Oknayene Ibo 27
27
Jekop ye nem bakagl togwa
1Ana Aisak kidagl kaima yogo, gumuglo kin yogwa. Yegl eruko, ye aglke ta wam komono Iso agle dugo, ugwa. Iso ugo, Aisak Wana yo dugo, Iso di ikne ede, We, na mogliwe dugwa. 2Yegl dugo, Aisak ye di te, yegl dugwa, Ene pro. Na kidagl kaima yeiga. Na aunake goraglka prikrika. 3Yegl pre ene kibr yer idre, ede pi taragl are ere si yu, 4gagl naratnedi prika. Mie wam dogon erabuka na nedre, wakai praglka mere yegl gagl natn, na nebo, ene di wakai yei tenaglka. Na ene di wakai yei tedre, okuo goraluwe di, yegl dugwa.
5Ana Aisak ye Iso ka yegl di togo, Rebeka pre moglkwa. Pre moglkwa pre Iso ede kugl waiwai yomara taragl are ere si yunagledi ogo, 6Rebeka ye wam Jekop yegl di togwa, Ene pro. Ene nen ere mogl, agitn komono Iso ka ta di togo, pre moglka. Ye yegl di togwa, 7Ene ede pi taragl are si yudre, mie dogon erukwa gagl naratnedi prika. Gagl natn, na nedre, Yawe gumuglo wagle ene di wakai yei tedre, okuo goragle di, yegl di togwa. 8Yegl pre na erme ene ka ta di tebo, ene prisre, na dinaglmere eratnga. 9Ene ede pi nono meme ya sipsip kunga meglmara pidre, meme nagigle wakai suo si gogl, yu naro! Si gogl, yu natn, na mie wam dogon erabuka nen kidagl nedre, wakai prabuka mere yegl garaglka. 10Na gaglbo, denan, ene i pi nen kidagl tenatnga. Ene i pi ten, ye nedre, Iso di wakai yei tenabuka ikra ene di tedre, okuo gorabiwe di, yegl dugwa.
11Rebeka yegl dugo, Jekop di ikne ede, ye mam yegl di togwa, Ene pro! Na agra komono Iso nagie yugo podo sugo, na nagna yugo sikrukwa. 12Yegl pre nina kidagl ta ere mogl, na ake pran, ye Jekop na bakagl narumedi, yegl di prabuka. Yegl di prisre, ye na di wakai yei narekre, di kide yei narabiwe di, yegl dugwa. 13Jekop yegl dugwa ba ye mam ere mogl, di ikne ede yegl dugwa, Wana yo, ye ene ta di kide yei tenan, ene inatnere na inaglka. Ene na dimere keme eratnga. Meme nagigle suo pre diga ikra dimere pi si gogl, yuo! dugwa.
14Jekop mam yegl dugwa pre ye pi meme nagigle suo si gogl, yu mam togwa. Mam togo, Rebeka mie wam gaglkwa, dogon erukwa. Aisak nedre, wakai prabuka mere yegl gaglkwa. 15Yegl gaglsre, ye Iso kuguglmo gaglmo tau Rebeka yugumo yugugl yogwa i yu ye wam okuo Jekop ede togwa. Kugugl gagl i, Iso kugugl gagl dimede edenagledi prukwa igne edugwa. 16Jekop mam ye kugugl gagl i ede tedre, meme nagigle suo nagino kugl yaurukwa idre, Jekop ogo mina ya nugu mina nagie yugo sikrumara padigl togwa. 17Padigl tedre, ye meme mie dogon erukwa gaglkwa i Jekop tedre, bret tau ama gaglkwa i tedre, erukwa.
18Ana Jekop kaya mokna ikra i ede pi nem moglmara pidre, Nina yo dugwa. Dugo, Aisak Na mogliwe dugwa. Didre, ye ere mogl, Ene na wana komono uno mo wana okuo une? dugwa. 19Yegl dugo, Jekop di ikne ede, nem yegl di togwa, Na ene wan komono Iso moglka. Ene di natnere ikra erika. Ene ugl panga kodo, adigl mogl, siragl are mie wam ikra yuiga i nedre, na di wakai yei naratniwe di, yegl dugwa.
20Ana Jekop yegl dugo, ye nem Aisak ere mogl, yegl di prukwa, Wana yo, ene siragl mere tabre si yune? dugwa. Dugo, Jekop di ikne ede, yegl dugwa, Ene Godnen Yawe ye ake ple di narukwa pre tabre si yuiwe dugwa. 21Yegl dugo, Aisak ere mogl, Wana yo, ene magigl wo! dugwa. Na ene ake pribo, ene ka kaima Iso motno mo i praluwe dugwa. 22Yegl dugwa pre Jekop ede nem moglmara magigl ogo, Aisak ye ake prisre, yegl dugwa, Ene nugun Jekop nugu mere yegl prika ba ene ogn ake prika, Iso ogo mere yegl prie dugwa. 23Jekop mam ye meme nagino yugo ogo mina padigl togwa pre ye nem ake prukwa igne, Iso nagie yugo podo sumere yegl mere sugo, prukwa. Yegl pre ye Jekop moglmedi prikre, Iso moglmedi prisre, di wakai yei tenagledi erukwa. 24Di wakai yei tenagledi erukwa ba ye aglke kor di prukwa, Ene ka kaima na wana Iso motno? dugwa. Yegl dugo, Jekop Na Iso moluwe dugwa. 25Jekop yegl dugwa pre ye nem Aisak ere mogl, Ene siragl are mie wam gaglnga i yu naro dugwa. Na nedre, ene di wakai yei tenagle di, yegl dugwa. Yegl dugo, Jekop ye meme mie wam i tedre, wain nuglo suru tedre, eruko, nem kidagl nogwa. 26Nem kidagl nedre, yegl dugwa, Na wana yo, ene magigl ya u, paunana si no dugwa. 27Dugo, Jekop magigl pi, pauna si nogo, Jekop ye Iso kuguglmo gaglmo edugwa i, Aisak ye Iso nagie demene orukwa mere prisre, Na wana Iso kaima moglme di prisre, di wakai yei te, yegl dugwa, Aya, na wana nagie demene orukwa i, yoba kaya mokna ere yaiglmara, Yawe makan gaba ake wakai ere togwa demene erumere yegl mere erukwa. 28Ana na wana yo, God heven ibo moglkwa ene kaya mokna ere yaratnara waradarua erabedi ere tedre, makan gaba nuglo podo morabedi ere tedre, erabiwa. Yegl erse, ene kugl mogo ere yaratnga ya ede wain ere yaratnga i mere kide koraiglmedi ere edenabiwa. 29Te, yoba yugobuno pere pere meglkwa bitno magide ene ya ene gawanma tedre, ene ya ene gawanma ye kogono ere tenaiglmiwa. Te, ene agiglnma sugl motn, ye ama bitno magide ene tenaiglmiwa. Yoba ta ere mogl, ene di kide yei tebi, yene u kide enaiglmiwa. Te, yoba ta ere mogl, ene di wakai yei tebi, ye u wakai enaiglmiwe di, yegl dugwa.
30Ana Aisak ye Jekop di wakai yei togo, Jekop ede ogo, igne i keme ye agigle Iso taragl are ere sugwa i, i ede ugwa. 31Ye i ede ikne udre, ye ama mie wam dogon erabedi gaglsre, i pi nem kidagl moglmara ogwa. I pi nem kidagl moglmara pidre, ye yegl dugwa, Nina yo, ene ugl panga kodo, adigl mogl, siragl are mie wam yuiga i nedre, na di wakai yei naratniwe dugwa. 32Yegl dugo, ye nem Aisak ere mogl, Ene ira une? dugwa. Yegl dugo, Iso di ikne ede, nem yegl di togwa, Na ene wan komono Iso moluwe dugwa.
33Iso ka yegl dugwa pre Aisak ogo gagie nuglo podo didre, yegl dugwa, Ene Iso motnga pre ira taragl are si yu, gagl narume? Ene ukitnga igne, na mie wam yugwa i nedre, ye di wakai yei teiga. Ye ka kaima u wakai enabiwe di, yegl dugwa. 34Aisak ka yegl dugo, Iso kamo i prisre, kai podo erukwa. Ye kai podo ersre, nem yegl di togwa, Nina yo, ene na ama di wakai yei naro! dugwa. 35Yegl dugwa ba Aisak di ikne ede yegl dugwa, Ene agitn u, ka kibi di narukwa. Ka kibi di naruko, na ene di wakai yei tenaglka ikra, ye di wakai yei teigo, ye i ede ome dugwa.
36Ana Iso ere mogl, ka ta ama yegl dugwa, Ye kagie Jekop we digwa kuno erukwa. Ye ege suo na bakagl narukwa. Ege ta, na komono moglka againa i yugwa. Te, erme ene di wakai yei naratnga i, ye di wakai yei tengo, i ede ogwa. Ene di wakai yei naratnga i, ka swara ta na pre pai moglkrumo? di, yegl dugwa. 37Iso yegl di prukwa ba Aisak di ikne ede, yegl dugwa, Ene pro, ye ene bitn mere yegl morabiwe didre, yoba bormai swara mudu ye ye kogonmo ere tenaiglmiwe diga. Te, na ama ye kugl mogo ya ede wain ere yarabuka i mere kide koraiglmiwe diga. Yegl pre na ene ka ta siragl mere di wakai yei tenagle? di, yegl dugwa. 38Dugo, Iso ye nem kidagl aglke kor di prukwa, Ene di wakai yei naratnga ka swara yegl keme pamo? Ene na ama di wakai yei naro! dugwa. Yegl didre, ye aglke kor kai erukwa.
39Iso ka yegl dugo, ye nem kidagl Aisak ere mogl, ye yegl di togwa, Ene kipanatnara we, makan gaba nuglo podo moglkran, God waradarua erabedi erekrabiwa. 40Ene ere mogl, yoba kuda bogl tedre, taraglno idre, kor moratnga. Te, agitn kogonmo ere tenatniwa. Ere tenatnga ba okuo ene kide prisre, mogl pere edin, ye ene sugl moglkrabiwe di, yegl dugwa.
41Ana Aisak ye Iso di wakai yei tekre, Jekop di wakai yei togwa i pre Iso ye Jekop dem kubro tedre, yegl kina gudu prukwa, Na nina kidagl gorabuka magigl erukwa. Ye goran, gaba buko dumun, na agra Jekop si goragle di, yegl kina gudu prukwa. 42Yegl kina gudu prisre, ye ka tau ama yegl mere dugo, yoba tau prisre, ede u Rebeka di teigwa. Di teigo, Rebeka ere mogl, yoba ta dede, ye wam okuo Jekop dedenan unabedi dedugwa. Dedugo, pi di togo, Jekop ugwa. Ugo, Rebeka ye yegl di togwa, Ene agitn Iso bakagl tenga pre ye dem kubrukwa. Ye, Na agra si goglbo, dena muduna aragan erabe dugwa. 43Yegl pre na ka ta dinarika ene duglo boratnga. Ene teke ede pi na agra Laban dumo Haran moglmara enatnga. 44Ene agitn erme dem podo kubrukwa ba ene dumo i ege tau motn, dem muduo aragan erabuka. 45Ye ene bakagl tenga i kina torua sidre, dem muduo aragan eran, na yoba ta dedibo, u ene di tenabuka. Di tenan, ene ede ikne unatnga. Ta manan, ene suo akie ege swara igne giur, na wana ta moglkraiglmiwe di, yegl dugwa.
Aisak Jekop dedugo, ye ede bawamo Laban moglmara ogwa
46Ana Rebeka ere mogl, wie kidagl Aisak yegl di togwa, Iso ye Hit abu suo yugwa i kide kaima kaniga pre kor moglka kide prika. Jekop ama ta ere mogl, Hit abu yegl mere ta yunan, na goragledi prie di, yegl dugwa.
Valgt i Øjeblikket:
Oknayene Ibo 27: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission