Oknayene Ibo 16
16
Abraham ye Hagar yugwa
1Ana Abram ebie Sarai ye gak ta kuglkrukwa, ba ye nigl kogonmo abai ta moglkwa, kagie Hagar we digwa. Hagar ye dumo Isip mam moglkwa. 2-3Ana Abram ya Sarai bugla yugu 10-pela dumo makan kade Kenan suna i miurko, Sarai ye gak ta kuglkrukwa. Yegl pre ye ere mogl, wie Abram yegl di togwa, Ene pro. Yawe na temne panatnedi erukwa pre gak ta kuglkrika. Yegl pre ene na nigl kogona abai moglkwa i inatnga. In, bogl swara pabr, ye gak ta kuran, gak i nana inagle di, yegl dugwa. Yegl dugo, Abram ye kamo prisre, pra we dugwa. Pra we dugo, ye ebie Sarai ere mogl, nigl kogonmo abai Hagar, Isip mam ikra idre, Abram ebie ta morabedi togwa. 4Togo, Abram ya Hagar bogl swara pabriko, Hagar dane paugwa.
Hagar dane paugo, ye na dana pamedi kandre, yene mogl mitna ede, abu ye sugl moglkwa i kamo prikrukwa. 5Kamo prikruko, Sarai ere mogl, Abram yegl di togwa, Hagar mabuno kide ere narukwa i, ene mabuno motnga. Nana nigl kogona abai idre, ene ebin morabedi teiga ba ye na dana pamedi kandre, yene mogl mitna ede, na kana prikrukwa. Na aglau erio mo ene aglau etno mo i pre Yawe pre yubu sinabiwe di, yegl dugwa. 6Dugo, Abram di ikne ede, yegl dugwa, Abu i, enene nigl kogonen abu moglkwa. Ene siragl mere eragledi pratnga i, ero! dugwa. Dugo, Sarai ye mabuno kide ere togo, Hagar teke ede ogwa.
7Hagar teke ede pi dumo ta Sur we dimara enagledi konbauna ogwa. Ye konbauna pi, dumo ta wau yomara pidre, nigl ta ogo beimara moglkwa. Moglko, Yawe Angelomo ye moglmara ugwa. 8Ye moglmara udre, ye yegl dugwa, Hagar yo, ene Sarai nigl kogonmo abu motnga. Ene aglo mogl unga ya te, aglo ena unga i, di naro! dugwa. Dugo, Hagar di ikne ede, yegl dugwa, Na sugl moglkwa abu Sarai, moglmara kide kodidre, teke wiwe dugwa. 9Dugo, Yawe Angelomo ere mogl, yegl dugwa, Ene ede ikne pi, ene sugl moglkwa abu moglmara moglsre, kamo duglo boglo! dugwa. 10Yegl didre, ye ama dugwa, Na ene gawanma mere kide moraiglmedi ere edenaglka. Mere kide meglbi, yoba ye kerenaiglkwa kuno erekrabiwe dugwa. 11Te, ye ama dugwa, Ene pro! Ene erme dan paugwa. Gak ta kuratnga i, yagl gak ta kuratnga. Kugln, ye kagie Ismael#16.11 Ka Hibru mina, kagie Ismael mabuno ta paugwa, prukwa mere paugwa. yei tenatnga. Ene yubun podo idre, kai etnga i, Yawe prukwa. Yegl pre gak kagie yegl yei tenatnga. 12Ye donki are mere yegl, yobuglo ersre, yoba pere kano prikre, yegl mere morabuka. Yegl moran, ye yoba mudu kuda bogl tenan, yoba i ama ye kuda bogl tenaiglkwa. Ye yoba bormai swara meglkwa ama mudu kuda bogl tenabiwe di, yegl dugwa.
13Ana Hagar ere mogl, yegl dugwa, God nana kan moglkwa. Na ama ka kaima ye kaniga pamiwe dugwa. Didre, ye ama Yawe kagie kor ta yei togwa. Kagie God na Kan Motnga yegl yei togwa. 14Ye yegl dugwa pre yoba okuo ere mogl, nigl ogo beigwa i, Bir Lahai Roi#16.14 Ka Hibru mina, nigl kagie Bir Lahai Roi, i mabuno God na Kanugwa Niglmo mere yegl paugwa. we digwa. Nigl i, dumo Kades we dimara ya Beret we dimara suna moglkwa.
15Ana Hagar ede ikne ogo, ye Abram bogl yagl gak ta kiurka. Kiurko, Abram ere mogl, kagie Ismael we dugwa. 16Abram bugla yugu 86 ne kodugwa igne, Hagar ye yagl gak Ismael kuglkwa.
Valgt i Øjeblikket:
Oknayene Ibo 16: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission