Oknayene Ibo 46
46
Israel ye yobama bogl ede dumo Isip eigwa
1Ana yegl pre Israel ere mogl, ye taragl ere kuglkwa ya bonaganamo mudu idre, ede Isip enagledi ogwa. Ye ede pi dumo Berseba we digwa i plau didre, ye ere mogl, tawa tau ye nem Aisak Godmo togwa. 2Ye God tawa tedre, ye eduer gumuglomugl eruko, God ye ka ta dugo, prukwa. God agle di, Jekop yo dugo, Jekop We, na mogliwe dugwa. 3Jekop yegl dugo, God ye di te, yegl dugwa, Na God, ene nen Godmo moglka. Ene ede Isip enatnga i, kudugl goglkro! Ene en, ene gawanma dumo i meglbi, na ye mere kide moglsre, yugobuno pere ta moraiglmedi ere edenaglka. 4Ene ede Isip enatnara i, na ene bogl akie obugl, ene sugl moraglka. Te, okuo na ene gawanma agre i ede ikne unaglka. Te, ene goratnga igne, ene Josep bogl akie miur, goratniwe di, yegl dugwa.
5Ana God ka yegl di kodugo, Jekop yobama bogl ere mogl, dumo Berseba i kide kodidre, ede eigwa. Ede eigwa igne, ye wama ere mogl, ye ebino gagro ya ye neno Jekop i hos karis mina edidre, ede eigwa. Hos karis i, Isip king ye Jekop hos karis mina unabedi Jekop wama togwa. 6Ye ebino gagro ya neno Jekop i hos karis mina edigo, Jekop ye gagiglma ya gawama bogl mudu ye aglno buglano ya bonaganano dumo Kenan mogl, yuigwa i, idre, ede Isip pi plau digwa. 7Jekop ye wama ya abugloma mudu idre, ye gawama ama mudu idre, ede dumo Isip ogwa.
8Ana Jekop gagiglma ya gawama mudu ede Isip eigwa i, ye kagno magigl i paugwa.
Jekop wam komono i, kagie Ruben we digwa. 9Ruben yagl gak tau kuglkwa, kagno Hanok ya Palu ya Hesron ya Karmi. 10Te, Jekop wam ta Simeon we, ye yagl gak tau kuglkwa, kagno Jemuel ya Jamin ya Ohat ya Jakin ya Sohar ya Saul. Saul i, ye mam Kenan abu ta moglkwa. 11Te, Jekop wam ta Livai we, ye yagl gak tau kuglkwa, kagno Gerson ya Kohat ya Merari. 12Te, Jekop wam ta Juda we, ye yagl gak tau kuglkwa, kagno Er ya Onan ya Sela ya Peres ya Sera. Ba Er ya Onan suo akie dumo Kenan mogl, giurka. Ana Juda wam Peres ye ama yagl gak suo kuglkwa, kagno Hesron ya Hamul. 13Te, Jekop wam ta Isakar we, ye yagl gak tau kuglkwa, kagno Tola ya Puva ya Iop ya Simron. 14Te, Jekop wam ta Sebulun we, ye yagl gak tau kuglkwa, kagno Seret ya Elon ya Jalel. 15Yagl i Jekop ya Lea dumo Mesopotemia mogl, yagl gak kiurka i kagno paugo, yagl gak i wanoma ama kagno paugwa. Te, ye ama abai gak ta kiurka, kagie Daina we digwa. Lea gagiglma ya gawama i swara ede, 33 meglkwa.
16Ana Jekop wam ta Gat we, ye yagl gak tau kuglkwa, kagno Sifion ya Hagi ya Suni ya Esbon ya Eri ya Arodi ya Areli. 17Te, Jekop wam ta Aser we, ye yagl gak tau kuglkwa, kagno Imna ya Isva ya Isvi ya Beria. Te, ye abai gak ta ama kuglkwa, kagie Sera. Ana Aser wam Beria ere mogl, yagl gak suo kuglkwa, kagno Heber ya Malkiel. 18I Jekop ebie Silpa wama kagno paugo, ye gawama ama kagno paugwa. Silpa i, Laban okna ye abuglo Lea nigl kogonmo ere tenabedi togwa. Ye wama ya gawama i swara ede, 16-pela meglkwa.
19Ana Jekop ebie Resel we, ye Josep ya Benjamin kuglkwa. 20Ana Josep dumo Isip moglkwa igne, ye ere mogl, abu Asenat yugo, ye yagl gak suo kiurka, kagno Manase ya Efraim. Asenat, ye Potifera abuglo moglkwa. Potifera i, ye dumo Heliopolis moglsre, Isip yoba godno tawa togwa yagle moglkwa. 21Te, Jekop wam okuo Benjamin we, ye yagl gak tau kuglkwa, kagno Bela ya Beker ya Asbel ya Gera ya Naman ya Ehi ya Ros ya Mupim ya Hupim ya Art. 22I Jekop ebie Resel wam suo kagno paugo, ye gawama ama kagno paugwa. Ye wam suo ya gawama i swara ede, 14-pela meglkwa.
23Ana Jekop wam ta Dan we, ye yagl gak ta kuglkwa, kagie Husim. 24Te, Jekop wam ta Naptali we, ye yagl gak tau kuglkwa, kagno Jasel ya Guni ya Jeser ya Silem. 25I Jekop ebie Bilha wama kagno paugo, ye gawama ama kagno paugwa. Bilha i, Laban okna ye abuglo Resel nigl kogonmo ere tenabedi togwa. Ye wama ya gawama i swara ede, 7-pela meglkwa.
26Ana Jekop gagiglma ya gawama, yoba bormai swara meglkwa mudu ede Isip eigwa i, yoba 66 eigwa. Yoba 66 i mina Jekop ebiama kere i suna edekrikwa. 27Te, Josep dumo Isip moglkwa igne, ye yagl gak suo kuglkwa. Yegl pre Jekop ye wama ya gawama bogl akie ede Isip eigwa i swara ede, 70-pela meglkwa.
Josep Isip makan buglo bogl togo, ye kipai meglkwa
28Ana Jekop yobama bogl ede Isip pi plau digo, Jekop ere mogl, Juda ede okna pidre, Josep moglmara enabedi dedugwa. Ye ede pi Josep moglmara pidre, siragl konbauna duglo beglbi, ede Gosen enaiglkwa i, di prabedi dedugwa. Dedugo, ye ede ogo, Jekop yobama bogl ye mokomugl u, dumo makan Gosen we dimara wigwa. 29Te, Josep we, ye karismo ere wakai ersre, ede dumo Gosen pi ye nem Israel kanagledi ede ogwa. Ye pi nem kidagl moglmara plau didre, ye nugo kugro, ege olto kai erukwa. 30Kai ere kodugo, Israel ere mogl, ye wam Josep yegl di togwa, Na ene kam kuade goglnedi prika ba erme ene kor motngo, na ene guman dran kaniga. Yegl pre na erme goraglka i, aragan erie di, yegl dugwa.
31Ana Josep ere mogl, ye agiglema ya yobama mudu i yegl di togwa, Na ede pi king moglmara pidre, ye yegl di tenaglka, Yagl kade yo, na agrama ya yobanama mudu dumo Kenan kipaigwa i, ede u na moglmara wigwa. 32Yagl wagle i we, ye sipsip ya ki sugl meglkwa yagle meglkwa. Ye sipsipno ya memeno ya kauno ki idre, bonaganano ama mudu idre, ede wimiwe di, yegl di tenaglka. 33Ana king ere mogl, ene wio dinan, ene ede ebi, ye ene di pre, Ene siragl kogon erikwa, meglme? di, yegl dinan, 34ene di ikne ede, yegl dinaiglkwa, No ene nigl kogonen yoba mere yegl muniwa. No kumugl munga igne ede u erme munga i pra, no kowano awano erimere ere, sisip ya ki sugl muniwe di, yegl dinaiglmiwa. Ene yegl dibi, ene dumo makan Gosen magigl i kipai moraiglkwa i, king prawa dinabuka. Isip yoba mudu ye sipsip sugl meglkwa yoba kide kanigwa pre ene ye meglmara moglkre, dumo Gosen magigl i kipai moraiglmiwe di, Josep yegl dugwa.
Valgt i Øjeblikket:
Oknayene Ibo 46: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission