Oknayene Ibo 15
15
God ye Abraham ka kaima di te paduglkwa
1Ana okuo Abram kor moglko, ye ogumuglomugl eruko, Yawe ka ta dugo, prukwa. Yawe yegl dugwa, Abram yo, ene kudugl goglkro! Na awaglenen mere yegl moglsre, ene kugl bogl te moglka. Te moglsre, na ama ene kana duglo boglnga pre ere wakai ere tenaluwe di, yegl dugwa. 2-3Dugo, Abram di ikne ede, yegl dugwa, Yagl Kade Yawe yo, ene siragl mere ere wakai ere naratne? Na gak ta natngo, kuglkrika. Yegl pre na goglbo, na nigl kogona yagl ta Elieser we digwa, taun Damaskus nem moglkwa i, ye taraglnana idre, againa inabuka pamiwe di, yegl dugwa.
4Abram yegl dugo, Yawe aglke kor ka ta Abram di te, yegl dugwa, Ene nigl kogonen yagl i, taraglnen ya againen ta ikrabuka. Enene gak ta kuratnga. Yegl pre ene gogln, ene wan ye taraglnen idre, againen inabiwe dugwa. 5Didre, ye Abram auro i pi meda edidre, yegl dugwa, Ene kan kamun mitna ibo edo. Kugl kuri kerenatnga kuno erabo? Keranatnga kuno erekrabere yoba ene gawanma kerenaiglkwa ama kuno erekrabiwe dugwa. 6Dugo, Abram ye Yawe pre meduglkwa. Pre meduglko, Yawe ye Abram pre meduglkwa kandre, yoba du kaima moglmedi kanugwa. 7Kandre, yegl dugwa, Na Yawe moglka. Ene taun Ur, dumo Kaldia suna yogwa motnga igne, na ene auro i ede u dumo Kenan, magigl i makan ene tenagledi ediga. Ene dumo Kenan inatniwe dugwa. 8Dugo, Abram di ikne ede, yegl dugwa, Yagl Kade Yawe yo, ene siragl mere etn, na kandre, dumo makan magigl i ka kaima na inaglka pamedi pragle? di, yegl di prukwa. 9Abram yegl di prukwa pre Yawe ere mogl, yegl dugwa, Ene ede pi kau abai ta bugla yugu suota moglkwa idre, meme abai ta bugla yugu suota moglkwa idre, sipsip kumugl ta bugla yugu suota moglkwa ama idre, yuo! Te, kua yumugl kruo ta idre, kua yumugl gagigle ta idre, yuo! dugwa.
10Ana Abram taragl i mudu yu Yawe moglmara edidre, si goglkwa. Kau ya meme ya sipsip ikra suna wom si paka didre, koglo bage ta epigl sidre, koglo bage ta epigl sidre, erukwa. Ersre, kua suo i, si paka dikre, ta koglo yei, ta koglo yei, erukwa. 11Taragl i epigl sugo, kua kigla tau mie nenamnedi pru di ede atne u, akigwa ba Abram si pi eglke edugwa.
12Ana min paugwa, ade beinagledi eruko, Abram ugl du paugwa. Ugl du paugo, ogumuglomugl eruko, mim podo erukwa kanugwa. Kandre, ye kudugl podo goglkwa. 13Kudugl podo goglko, Yawe ye Abram yegl di togwa, Na ka ta di tebo, ene pre pogl sinatnga. Ene gawanma okuo ede kantri ta yoba pere makano yenabara pi moraiglkwa. Meglbi, makan nem ene gawanma ye nigl kogono yoba moraiglmedi si kane sidre, mabuno kide ere tedre, bugla yugu 400 mabuno yegl mere eraiglkwa. 14Yegl eribi, ene gawanma ye makan nem nigl kogono ere tenaiglkwa. Yegl eraiglkwa ba na ere mogl, makan nem ye yubun podo tebo, ene gawanma bonagana mere idre, dumo i kide kodidre, ede enaiglkwa. 15Ba ene we, ene moratnara kiede mogl, kanana moratnga. Moglsre, ene kidagl yei, gogln, yoba ene maugl sinaiglkwa. 16Te, ene gawanma ede kantri pere ta enaiglkwa i, tabre ta ede ikne ukraiglkwa. Ye pi meglbi, ene gawanma i, ye gawanoma okuo yugobuno namba 4 mina moraiglkwa i, ede ikne unaiglkwa. Amor yoba magigl meglkwa i, ye mabunono kide u podo pikrukwa. Ye mabunonono kide u podo enan, ene gawanma ede ikne u, makanono inaiglmiwe di, yegl dugwa.
17Ana ade beigo, mim podo erukwa. Mim podo eruko, Abram taragl suo kanugwa. Ta makan koglwa sin yogwa. Sin mina atne doga dogo, ede inge ede kuglo ogwa. Te, taragl ta kanugwa i, ken ta gaiglkwa, dogo, kanugwa. Taragl suo i, Abram taragl tau si gogl, epigl yomara suna ebriko, kanugwa. 18Ana igne i Yawe ye Abram ka kaima di te padigl, yegl dugwa, Na makan magigl i mudu ene gawanma tenagledi kaur si kodiga. Gabano numa ikne nigl kebra Isip bina omara i panan, numa ikne nigl podo Yufretis we dimara panabuka. 19Ene gawanma Kin yoba makano ya Kenas yoba makano ya Katmon yoba makano inaiglkwa. 20Te, Hit yoba makano ya Peres yoba makano ya Refaim yoba makano inaiglkwa. 21Te, Amor yoba makano ya Kenan yoba makano ya Girgas yoba makano ya Jebus yoba makano inaiglmiwe di, yegl dugwa.
Valgt i Øjeblikket:
Oknayene Ibo 15: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission