Oknayene Ibo 45
45
Josep ere mogl, Na ene agro mole dugwa
1Ana Juda ka yegl di kodugo, Josep muduo prisre, kai nugu sugwa. Ye kai nugu sugo, ye nigl kogonmo yoba ya ki yugugl akie meglkwa i Josep kai eraglka i kan dinaiglmedi, ye ka podo di te, Ene ede meda pio! dugwa. Yegl dugo, ye ede meda eigo, Josep swara ye agiglema bogl meglkwa. Akie meglko, Josep ye ira moglkwa i ye agiglema di togwa. 2Ye agiglema di togwa igne, ye kai podo erukwa. Kai podo eruko, Isip yoba ede meda eigwa ikra prikwa. Ye priko, ye tau ede king yugumo pi, yoba king yugumo meglkwa i ama di teigwa. 3Ana Josep kai podo ersre, ye agiglema di te, Na Josep moliwe! dugwa. Didre, ye Nono neno kaima kor moglmo? di, yegl di prukwa. Di pruko, ye ka ta dikrikwa. Ye Yagl i ka kaima Josep moglmedi pre, kudugl podo goglsre, ka ta dinaiglkwa kuno erekrukwa.
4Ana Josep ye agiglema aglke kor di te, Ene magigl ya wio! dugwa. Yegl dugo, ye ede magigl eigo, ye yegl dugwa, Na ene agro Josep moglka. Ene okna na Ismael yoba tedre, mige bogl neigo, ye na i ede u dumo Isip magigl i na nigl kogon yoba morabedi topo bogl neigwa. 5Ene yegl erikwa ba erme we, ene na mitna goglkre, ene okna erikwa i pre yubun dekrio! God yene ere mogl, na ede okna udre, yoba ake ple dinabedi dedugwa. Na yoba ake ple di tebo, ye kor moraiglkwa pre dedugwa. 6Kidan podo yogwa i, erme bugla yugu suo yei kodugwa ba bugla yugu 5-pela kidan podo yenabuka pai moglkwa. Bugla yugu 5-pela i wagle yoba kaya mokna ere yaglkre, si nekre, yegl eraiglkwa. 7God na ede okna enabedi dedugwa i, nono yugobunono kagie dudukrabedi ye taragl podo ersre, ene ake ple di tenagledi prukwa pre erukwa. Ye ene ake ple di tenan, ene kor moraiglkwa i pre diga. 8Yegl pre ene na dedekrikwa. God yene ere mogl, na dedugwa. Na dedidre, na ake ple di naruko, na erme king nomane teiga yagle moglsre, ye yobama ya dumo Isip mudu sugl moglka.
9Ana erme we, ene tabre ede ikne neno moglmara pidre, ye yegl di teo, Neno yo, ene wan Josep no ene Yegl di teo dugwa, God ere mogl, na dumo Isip mudu sugl morabedi edugwa. Yegl pre ene tabre na Isip moglmara ede wo! 10Ene un, ene Isip suna dumo makan ta Gosen we dimara na moglmara magigl kipanatnga. Ene gagiglnma ya gawanma bogl akie meme ya sipsip ya kau ki kiglkwa idre, bonaganano idre, ede unaiglmiwa. 11Ene wibi, na ene sugl moraglka. Kidan podo yogwa i, bugla yugu 5-pela yei pai morabuka. Ene gagiglnma ya gawanma aglno buglano bogl kidan padre, u kide pi dinaiglmiwe di, Josep yegl di noruko, no erme ene di tomniwe di, yegl dio!
12Ene ya na agra kaima Benjamin kanigwa, na ka kaima Josep moglka. 13Na erme dumo Isip magigl i yagl kade moglka te, ene taragl mudu kanigwa i, ene mudu pi neno di tedre, ye tabre agre i ede unaiglmiwe di, Josep yegl dugwa.
14Josep ka yegl di kodidre, ye agigle okuo Benjamin nugu kugro, kai erukwa. Yegl eruko, Benjamin ye ama nugu kugruko, ye kai akie eribrika. 15Kai ere kodibriko, Josep ere mogl, agiglema swara swarade nuguno kugro, paunano si nedre, kai erukwa. Yegl ere kodugo, ye agiglema okna kudugl gogl, ka dikrikwa i aragan eruko, ye ka digwa.
16Ana yoba tau Isip king yugumo pi, king ya ye yobamo kade di te, Josep agiglema wimiwe digo, ye wakai prikwa. 17Wakai priko, king ere mogl, Josep yegl di togwa, Ene agiglnma di ten, ye yegl eraiglmiwa, ye bekno i pi donkino mokono bolamugl padiglsre, ede dumo Kenan enaiglkwa. 18Ye ede dumo Kenan pidre, ye neno ya ebinoma gagroma idre, aglke ede ikne u, na moglmara unaiglmiwa. Ye wibi, na dumo makan Isip suna wakai kaima ta yogwa, makan nuglo podo moglmara i ye tebo, ye kaya mokna wakai ere yagl ne moraiglkwa. 19Te, ene agiglnma ama di ten, ye hos karis tau magigl i idre, ede enaiglmiwa. Ye ede ikne unaiglkwa igne, ye ebino gagroma hos karis mina unaiglkwa pre diga. Te, ye neno kidagl ama idre, ede unaiglkwa. 20Te, na taragl tau Isip suna wakai kaima tau yogwa i, ye tenaglka pre ye bonaganano tau kide kodidre, ede unaiglkwa i, pre yubun dekraiglmedi di to! Isip king ye Josep yegl di togwa.
21Ana Josep agiglema we, ye king dumere erikwa. Josep ere mogl, king ye di tomere hos karis tau i pi agiglema tedre, kaya mokna tau konbauna bage nenaiglmedi togwa. 22Tedre, ye ama agiglema swara swarade kugugl gagl kor bagl togwa. Yegl erukwa ba ye agigle okuo Benjamin i, kugugl gagl 5-pela bagl tedre, mige silva 300 ama togwa. 23Tedre, ye donki kumugl 10-pela idre, donki abai 10-pela idre, agiglema i pi nem kidagl tenaiglmedi togwa. Donki kumugl 10-pela i mina ye taragl wakai tau dumo Isip suna yogwa i, ye agiglema i pi nem kidagl tenaiglmedi donki mokono bolamugl paduglkwa. Te, donki abai mina ye nem kidagl ede ikne unabuka igne bret ya kugl mogo ya kaya mokna kane kane konbauna bage nenabedi i pi donki mokono bolamugl paduglkwa. 24Josep yegl ersre, ye agiglema i, Ede pio! di togo, ye ede enamnedi erikwa. Ye ede enamnedi eriko, Josep ye di te, Ene konbauna bage kigl nonga erekrio! di, yegl dugwa.
25Ana Josep agiglema dumo Isip kide kodidre, ede pi ye neno dumo Kenan moglmara ede eigwa. 26Ye ede pi neno moglmara plau didre, ye yegl di teigwa, Josep ta goglkrukwa. Ye erme yagl kade dumo Isip mudu sugl moglmiwe di, yegl digwa. Yegl digwa ba ye neno nagie koglsre, kibi dimedi prukwa. 27Neno Jekop ye kibi dimedi prukwa ba ye wama ere mogl, Josep ka siragl mere dugwa i mudu di teigo, ye prukwa. Ka i prisre, Josep ye hos karis mina unabedi hos karis tau agiglema togwa i ama kandre, dem muduo aragan erukwa. 28Ye neno Israel dem muduo aragan eruko, ye yegl dugwa, Ana prawa, ene na wana Josep kor moglme digwa i, kaima digwa pamiwa. Na pi ye kandre, okuo goraluwe di, yegl dugwa.
Valgt i Øjeblikket:
Oknayene Ibo 45: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission