Oknayene Ibo 21
21
Sara Aisak kuglkwa
1Ana Yawe ere mogl, ye Sara ka di te paduglmere ikra ake ple di togwa. 2Ake ple di togo, Sara dane paugo, okuo yagl gak ta kuglkwa. God okna Abraham di te, Sara ege igle gak ta kurabe dumere, igne i kuglkwa. Abraham kidagl yei kodugwa igne kuglkwa. 3Sara yagl gak kuglko, Abraham ere mogl, ye wam i kagie Aisak#21.3 Ka Hibru mina, kagie Aisak mabuno ta paugwa, gaugl erukwa. we dugwa.
4Abraham ye wam kagie Aisak we dugo, Aisak ege 8-pela de moglko, Abraham ye God okna di tomere wam gagie puduo bogl togwa. 5Abraham ye Aisak kuglkwa igne i ye bugla yugu 100 ne kodugwa. 6Ye Aisak gagie puduo bogl togo, Sara gak ta kuglsre, gun yogwa i pre ye ere mogl, yegl dugwa, God ere wakai ere narukwa pre na gun yedre, gaugl erika. Yoba tau Sara yagl gak ta kuglme dibi, yoba praiglkwa i ama mudu gun yebi, no akie gaugl eramniwe di, yegl dugwa. 7Ka yegl didre, ye ama dugwa, Yoba okna ta Abraham di te, Ebn Sara gak ta kurabiwe di, yegl ta dimo? Ta manada! Yegl ta dikrikwa. Ba Abraham kidagl moglkwa igne, na yagl gak ta kule di, yegl dugwa.
8Ana yagl gak i ere mogl, yakugo, ye mam am biglke dugwa. Ye am biglke dugwa igne, Abraham kaya mokna podo kego, yoba u neigwa.
Abraham ye Hagar ya Ismael di meda edugwa
9Ana aglke ta Hagar, Isip mam ikra, wam Ismael ere mogl, Aisak kiam sugwa. Kiam sugo, Sara kanugwa. 10Sara kandre, Abraham yegl di togwa, Na nigl kogona abu i, ye wam bogl di meda edo! Ene gogln, Aisak swara ene taraglnen ya againen inabedi prika. Hagar wam ikne ta ikrabiwe di, yegl dugwa. 11Sara ka yegl dugo, Abraham kide kaima prukwa. Ismael ye ama Abraham wam moglkwa pre kide kaima prukwa. 12Yegl prukwa ba God ere mogl, Abraham yegl di togwa, Ene wan ya nigl kogonen abu di meda edinatnga i, pre yubun dekro! Sara dumere eratniwa! Ene gawanma mere moraiglme diga ikra we, Aisak swara ye wama ya gawama pre diga. 13Te, nigl kogon abu ikra wam we, ye ama ene wan moglkwa pre ye gawama mere moglsre, yugobuno pere ta moraiglmedi ere edenagle di, yegl dugwa.
14God ka yegl dugwa pre Abraham tagna kana adiglsre, bret ya nigl migi ta meme nagie mina bekigwa idre, Hagar koba wagle padigl tedre, wam bogl suo akie di meda edugwa. Di meda edugo, Hagar dumo ta Berseba we dimara pidre, dumo suna i wan moglkwa. Dumo i, dumo wau yogwa.
15Ana Hagar nigl tau yugwa i, wam bogl nebriko, dudugwa. Dudugo, Hagar ye wam agre i ede pi ede kebra ta pamara mabunomugl edidre, 16ye ede prak iro pi, yagl ta yer sinan, ede eglke kuri enabere mere yegl Hagar ede eglke kuri yegl ogwa. Ye wam gorabuka kanakrukwa pre ede eglke kuri iro ogwa. Ye eglke iro pidre, ye ame di mogl, kai erukwa.
17Ana yagl gak ama kai erukwa. Ye kai ere moglko, God prukwa. Ana God angelomo kamun mitna ibo moglsre, Hagar yegl di prukwa, Hagar yo, ene motnara aglau siragl mere pame? di, yegl didre, ye ama ka yegl di togwa, Ene kudugl goglkro! God ye yagl gak kai ere moglkwa i prukwa. 18Ene ede wan moglmara pi, ogo ake adigln, adrabuka. Na ye gawama mere kide moglsre, yugobuno pere ta moraiglmedi ere edenagle di, yegl dugwa. 19Ana God ye Hagar maugl nigl ta magigl moglkwa kanabedi ere edugo, Hagar kanugwa. Kandre, ye nigl migi i pi nigl koglsre, yu wam togo, nogwa.
20Ana God ye yagl gak i ake ple di te moglko, yagl gak i yakugwa. Ye dumo ta wau yomara mogl, u kade pidre, kibr yer sugwa yagle moglkwa. 21Dumo wau yomara i, dumo Paran we digwa. Ana Ismael dumo Paran i wan mogl, kade moglkwa. Kade moglkwa igne ye mam ere mogl, Isip abai ta yu, ye wam togo, yugwa.
Abraham ya Abimelek ka giglede di padiurka
22Ana igne i Abimelek, dumo Gerar king ikra ere mogl, yagl ta kagie Fikol we digwa bogl akie Abraham moglmara ubrika. Fikol ye Abimelek amimo sugl moglkwa yagle moglkwa. Ana ye ede u Abraham moglmara ubriko, Abimelek ka yegl di Abraham togwa, Ene we, ene taragl kane kane etnga i, God ene ake ple di togo, etnga. 23Yegl pre erme God kagie mina ka kaima ta di nare padratnedi prika. Ene na bakagl narekre, na gagrama ya gawanama ama bakagl tekratnga i pre ya te, na ene mabuno wakai ere teimere ene na mabuno wakai ere narsre, na kantrinana ede suna u, kipai motnara i, yoba makan nem magigl meglkwa i, ama mabuno wakai ere tenatnga i pre ka gigledi ta di nare padratnedi prie di, yegl dugwa. 24Abimelek yegl dugo, Abraham di ikne ede, yegl dugwa, Ana ene dinere yegl mere ka gigledi di te padiliwe dugwa. 25Yegl didre, ye ka ta ama Abimelek di togwa. Abraham okna maugl nigl ta perukwa ba Abimelek nigl kogonmo yagl tau ere mogl, maugl nigl i yene igwa. Yegl pre Abraham nomane sugo, Abimelek di togwa. 26Di togo, Abimelek di ikne ede, yegl dugwa, Ene okna di narekitnga pre na ta prikrika. Na nigl kogona yoba ira yegl erikwa ama na ta digo, prikrie dugwa.
27Ana Abraham ere mogl, sipsip ya kau tau yu, Abimelek togo, ye akie wakai morabugledi ka di padiurka. 28Ka di padigl kodibriko, Abraham sipsip nagigle abai 7-pela i pere edugwa. 29I pere edugo, Abimelek Abraham di pre, yegl dugwa, Ene sipsip nagigle abai 7-pela i pere edinga i, mabuno siragl mere pame? dugwa. 30Dugo, Abraham di ikne ede, yegl dugwa, Na sipsip 7-pela i ene tenaglka. Ene in, yoba kandre, O, Abraham ka kaima maugl nigl i perumedi praiglmiwe dugwa. 31Abraham ya Abimelek dumo i ka di padiurka pre Abraham ere mogl, dumo i kagie Berseba#21.31 Ka Hibru mina, kagie Berseba mabuno ta paugwa, ka gigledi di padiglkwa niglmo. we dugwa. 32Ana Abraham ya Abimelek dumo Berseba i mogl, ka gigledi di padiurko, Abimelek ya ye amimo sugl moglkwa yagle Fikol i aglke ede ikne dumono, Filistia yoba meglmara ebrika. 33Ede ebriko, Abraham ere mogl, dumo Berseba i ede ta tamarisk we digwa yaglkwa. Yaglsre, ye dumo i Yawe, God Aimadi Moglkwa i agle di prisre, kamage ere togwa. 34Ana Abraham ye Filistia yoba meglmara dumo i ege tau olto kipai moglkwa.
Valgt i Øjeblikket:
Oknayene Ibo 21: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission