Oknayene Ibo 19
19
Sodom yoba mabuno kide erikwa
1Ana angelo suo ikra ede Sodom enabugledi pi miurka min paugwa igne, Sodom plau dibrika. Plau dibriko, Lot ye taun yomara kobuglo togl ere winabo dimara dua yomara ame di moglsre, angelo suo i ubrika kanugwa. Kandre, ye adigl, ede pi angelo suo ubrara pidre, goglko bodugl, bre magide, guma dra gaba mina edugwa. 2Edidre, yegl dugwa, Yagl kade suo, na ene nigl kogono yoba mere yegl moluwa. Ene na kipaimara udre, kaglno nigl koglsre, ugl panabrika. Ugl padre, tagna kana adigl ede enabriwe dugwa. Yegl dugo, ye di ikne ede, yegl dibrika, Yegl kodo, no yoba makai simara meda panabugle dibrika. 3Yegl dibrika ba Lot ka giglede dugwa pre ye akie ede Lot kipaimara yugugl eigwa. Akie eigo, Lot ye bret tau yis edekre gagl togwa. Gagl tedre, kaya mokna podo tau ama akie gagl tedre, eruko, ye neigwa.
4Lot ya angelo i ye kaya mokna ne kodidre, ugl paikrikwa igne, Sodom yagl mudu u, Lot yugumo yobugl winabo di i suna edigwa. Sodom yagl i, kidagl ya kulu ya kumugl gak mudu koglo koglo meglkwa i wigwa. 5Lot yugumo yobugl winabo di i suna edidre, ye agle di, Lot di prikwa, Yagl suo ene kipanara panabugledi ubrika i, aglo miure? digwa. Ene ye agre i meda edin, no ye gu dinamniwe digwa. 6Yegl digwa ba Lot yene ede meda udre, dua yoguglsre, 7yegl dugwa, Na ninama agrama wagle, mabuno kide yegl ta erekrio! dugwa. 8Ene prio! Na abra suo miurka ye yagl bogl ta paikribrika. Na abra suo i agre yu meda edibo, ene ta eramnedi praiglkwa i, eraiglkwa. Ba yagl suo i na kipaimara ubrika pre na kugl bogl tenaglka paugwa. Yegl pre ene mabuno kide ta ye ere tekraiglmiwe! dugwa. 9Yegl dugwa ba Sodom yagl mudu ere mogl, Lot di te, Agai noro! digwa. Yegl didre, yene di ikne ikne ede, yegl digwa, Yagl i, dumo pere nem moglkwa ba ye erme jasno mere yegl moglsre, mabuno siragl mere ta eramga i di norume digwa. Yegl didre, ye aglke kor Lot di te, Erme we, no yagl suo i ere kide ere tedre, ene ama akie ere kide kaima ere tenamniwe digwa. Yegl didre, ye Lot ake nu si yu, dua yomara udre, dua sada boramnedi erikwa.
10Sodom yoba yegl erikwa ba yagl suo ikra dua yauro, Lot ake gudu yugugl edidre, dua yogiurka. 11Dua yogiglsre, ye ama Sodom yagl mudu dua wagle meglkwa i, gumuglno kin yenaiglmedi eribrika. Eribriko, kumugl ede pi yagl kidagl pra, mudu gumuglno kin yeigwa pre ye yugu dua dokigwa, kankrikwa.
Lot dumo Sodom kide kodugwa
12-13Ana yagl suo ere mogl, Lot yegl di tebrika, No we, no dumo magigl i ere kide ersre, yoba mudu si gorabuglka. Yoba magigl i mabuno kide kaima erikwa Yawe pre kan erukwa. Pre kan ersre, ye no ere kide erabredi dedugo, ubuglka. No dumo ere kide ersre, yoba mudu si gorabuglka. Yegl pre ene yobanma ta Sodom suna i meglmo? Ene wan mo abutn mo abutn wie mo yobanma ira ta Sodom meglkwa i agre i ede enatnga pamiwe di, yegl dibrika. 14Angelo suo yegl dibrika pre Lot ede pi yagl suo ye abuglo inabugledi eribrika i yegl di togwa, Nono dumo munara i we, Yawe ere kide erse, yoba mudu si goglsre, yegl erarukwa. Yegl pre ene tabre Sodom kide kodidre, ede piro! dugwa. Lot yegl dugwa ba yagl suo i pribrika, Lot ka boglo erumedi pribrika.
15Ana kamun tagugwa igne, angelo suo Lot di tebrika, Ene ebin idre, abutn suo idre, tabre ede pio! Ta manan, yoba mudu geglbi, ene ama akie goraiglmiwe dibrika. 16Yegl dibrika ba Lot tabre pikrukwa pre angelo suo ye Lot ogo akidre, Lot ebie ya abuglo ogono akidre, i pi Sodom meda edibrika. Yawe ye Lot mirie goglkwa pre angelo suo yegl eribrika. 17Ye i pi Sodom meda edibriko, angelo ta yegl dugwa, Ene gogl dinaiglmiwa, ede pio! Ene kan ikne edekre, dumo auduno yomara bage magigl i moglkre, ede dagne ibo pio! Ta manan, ene goraiglmiwe dugwa. 18Yegl dugwa ba Lot di ikne ede, Yagl kade suo, i ta manabiwe dugwa. 19Yegl didre, ye ama angelo swara ta yegl di togwa, Na ene nigl kogonen yoba mere yegl moluwa. Ene na wakai kandre, mitna goglsre, ake ple di narsre, na gogl dinabedi i pi meda edinga. I wakai etnga ba na dagne ibo ta pikraglka paugwa. Muglo i eglke kuri yogwa pre na bage pi moglbo, ene dumo Sodom ere kide eribr, na ama goraglka pamiwa. 20Ene taun kebra ta magigl yogwa i kano! Taun i magigl yogwa pre na teke ede pi taun i enaglka kuno erabuka. I ama kebra yogwa pre na teke ede pi taun i pidre, kor moraglba, yegl dugwa. 21Dugo, angelo Prawa dugwa. Na ene di pitnga i prika. Taun kebra i ta ere kide erekraglka. 22Ana ene tabre ede taun i pio! Ene dumo i mina enamnedi pi meglbi, na taragl ta erekraglka pamiwe dugwa. Yegl pre yoba okuo ere mogl, taun kebra i Soar#19.22 Ka Hibru mina kagie Soar i mabuno paugwa, kebra. we digwa.
God Sodom ya Gomora ere kide erukwa
23Ana ade koragle sugo, Lot ede Soar suna pi kodugwa. 24Ogo, Yawe makandigle moglkwa ya dugo, Yawe kamin mitna ibo moglkwa i, kobuglo de bauglo erikwa dedugo, kobuglo i kamun mere yegl si, yage Sodom ya Gomora sigwa. 25Yawe yegl ere, taun i ya dumo auduno taun suo i magigl yogwa i mudu ere kide ersre, yoba ama mudu si goglkwa. Kugl kan ya ki ama ere kide ere kodugwa. 26Lot teke ede pi Soar ogwa igne, ye ebie okuo udre, kan ikne edugwa. Kan ikne edugwa pre ye ede u mudi koglo pi, kobuglo mere yegl pi adigl pai moglkwa.
27Ana Abraham tagna kide kana adiglsre, ede pi ye Yawe bogl okna ka di miurara ikra ogwa. 28Pidre, ye kan Sodom ya Gomora ya dumo auduno magigl yogwa ikra edugwa, inge podo ede mitna ogo, kanugwa. Yoba makan koglwa sin gaiglkwa inge omere podo yegl erukwa.
29Ana God yegl ere, taun dumo auduno yomara yebrika i, ere kide ersre, yoba mudu si goglkwa. Yegl erukwa ba Abraham ye di prukwa ikra kina torua sikrukwa. Kina torua sikrukwa pre ye Lot taun kipamara i, auro i pi meda edidre, dumo ere kide ersre, yoba si goglsre, erukwa.
Lot abuglo suo yagl gak kiurka
30Ana okuo Lot ye Soar aimadi morabuka kudugl goglkwa pre ye abuglo suo idre, ede dumo dagne ibo ogwa. Ye mudu ede dagne ibo pidre, kobuglo mur kipai meglkwa. 31Kipai meglko, Lot abuglo komono ere mogl, abauglo okuo yegl di togwa, Abu mudu uglo koglo koglo meglkwa i, ye ede yagl pidre, gak kiglkwa. Yegl erikwa ba nono ede yagl ta enabuglka magigl i ta moglkriko, nono neno ama kidagl yei kodugwa. 32Yegl pre nono neno wain nuglo tau tenabuglka. Tobugl, ye nedre, spak eran, nono neno bogl padre, gak kurabuglka. Gak ta kugl, nono yugobuno kagie ta dudukrabiwe dugwa. 33Yegl pre abai suo i eduer neno wain nuglo tau tebriko, ye nedre, spak erukwa. Spak eruko, ye abuglo komono ere mogl, nem moglmara ogo, ye bogl swara pabrika. Bogl swara pabrika ba ye nem spak podo erukwa pre ye abuglo erukwa i pre kan erekrukwa. 34Ana tagna we, Lot abuglo komono i, ye abauglo okuo yegl di togwa, Na eduer nina bogl bogl swara akie pabuglka. Nono erme eduer ama wain nuglo tau tenabuglka. Ye nedre, spak eran, ene ama ye moglmara en, bogl swara panabrika. Yegl etn, nono suo akie gak ta kugl, nono yugobuno kagie dudukrabiwe dugwa. 35Yegl pre ye eduer aglke kor neno wain nuglo tebriko, ye nedre, spak erukwa. Spak eruko, ye abuglo okuo ere mogl, nem moglmara ogo, ye bogl swara pabrika. Bogl swara pabrika ba ye nem spak podo erukwa pre ye abuglo okuo erukwa i pre kan erekrukwa. 36Abai suo yegl eribriko, ye neno wagle dano paugwa. 37Dano paugo, ye ere mogl, gak kiurka. Lot abuglo komono ye yagl gak ta kuglkwa, kagie Moap we dugwa. Moap yoba erme meglkwa i, ye gawama meglkwa. 38Te, ye abuglo okuo yagl gak ta kuglkwa, kagie Benami we dugwa. Amon yoba erme meglkwa i, ye gawama meglkwa.
Valgt i Øjeblikket:
Oknayene Ibo 19: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission