Oknayene Ibo 28
28
1Ana Rebeka ka yegl dugwa pre Aisak ere mogl, Jekop wo! dugo, ugwa. Jekop ugo, nem di wakai yei tedre, ka kidine ama yegl di togwa, Ene Kenan abu ta ikratniwa. 2Ene ede dumo makan Mesopotemia, man nem kidagl Betuel kipamara enatnga. Ene en, ene man agigle Laban ama morabuka. Ye abuglo ta inatniwa. 3God Yobuglo Podo Paugwa ene ere wakai ere tedre, gawanma mere kide moraiglmedi ere edenabiwa. Ere edenan, mere kide meglbi, ye yugobuno pere pere akie moraiglkwa. 4Te, God okna ye Abraham ka kaima di te paduglmere ikra ene ya ene gawanma ere tenabiwa. Ere tenan, ene ya ene gawanma makan magigl i inaiglmiwa. Makan magigl i erme ene kipai motnga ba makanen kaima yekrukwa. Yegl erukwa ba God okna ibo Abraham togwa pre ene ya ene gawanma inaiglmiwe di, yegl dugwa. 5Aisak ka yegl didre, ye Jekop dedugo, Jekop ede dumo makan Mesopotemia ikra, bawamo Laban moglmara enagledi ogwa. Rebeka ye Jekop ya Iso mano moglko, Laban Rebeka agigle moglkwa. Te, Laban we, ye Aram yagl Betuel ikra wam moglkwa.
Iso abu ta ama yugwa
6Ana Aisak ye Jekop di wakai yei tedre, ede dumo Mesopotemia pi abai ta inabedi dedugwa i, Iso prukwa. Te, Aisak ye igne i ama Jekop di te, Kenan abu ta ikratniwe dugwa i prisre, 7Jekop ye nem mam kano prisre, ede dumo Mesopotemia enagledi ogwa i, Iso ama prukwa. 8Yegl pre Iso ere mogl, Na nina Aisak Kenan abu kide kanugwa pamiwe di, yegl di prukwa. 9Yegl di prisre, ye Abraham wam Ismael ikra moglmara pidre, abuglo ta namba 3 abu morabedi yugwa. Abu i, kagie Mahalat we digwa. Te, Mahalat agigle ta moglkwa, kagie Nebaiot we digwa.
Jekop ugl kubu ta kanugwa
10 Ana Jekop we, ye ede dumo Mesopotemia enagledi ogwa igne, ye dumo Berseba kipai moglmara i, kide kodidre, ede Mesopotemia, dumo kebra ta Haran we dimara, enagledi konbauna ogwa. 11Ye pi moglsre, ege ta ye konbauna ogo, ade beigwa. Ade beigwa pre ye dumo ta omara i meda ugl paugwa. Ye kobuglo ta idre, ede iko mere yei, ugl paugwa. 12Ye ugl padre, ugl kubu ta kanugwa. Ugl kubu i mina ye lata ta kanugwa. Lata i, ikne makan gaba mina yogo, ikne ede heven ibo ogwa. Lata yegl yogo, God angeloma ede kuglo pi, ede atne u, ere meglkwa kanugwa. 13Te, lata pi heven ibo sige yomara i we, Yawe adigl moglsre, ugl kubu mina Jekop yegl di togwa, Na Yawe moluwa. Na ene yagl awan Abraham Godmo moglsre, nen Aisak Godmo moglka. Ene ugl panara makan magigl i, ene ya ene gawanma tenaglka. 14Te, ene gawanma pi kaugl mere yegl mere kide moraiglkwa. Mere kide meglbi, tau ede ade umara ebi, tau ede ade beimara ebi, tau ede nigl bre ebi, tau ede nigl beye ebi, bage bage yegl pi, kipai moraiglkwa. Te, ene ya ene gawan i mina na yoba yugobuno pere pere uglo koglo koglo meglkwa i, ere wakai ere tenaglka. 15Ana ene pro! Na ene enatnara akie pidre, ene sugl moraglka. Bage ta enatnara ene sugl moglsre, okuo na ene auro i ede u dumo magigl i aglke kor edenaglka. Na ene kide kodokre, erme ka di padiglmere keme eragle di, yegl dugwa.
16Ana Jekop adiglsre, yegl dugwa, Yawe kaima dumo magigl i moglkwa ba na okna kankriwe dugwa. 17Te, ye kudugl goglsre, ka ta ama yegl dugwa, Na igle moglka kudugl goluwa! Dumo magigl i God kipamara mere yegl yogwa. Te, dumo i ama heven ibo duamo mere yegl yomiwe di, yegl dugwa.
18Ana Jekop ka yegl didre, ye aglke kor ugl padre, tagna kana aduglkwa. Ye tagna kana adiglsre, kobuglo ta ede iko yogwa ikra bodugl padiglsre, kugo nuglo tau toide kobuglo bolamugl edugwa. Ye Dumo igle Yawe na moglmara ume di, aimadi pre morabuka pre yegl erukwa. 19Yegl ersre, ye dumo i kagie Betel#28.19 Ka Hibru mina, kagie Betel i mabuno ta paugwa, God kipamara. we dugwa. Taun ta dumo magigl i yogwa okna Lus we digwa ba Jekop kagie kor yogwa. 20-21Ana Jekop kagie kor yedre, ye God ka kaima di te padigl, yegl dugwa, Yawe yo, na erme dumo eglke ta enaglka i, ene na enaglmara akie pi, na sugl moglsre, te kaya mokna ya kugugl gagl ta natn, na wakai wan mogl aglke ede ikne nina kipamara ebo, ene na Godna moratniwa. 22Te, na kobuglo ta magigl i bodugl padiglka i, na kandre, dumo magigl i, God kipamara mere yegl yomedi praglka. Te, ene taragl tau naratnga we, na ka kaima yubu si bage 10-pela edidre, bage swara ta ene te ikne edinaluwe di, yegl dugwa.
Valgt i Øjeblikket:
Oknayene Ibo 28: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission