuǎán índuꞌu ra ñaꞌñu kuáꞌá kava ikán, yaa ka vi toto ndíxi ra, ta kani vaꞌa ya, saa ndi̱ndiꞌvi ni ná. 6Ta saa ndi̱kaꞌan ra xiꞌin ná, káchi ra saa:
―Ku ïꞌvi ndo, chi Jesús ra Nazaret, ra ti̱kaa na ndaꞌa cruzin, ta köo ka ra yóꞌó, xa ndi̱taku va ra. Koto ndo nuu xi̱nduꞌu ra, köo ka ra. 7Kuáꞌan ndo kaꞌan ndo xiꞌin ra Pedro tin inka nda xi̱taꞌan xiꞌin Jesús, kachi ndo soꞌva: “Xa ínuu Jesús kuaꞌan ra nuu ndo chí Galilea, ta kuáꞌan ndo chikan ndikitaꞌan ndo xiꞌin ra, tá íyo ya ndi̱kaꞌan ra xiꞌin ndo, che”, kachi ndo xiꞌin nda ―káchi ra kuǎán ikán xiꞌin ná.
8Saa ka̱na koo ná kuaꞌan ná, ndá kísi ni̱nù yá ná kuaꞌan ná, chi ndi̱ndiꞌvi ni ná, ta nda iin naꞌa köo ndi̱kaꞌan ná xiꞌin xaꞌa ya íꞌvi ná.
Ndi̱tuvi Jesús nuu yá María Magdalena
(Jn. 20:11-18)
9Tá ndi̱taku Jesús kivi núnu̱ú xaꞌa semana, xitaan kivi domingo ta xiꞌna nuu yá María Magdalena ndi̱tuvi ra, yá ta̱va ra uxa tachi nduvaꞌa tá yachi. 10Saa ke̱e yá kuaꞌan yá ndituꞌun yá xiꞌin nda xi̱taꞌan xiꞌin ra ya ndi̱taku ra, ta ndi̱taꞌan yá nda ndóo nda xáku nda, saa kúsuchi ni ini nda. 11Ñaa ndi̱kaꞌan yá xiꞌin nda ya xi̱ni yá Jesús ndi̱taku ra, ta köo ndi̱xiin nda kandixa ñaꞌa nda.
Ndi̱tuvi Jesús nuu uvi nda xi̱taꞌan xiꞌin ra
(Lc. 24:13-35)
12Ndi̱tuvi Jesús nuu uvi nda xi̱taꞌan xiꞌin ra, kuaꞌan nda iku ta ikán ndi̱tuvi ra nuu nda, ta síin náꞌa ra ndi̱tuvi ra. 13Saa ke̱e nda ndi̱xaꞌan nda ndi̱tuꞌun nda xiꞌin nda taꞌan nda, ta köo ndi̱kandixa tuku ñaꞌa nda.
Ta̱xi Jesús chiñu ndaꞌa nda ítaꞌan xiꞌin ra
(Mt. 28:16-20; Lc. 24:36-49; Jn. 20:19-23)
14Tá sindiꞌi ta ndi̱tuvi ra nuu uxi iin saa nda, tá ndóo nda xíxi nda nuu mesa. Ta saa ndi̱ndaꞌi ra xiꞌin nda xaꞌa ya tuun nima nda, ya köo ndi̱xiin nda kandixa nda ya ndi̱kaꞌan na taꞌan nda xiꞌin nda ya ndi̱taku ra. 15Saa ndi̱kaꞌan ra xiꞌin nda, káchi ra saa:
―Kuáꞌan ndo ndiꞌi ni kúu xaꞌa ñuu ivi, ta kaꞌan ndoso ndo tuꞌun vaꞌa xaꞌa i xiꞌin ndiꞌi ni kúu naꞌa. 16Ndiꞌi na kándixa yeꞌe ta chíchi na, na ikán ku na kaku, sundi na köo xíin kandixa yeꞌe ta kuvi na niꞌi na tindoꞌo. 17Ta ya yóꞌó ku seña yatuꞌun taxi i koo xiꞌin na kándixa yeꞌe: Kuniñuꞌu na ndee i xiꞌin kivi i ya tava na tachi nduvaꞌa, ta saa kaꞌan na inka nuu tuꞌun xa̱á ya köo ndi̱sikuaꞌa na. 18Tá tu ná tiin na ko̱ó kueꞌe, ta tïin ri na, tá tu ná koꞌo sana na ndá ka ñaꞌa ñúꞌu tatan xatu xiꞌin, ta sïkuaꞌa ya kueꞌe xiꞌin na, ta chinuu ndaꞌa na sata na kúꞌvi, ta nduvaꞌa na ―káchi Jesús xiꞌin nda ítaꞌan xiꞌin ra.
Jesús kuandaa ra kuaꞌan ra nuu ndivi
(Lc. 24:50-53)
19Tá sindiꞌi Tata yo Jesús ndi̱kaꞌan ra xiꞌin nda, saa ndi̱ko koo ra kuaꞌan ra nuu ndivi i̱kan Ndioxi, ta ndi̱kunduꞌu ra ñaꞌñu kuáꞌá Ndioxi.
20Saa ka̱na koo nda xi̱taꞌan xiꞌin Jesús xa̱á nda káꞌan ndoso nda tuꞌun vaꞌa ndá kuꞌva sikaku Ndioxi naꞌa. Ndiꞌi ni kúu ñaꞌñu xíka nda káꞌan ndoso nda tuꞌun ra. Ta íyo Tata yo chíndee ra nda, táxi ra íkan nda yatuꞌun nuu naꞌa. Tixin ya yóꞌó sínaꞌa Ndioxi naꞌa ya ndixa ku tuꞌun ra ya ndíkani nda. Saa ná koo.
Valgt i Øjeblikket:
San Marcos 16: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.