Oknayene Ibo 18
18
God Abraham di te, Sara yagl gak ta kurabe dugwa
1Ana Abraham ye yagl Mamre edemo paimara ikra kipai moglkwa. Edemo i, kagie ok we digwa. Abraham kipai moglsre, ye ege swara ta ermine, ade podo dogo, sel yugu kipamara yugu dramugl ame di moglkwa. Ame di moglko, Yawe ye moglmara u plau dugwa. 2Abraham yugu dramugl ame di moglko, yagl suota iro meglko, Abraham kan iro ede yagl suota i kanugwa. Kandre, ye muglkude pi, yagl i meglmara ogwa. Pidre, ye goglko bodugl, bre magide, guma dra makan mina edidre, 3ye yagl swara ta yegl di togwa, Yagl kade yo, na ene nigl kogonen yoba mere yegl moglka. Ene wakai pitn, na yugunamugl kuri ta akie moramga. 4Na nigl kogon yoba ta dedibo, ye nigl kogl yunan, ene kaglno nigl koraiglkwa. Kaglno nigl koglsre, ede mabunomugl bi yomara ame di moraiglkwa. 5Na bret kuri ta yuibo, ene nebi, aragan erabuka. Nebi, aragan eran, ene ede enaiglmiwa. Na ene nigl kogono yagl moglko, ene na yugunamugl wigwa pre na yegl ere tenagledi priwe dugwa. Ye yegl dugo, yagl suota di ikne ede, yegl digwa, Ana prawa, ene dinere mere yegl ero! digwa.
6Ana Abraham muglkude pi, Sara sel yugu yugugl moglmara pidre, yegl di togwa, Ene tabre flaua wakai 20 kg mere yegl idre, nokidre, bret gaglo! dugwa. 7Abraham yegl didre, ye muku di pi ye kau kuglkwa meglmara ogwa. Kau kuglkwa meglmara pidre, ye kau nagigle wakai, mie wam gigle dikrabuka mere yegl ta moglkwa idre, nigl kogonmo yoba ta togwa. Togo, nigl kogonmo yoba i tabre si kegwa. 8Si kego, dogwa igne, Abram mie wam idre, kau ame nuglo duku igwa ya sis kau ame nuglo mina bekigwa idre, yagl suota i nenaiglmedi yubu si togwa. Yubu si togo, ne meglko, Abraham ye meglmara i adigl moglsre, sugl moglkwa.
9Ana yagl suota ikra ere mogl, Abraham yegl di prikwa, Ene ebin kidagl Sara aglo moglme? digwa. Digo, ye di ikne ede, Magigl i, sel yugu yugugl moglme dugwa. 10Yegl dugo, Yawe ye yegl di togwa, Na we, na bugla yugu swara ta mogl, aglke ede ikne unaglka. Sara komono kana wam ta kurabuka. Wam ta kuran, na unagle dugwa. Yegl dugo, Sara ye mokonomugl, sel yugu dua yomara yugugl moglsre, ka dugwa pre moglkwa. 11-12Ka dugwa prisre, ye gaugl sim erukwa. Abraham ya Sara, suo akie kidagl kaima miurko, Sara gak kurabuka igne dudugwa. Yegl pre Sara gaugl sim ersre, yegl kina gudu prukwa, Na kidagl yeigo, na yagl kadena Abraham ama kidagl yogo, erukwa. Yegl pre na gak ta kuglsre, gun yenaglka kuno erabo? yegl kina gudu prukwa. 13Yegl kina gudu pruko, Yawe ere mogl, Abraham di prukwa, Sara siragl pre gaugl sim ersre, Na kidagl yeiga gak ta kuraglka kuno erabo di kina gudume? 14Na Yawe moliwa. Na siragl ta eragledi praglka i siragl mere kuno erekrabe? Na bugla yugu swara ta mogl, aglke ede ikne unagle diga ikra we, Sara wam ta kuran, unaluwe di, yegl dugwa. 15Yegl dugo, Sara kudugl goglsre, Na ta gaugl erekrie dugo, Yawe dugwa, Ta manugwa. Ene kaima gaugl etne dugwa.
God dumo Sodom ere kide eragle dugwa
16Ana yagl suota ikra adiglsre, ede eigo, Abraham agre i ede pi konbauna bage edenagledi auro yogwa. Ye akie pidre, konbauna bage ta kuglo ibo mogl, kan atne taun Sodom yomara edigwa. 17Edigo, Yawe ere mogl, yagl suo i yegl di togwa, Na kuri ta mogl, taragl swara ta eraglka i, teke padiglkre, Abraham di nogugl ede tenaglka paugwa. 18-19Abraham gawama mere kide moglsre, yoba giglede ta moraiglkwa. Te, na Abraham mina yoba yugobuno pere pere uglo koglo koglo meglkwa i, ere wakai ere tenaglka. Te, na Abraham kere iga i, ye gagiglma ya gawama okuo moraiglkwa di tenan, na kana duglo boglsre, mabuno wakai ya mabuno du keme eraiglkwa pre kere iga. Di tenan, ye yegl eribi, na Abraham ere wakai ere tenagle diga ikra ye gawama i ere tenaglka. Abraham yegl pre kere iga pre na kuri ta mogl, taragl swara ta eraglka i, Abraham di nodugl ede tenaglka pamiwe di, yegl dugwa.
20Yawe ka yegl di kodidre, ye ama yegl dugwa, Sodom yoba ya Gomora yoba kide kaima moglsre, tadaglme podo kaima erime digwa prika. 21Yegl pre na ede atne, taun suo i yomara pidre, mabuno erikwa kanaglka. Ka kaima tadaglme podo erime dimere erimo mo erekrimo mo yegl pre pi kanagle dugwa.
22Yawe yegl dugo, yagl suo i ede Sodom enabugledi ede ebriko, Yawe ya Abraham pai miurka. 23Pai miurko, Abraham ye Yawe moglmara magigl pidre, yegl dugwa, Ene yoba mabuno kide erikwa si goglsre, yoba mabuno wakai erikwa i ama si goglsre, ka kaima yegl eratno? 24Yoba mabuno wakai erikwa 50-pela dumo Sodom suna ta meglbi, ene ka kaima yoba 50-pela i pre dumo kanige erekre, ere kide ere kodinatno? 25Yegl ta erekratnga. Ene yoba mabuno wakai erikwa ya yoba mabuno kide erikwa i swara ede, mudu si goratnga kuno erekrabuka. Yoba mudu uglo koglo koglo meglkwa Jasno motnga pre mabuno du keme ere tenatnga pamiwe di, yegl dugwa.
26Abraham yegl dugo, Yawe di ikne ede, yegl dugwa, Yoba mabuno wakai erikwa 50-pela ta Sodom suna kipai meglbi, kanibo, yoba i pre dumo kanige ersre, yoba ta si goglkragle dugwa.
27Ana Abraham ere mogl, aglke kor dugwa, Ene Yagl Kade motnga, na yoba yoko moliwa. Na ka ta dikraglka paugwa ba na ka sugunagle ta dinaglka. 28Na yoba 50-pela pre diga ikra we, yoba 45 keme ta meglkwa panan, yoba 5-pela moglkrikwa i pre yoba mudu si goratno? dugwa. Dugo, Yawe aglke kor di ikne edugwa, Yoba mabuno wakai erikwa 45 ta meglkwa panan, na yoba mudu ta si goglkragle dugwa. 29Dugo, Abraham ka ta ama yegl dugwa, Ana 40-pela ta meglkwa panan we? dugo, Yawe 40-pela ta meglkwa panan, na yoba 40-pela i pre dumo kanige eresre, yoba mudu ta si goglkragle dugwa. 30Yegl dugo, Abraham aglke kor dugwa, Yagl Kade yo, na ka ta dibo, kubrokro. Yoba 30-pela keme ta meglkwa panan we? dugo, Yawe di ikne edugwa, 30-pela ta meglkwa panan, na ta si goglkragle dugwa. 31Dugo, Abraham aglke kor dugwa, Aya, ene Yagl Kade motnga pre na ka ta dikraglka mere paugwa ba na diga. Yoba 20-pela keme ta meglkwa panan i we? dugo, Yawe aglke kor dugwa, 20-pela ta meglkwa panan, na yoba 20-pela i pre dumo kanige ersre, yoba mudu ta si goglkragle dugwa. 32Yegl dugo, Abraham aglke kor dugwa, Na ka swara keme ta ama di praglka. Ene kubrokro. Yoba 10-pela keme ta meglkwa panan we? dugo, Yawe di ikne ede yegl dugwa, 10-pela ta meglkwa panan, na yoba 10-pela i pre dumo kanige ersre, yoba mudu ta si goglkragle dugwa. 33Yawe ka yegl Abraham di te kodidre, ye ede ogwa. Ogo, Abraham ede ikne yugomugl ugwa.
Valgt i Øjeblikket:
Oknayene Ibo 18: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission