Beliebte Verse in Mataayo 7

Teilen

“Musabhe Eryobha na niinyu mokuhaabhu. Mutabhare na niinyu mokubhöna, moraköngʼööta eghisëku moghwighoreru

gho kubha omooto wowoose uno aghusabha, Eryobha ndekomuha, wowoose uno aghutabhara, Eryobha ndekomuha. Wiiki, wowoose uno aghuköngʼööta eghisëku, Eryobha ndekomwighorera orwighe.

“Mbe, omooto wowoose uno akooghu amangʼana ghaane na ghoghaköra, natuubhiine no omooto uno anyi na amangʼiini uno abhëkiri anyumba yaache mwitare.

“Mbe, mobhakörërë abhaato abhande kinya bhuure mokwënda bhabhakörërë inyu. Kiyo nikyo egheteemoro ke meghiro ghe Musa na ameeghi gha bharööti.

Amare ekehita kino ghekwërëkëra mo‑bhuhöru n‑gheghute, na anchëra e kwërëkëra iyo n‑inkërëghësö, n‑abhaato bharëngʼaaneru hangʼu bhano bhaghotora koyimënya anchëra iyo.

“Musöhë gho kohetera mo‑kehita egheghute, gho kubha ekehita eghighare ngekwërëkëra mo‑ghosireekerera, na anchëra e kwërëkëra iyo n‑ingare chwee. Wiiki, abhaato bhano bhakohetera‑mu, m‑bhaaru.

Nangabha moonyi bha masari, mweche kobhaha abhaana bhaanyu ebheghiro ebhichömu. Mbe! Taanyi hëënë kubha, Taata waanyu uno anyi Mwishaaro naghuköra ghokera ghayo? Mahëënë nakobhaha ebhichömu bhoose bhano bhakomusabha!

“Motatenera ekiina abhande, motaacha na niinyu ghoteneru ekiina ne Eryobha, gho kubha iryo ndekobhatenera ekiina kurëngʼaana na kebhuno moghotenera ekiina abhande. Wiiki ekirëngërë kino mokurëngëra abhande, nikyo kiyo kiyo na niinyu Eryobha rekobharëngëra.

Amare omooto wowoose uno akooghu amangʼana ghaane, ange ghoghatereera, uyo, natubhiine kinya omooto omuraghaanu uno abhëkiri anyumba yaache mo‑mwishekeenya.

“Ngwake okumööhërëri aghasaara kano kaanyi mo‑riiso re mughëndi waacho, amare tookorighi eghisaara kino keenyi mo‑riiso reecho? Wiiki, nibhu oghotora komobhoorera omughëndi waacho kubha, ‘Tigha nekaruusi aghasaara kano kaanyi mo‑riiso reecho,’ eriibhagha iye mwene noonyi ne eghisaara mo‑riiso reecho?

“Mubhe miisho na abharööti bha bhuröngö. Ibho hano bhakobhatambana, mbaghwiköri kubha kinya changʼöndu. Amare mo‑metema gheebho n‑chasuuche ihaari. Bhayo mokobhamënya kwo makorobhese ghaabho, gho kubha abhaato bhataaghotu chaseeke mo‑mote o sagharame. Wiiki, bhataaghotu amakorobhese gha chasabhiibhu mo‑mete ghe michongoma.

Mbe, omote omuchömu nohaasönga amakorobhese amachömu, amare omote omobhe nohaasönga amakorobhese amabhe.

Toonyi‑ho mote omuchömu uno oghusönga amakorobhese amabhe. Wiiki, toonyi‑ho omote omobhe uno oghusönga amakorobhese amachömu.

Mbe, omote woose uno otaaghusönga amakorobhese amachömu, nokonungu na kurëkëru mo‑mororo.