Oknayene Ibo 29
29
Jekop ede Laban moglmara pi plau dugwa
1Ana Jekop ye dumo Betel ikra kide kodo, konbauna ede pi yoba ade umara kipai meglmara ogwa. 2Pi plau didre, ye maugl nigl ta kanugwa. Maugl nigl i, taun bina yoba kipai moglkrimara moglkwa. Maugl nigl dra mina kobuglo paglkane podo ta tebe si kegl digwa. Jekop ye maugl nigl i kandre, ye ama kanugwa, sipsip bage suota makai si mogl, ogono kaglno bodugl magigl pai mogl, nigl nenamnedi sugl meglkwa. I siragl pre sipsip sugl meglkwa yoba ege ege sipsip kiglkwa mudu yu, maugl nigl i mina nigl kogl teigwa. 3Ege ege yoba pere pere sipsipno yu makai sidre, mudu meglkwa igne ye kobuglo ikra ake nu si eglke ede, maugl dra yaurikwa. Yaursre, sipsipno nigl kogl tedre, kobuglo ake nu si ikne ede padigl, maugl dra si kegl digwa.
4Ana Jekop ye sipsip sugl meglkwa yagl meglmara pidre, yegl di prukwa, Agrama wagle, ene aglo kipaime? dugwa. Yegl dugo, ye di ikne ede, No dumo Haran ki pamne digwa. 5Yegl digo, Jekop ere mogl, Ene yagl ta kagie Laban we digwa, Nahor gawamo moglkwa i, ene ta pre kan erimo? yegl di prukwa. Di pruko, ye di ikne ede, Owo, no pre kan erumne digwa. 6Te, Jekop ama di prukwa, Ye wakai moglmo? dugo, Ye wakai moglme digwa. Yegl didre, sipsip sugl meglkwa yagl i ere mogl, yegl digwa, Yagl i abuglo Resel erme sipsipmo yugwa iro, kano! di, yegl digwa.
7Ana Jekop ere mogl, ka ta ama yegl dugwa, Ene prio! Erme min paikrukwa. Sipsip togl suna edenaiglkwa egemo yekrukwa. Ene oglade nigl kogl tedre, sipsip i pi, kugl moglmara edibi, kugl ne moraiglmiwe dugwa. 8Yegl dugo, sipsip sugl meglkwa yagl i di ikne ede, yegl digwa, No yegl ta erekramga. No sugl mun, yoba mudu sipsipno yuibi, no kobuglo ake nu si eglke ede, maugl dra yaursre, nigl kogl sipsipno tenamne digwa.
9Jekop ya sipsip sugl meglkwa yagl i ka di meglko, Resel ye nem sipsipmo idi magigl ugwa. Ye sipsip sugl moglkwa abai moglkwa pre yugwa. 10Resel, ye Jekop mam agigle Laban abuglo i, sipsip idi magigl ugo, Jekop ye kandre, ye ede maugl nigl moglmara pi, kobuglo ake nu si eglke ede, maugl dra yaursre, ye bawamo Laban sipsipmo nigl kogl togwa. 11Sipsip nigl kogl tedre, ye Resel pauna si nedre, kai erukwa. 12Ye kai ersre, Resel yegl di togwa, Na mana Rebeka ye ene nen abauglo moglme dugwa. Yegl dugo, Resel muku di ede pi nem moglmara pidre, ye nem di togwa.
13Ana Resel ye nem di te, Ene abatn wam ta kagie Jekop we digwa umiwe dugo, Laban muku di ede pi Jekop moglmara tegigl yenabugledi ogwa. Ye moglmara pidre, nugu kugro, pauna si nedre, agre i ede pi ye kipamara ogwa. Ye akie ede Laban kipamara ebriko, Jekop ere mogl, ye moglmara siragl taragl plau dugwa i mudu Laban di togwa. 14Di togo, Laban ere mogl, yegl dugwa, Aya, nono kaima bormai swara muluwe di, yegl dugwa. Ana ka i di kodibriko, Jekop ye ba swara mere bawamo Laban kipamara pai moglkwa.
Jekop ye Lea ya Resel Yugwa
15Jekop ye Laban kipamara ba swara mogl kodugo, Laban ere mogl, Jekop yegl di togwa, Nono bormai swara muglka ba ene kogon yoko ere natnga i, kuno erekrumiwe dugwa. Yegl didre, ye di prukwa, Ene topo siramna mere inagledi pitne? dugwa.
16Ana Laban abuglo suo miurka. Ye abuglo komono kagie Lea we digwa. Te, Resel ye Laban abuglo okuo moglkwa. 17Lea gumuglo wakai koglkwa ba Resel ye abai wakai kaima moglkwa. 18Jekop ye abai Resel wakai kaima kanugwa pre ye ere mogl, di ikne ede, bawamo Laban yegl di togwa, Na bugla yugu 7-pela ene kogonen ere te kodidre, ene abutn okuo Resel na inagledi prie dugwa.
19Ana Jekop yegl dugo, Laban di ikne ede, yegl dugwa, Na abra i, yoba pere tekre, ene tebo, i wakai panabuka. Yegl pre pra, ene na kipaimara moglo! dugwa. 20Yegl dugwa pre Jekop ye Resel inagledi bugla yugu 7-pela Laban kogonmo ere togwa ba Resel ye muduo suna moglkwa pre ye bugla yugu 7-pela i taragl kebra, 3-pela de mo 4-pela de mere yegl yomedi kanugwa.
21Ana Jekop bugla yugu 7-pela kogon ere te kodugwa igne, ye ere mogl, Laban yegl di togwa, Na bugla yugu 7-pela ikra ene kogonen ere te kodiga. Yegl pre ene erme Resel natn, no yagl abu morabugle di, yegl dugwa. 22Yegl dugo, Laban yoba magigl kipai meglkwa i mudu Wio! didre, ye kaya mokna podo ere keigo, yoba magigl kipaigwa i, u neigwa. 23Ye ne meglkwa, mim eruko, Laban ere mogl, Resel yu tekre, Lea yu Jekop togo, ye bogl swara pabrika. 24Te, Laban ama nigl kogonmo abai ta Lea nigl kogonmo ere tenabedi Lea togwa. Abai i, kagie Silpa we digwa. 25Ana Jekop ya Lea bogl swara pabriko, Jekop tagna kana adiglsre, ye Lea moglko, kandre, wai kuglkwa. Wai kuglsre, ye ede pi Laban yegl di prukwa, Siragl eruko, ene mabuno yegl ere natne? Na Resel inagledi ene kogonen ere teiga ikra we! Ene siragl pre bakagl natne? dugwa.
26Ana Laban ere mogl, di ikne ede, Jekop yegl di togwa, Magigl i mabuno pere ta paugwa. No komono kana abro komono yagl tomga. Te kodumga igne pra, abro okuo yagl okuo tenamga. 27Erme yoba wakan swara mere kaya mokna keiga i ne moraiglkwa. Ene wakan swara i kan motn, dudinan, no Resel ama ene tenamga. Tomun, ene aglke kor bugla yugu 7-pela kogon ere naratniwe di, yegl dugwa.
28Ana Jekop ye Laban dumere Prawa didre, wakan swara i kan moglkwa. Kan moglkwa, dudugo, Laban abuglo Resel ama togo, Jekop yugwa. 29Te, Laban ama nigl kogonmo abai ta Resel nigl kogonmo ere tenabedi Resel togwa. Abai i, kagie Bilha we digwa. 30Ana Jekop ye Resel ama yugo, bogl swara pabrika. Jekop ye abu suo yugo, Resel ye muduo suna moglkwa ba Lea ye muduo suna moglkrukwa. Yegl eruko, Jekop aglke kor bugla yugu 7-pela Laban kogonmo ere togwa.
Jekop gagiglma kagno paugwa
31Ana Lea ye Jekop muduo suna moglkrukwa i Yawe kanugwa. Kandre, ye Lea gak kurabedi ere edugwa ba Resel ye temne paugwa. 32Yawe ye Lea gak kurabedi ere edugo, Lea dane paugo, ye ere mogl, yagl gak ta kuglkwa. Kuglsre, ye yegl dugwa, Na dena muduna yubun dogwa i, Yawe kandre, na ake ple di narukwa pre yagl gak ta kuglka. Erme na wina na wakai kanabiwe di, yegl didre, ye kagie Ruben#29.32 Ka Hibru mina, kagie Ruben ya te, kanugwa i magigl magigl pabrika. we dugwa. 33Ana okuo Lea aglke kor dane paugo, yagl gak ta ama kuglkwa. Kuglsre, ye yegl dugwa, Na wina na wakai kankrukwa i, Yawe prukwa pre yagl gak i ama narume di, yegl didre, kagie Simeon#29.33 Ka Hibru mina, kagie Simeon ya te, prukwa i magigl magigl pabrika. we dugwa. 34Te, ye okuo aglke kor dane paugo, yagl gak ta ama kuglkwa. Kuglsre, ye yegl dugwa, Na erme wina wam namba 3 kuglka pre ye na swara wakai kanan, na ye bogl si dakagl morabugle di, yegl dugwa. Yegl dugwa pre yagl gak i, ye kagie Livai#29.34 Ka Hibru mina, kagie Livai ya te, dakaglkwa i magigl magigl pabrika. we dugwa. 35Te, Lea okuo aglke kor dane paugo, yagl gak ta ama kuglkwa. Kuglsre, ye yegl dugwa, Erme na Yawe debie sinaluwe dugwa. Yegl pre yagl gak i, kagie Juda#29.35 Ka Hibru mina, kagie Juda ya te debie sugwa i magigl magigl pabrika. we dugwa. Ye Juda kuglsre, okuo ye ege olto yoko mogl, gak ta kuglkrukwa.
Valgt i Øjeblikket:
Oknayene Ibo 29: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission