Oknayene Ibo 20
20
Abimelek Abraham ebie yugwa
1Ana Abraham ere mogl, dumo ta kipai moglkwa i kide kodidre, bage bage pai, ede pi dumo makan Negev we dimara ogwa. Pidre, ye dumo Negev suna i, dumo kebra ta Kades ya Sur we dimara suna kipaugwa. Dumo i kipadre, okuo ye dumo i kide kodidre, ede pi dumo ta Gerar we dimara ege sugunagle ta moragledi ede ogwa. 2Abraham ede Gerar pidre, ye Gerar yoba yegl di togwa, Sara na abara moglmiwe dugwa. Yegl dugwa pre Gerar king, kagie Abimelek we digwa i, ye ere mogl, nigl kogonmo yoba tau dedugo, ye pi Sara agre i ede u king ebie ta morabuka pre king moglmara yuigwa. 3Yuigo, Abimelek eduer ta ugl pai kubu kanugwa, God ye moglmara udre, yegl di togwa, Ene we, abu ta yunga i, wie ta moglkwa pre ene goratniwe dugwa. 4God yegl dugwa ba Abimelek ya Sara ye ege swara ta bogl swara paikribrika pre Abimelek ere mogl, di ikne ede yegl dugwa, Yagl Kade yo, na aglau ta erekriko, na yobanama ama aglau ta erekrikwa. Yegl pre ene ka kaima no si goratno? dugwa. 5Ye ama yegl dugwa, Abraham yene di nare, Abu i na abara moglme dugo, Sara ama, Yagl i na agra moglme dugwa. Yegl pre na tadaglme ta erekriedi prika. Na mabuno du keme erie di, yegl dugwa.
6Ana Abimelek ugl kubu kanumara i, God di ikne ede, yegl dugwa, Owo, ene ka kaima dinga. Na prika, ene tadaglme ta erekriedi prisre, abu i yunga. Yegl pre ene abu i bogl padre, tadaglme na mane dimara eratnga konbo i, na si kegl diga pre erekitnga. 7Ana erme we, ene abu i te ikne wie moglmara edo! Yagl i na ka kep yoba moglkwa. Ene pre ye na agle di pran, ene ta goglkratnga. Ba ene abu i ta te ikne edekitn, ene ya ene yobanma ama mudu ka kaima goraiglmiwe di, yegl dugwa.
8God ka yegl di te kodugo, Abimelek tagna kana adiglsre, ye nigl kogonmo yoba di makai sidre, God ka dugwa ikra ye di togwa. Di togo, ye kudugl podo geglkwa. 9Ana Abimelek ye nigl kogonmo yoba yegl di tedre, ye Abraham agle dugo, ugwa. Abraham ugo, Abimelek yegl di prukwa, Ene siragl pre mabuno kide ere notne? Na tadaglme siragl mere eriko, ene na yobanama bogl aglau eraiglmedi etne? Ene mabuno yegl ta erekratnga paugwa. 10Siragl eruko, ene mabuno kide yegl etne? di, yegl di prukwa.
11Abimelek yegl di pruko, Abraham di ikne ede, yegl dugwa, Na abara moglme diga i, yegl pre diga, yoba magigl i God kuduglmo goglkrimedi prisre, na ebina i ye inamnedi ersre, na na si goraiglmedi prika. 12Ba na ka kibi dikrika. Ye kaima na abara moglkwa. No neno swara moglkwa ba mano pere pere miurka pre na ye iga. 13Ana God na Ene nen yugumo kaminmo kide kodidre, dumo pere pere wan moratnedi dedugwa igne, na Sara yegl di teiga, Ene yegl di, na ere wakai ere naratniwa. Nono bage ta obugl, ene yoba di te, Abraham na agra moglme dinatniwe di, okna yegl di teie dugwa.
14Ana Abimelek ere mogl, sipsip ya kau ya nigl kogon yagl abu tau idre, Abraham togwa. Tedre, ye ebie Sara ama te ikne edugwa. 15Edidre, ye yegl dugwa, Ene makan mudu yogwa i kano! Makan i, mudu na makana yogwa. Na makana suna i, ene dumo ta wakai kanatnara i, kipanatniwe dugwa. 16Ye Abraham yegl di tedre, ye ama Sara yegl di togwa, Na we, na mige silva 1,000 idre, agitn kumap teiga. Na kumap teiga pre ene yobanma ya yoba pere mudu ama praiglkwa, Abu Sara aglau ta erekrumedi praiglmiwe di, yegl dugwa.
17-18Ana Abimelek okna Sara yugwa igne, Sara ye Abraham ebie moglkwa pre Yawe ye Abimelek ya, ye ebie ya, ye nigl kogonmo abu mudu gak ta kuglkraiglmedi ere edugwa. Ana Abraham erme God agle di pruko, God ye Abimelek ya ki aglke kor gak kuraiglmedi ere edugwa.
Valgt i Øjeblikket:
Oknayene Ibo 20: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission