METHIU 15
15
Fhuwven ae Empurah
(Mk 7.1-23)
1Changlaenche Jerusalem tanii Pharisi aere thiimthang aeng Jesu ningna theng aeka ensii, 2“Yngkhaena nasebok aeng upa ae purahchu reeh aeka engkik isuwru ing thaemin ensahva?” 3Jesu ing eningna abasang, “Nenuwcha ynchii khaena nenpurah ing Thangnang chongchu nenbakhiiva? 4Thangnang ing ariir chuve, ‘Nangnuw nangpa ijaara, amanche achuw yngkheh ing amnuw ampa taklina siraap pinave thikrasii achiisa.’
5Changvakonchu nenuw ing nenriir-nah, nang ing kaningtanii ikanii phava nachiichu Thangnang ting kapeehpa tanave, ama ing amnuw changmahka ampachu ijaamah khangnakho aruva. 6Chukhaenache nenuw nenpurah ingkhe Thangnang chongchu teen-taen seemmahchuw. 7Isachaang itu ae! Isaia ing nenuw nengkhaena hungsuwh vachii ichum ing ariirsa!
8‘Enerna chembe ki eejanah ae,
Changvakonchu embarungriir chuve kithoh yndahpaknung;
9laaruw paam isii ibuwr dichu,
Thangnang chong pangeng ichii ing,
mee vakhaechu manchuw aeka vensasah ing ynrumnah ae.’ ”
Laaruwmee Ynthiingniimah Peeh
(Mk 7.14-23)
10Amana Jesu ing mee aechu enka ariir, “Rungaeruw vokhehkho mang-huwruw; 11baeting ijungruwh ingkhe meechu manchohmah, changvakonchu baetanii ihungsuwh inche meechu amanchohnah.” 12Changlaenche asebok aeng Jesu ningna vak aeka ariir ae, “Nachong kha Pharisi aeng ensiitahna embarung isiikha namanghuw mahva?” 13Jesu ing abasang ae, “Thangbaenna ong kapa ing aphin chumahnaka asanaen ing imuwng chaap arajung thoh aangkheng ymphichir vaata.”
14 #
Luk 6.39
“Enuwkha bathen aeruw, enuw i mikchu mikcheerpae, mikchu ing mikchuchu cheernave engaaniimeh ing yngkuwng sungting bukvaatae. 15Pitar ing atae ithuwh chong ing mandeeng chiika nariirkha keningna iriirpeehra achii.”
16Jesu ing ariir, “Nenuwkho ata-raen ipha ing nemanghuwmah riva? 17Ynsah vakhae venting jungruwhka vokhehkho taang suwhna ichii nemanghuwmah riva? 18#Met 12.34Nerna hungsuwh vakhaechu barungriir sungtaniiva, ama inche meechu aman-chohva. 19Ama vakhae chuve isamah barungriir, miktheh, reentaang rumee fhuwsar taklina ichuwhmah itu, vokhehkho naamak itu, lamruw, ichummah saarkhii itu, mee irensah, hava vakhae i barungriir tanii ihungsuwhva. 20Hava vakhae inge mee amanchohnah; changvakonchu kik chaamru ing thaemin isah inche mee manchohmah.”
Kanaan Rupanuw Thacha
(Mk 7.24-30)
21Ama denchu Jesu ing bathenka Taire re Sidon paamting sisa. 22Amana Kanaan tanii rupanuw yngkheh ing Jesu ningna thengka ichap ing iva uungsah, “O Aafhuw, Devit sapa, naning imanchuwhsara, kasanuw taklina umlae ing chuwngka ichiisuwhpak ing omna.” 23Chang-vakonchu Jesu ing basangmah dehsa. Chutahnache asebok ae ing Jesu ningna hava rupanuw i eenuw jiika uungbirna ibathenpeehra ta aeka athamsahpae.
24Changlaenche Jesu ing aba-sang, “Ki chuve Isrel siti ymmoh ae khaenapang ynjenchiir vatah.” 25Changvakonchu rupanuw inche vakka vokhehkho athamsah, “Aafhuw, Ibomsara!” 26Changvakonchu Jesu ing basangka ariir, “Naepang ae sahfhuw tarchu uti ting ipeeh chuve chum-mahnii.” 27Rupanuw inche chumne Aafhuw, changvakonchu aafhuw thaesahnii tanii ibuw aanta rapkho uti aeng ensahnah taka abasang. 28Amana Jesu ing aningna abasang, “O sanuw, nang nathacha inempak pirna! Namanden inuwzii ing phasara.” Amana sanuwchu damsa.
Jesu ing Ina Mee Inempak Amandam
29Jesu ing ama paamchu bathenka Galili chifhuw kuurna hungsisa. Amana reen yntongting hangkarka ongsa. 30Changlaenche mee inempak ing aningna theng aeka khibong, mikchu, achong isuwhmah, reentaang ina aajaeh veruw aeka Jesu ningnache amansirpae, amana enuwchu ama ing amandam chirpae. 31Amanache achong isuwh mahkho suwhsa, khibong ingkho isi achehpa, mikchu ingkho imusah aphapa, reentaang ina vakhae chukho amandam chirpa. Ama vakhaechu mee vakhae aenche emutah nache ngiksae vokhehkho enuw ing Thangnang inempak amanpahpae.
Mee Lising Manrii Amamaar
(Mk 8.1-10)
32Jesu ing asebok aechu eenka eningna ariir, “Havane ong mee vakhae i kaning amanchuwhnah ae, thaemin sarudeh aeng inii nithumchak inuwthoh onghak samuw. Ki ing enuw i venchaam thoh mangkae ae ningka tamah ing, akhaechuve lamna enven ichaam ing tam ing suwr ae naka itiihkho arusae.” 33Amana sebok aeng embasang, “Yndahpak paambing sungne mee hangjaeh inem aansuwhnii tarchu una rivakente?” 34Jesu ing eningna asiipae, “Nenuw incha tar aajaeh nenreensa?” Tar sarii re ngadii topoh tahna ta aeka embasang. 35Amana Jesu ing mee vakhaechu ruwruwna ongnii khaena ariirpa. 36Amana tar re ngachu chika Thangnang chu manpahka abakhiipa, amanche asebok ae ningtingche jepika, asebok ae inche mee changjaeh inemchu apeehpae. 37Mee vakhae inche enven ynva ing ensahpa. Abariichu sebok aeng engkhuum tahnache buruk sariimeh bariisa. 38Imaar mee vakhaechu rupanuw naepang ynvaeru ing pasar lising manrii empha. 39Aanuwnache Jesu ing mee vakhaechu mangkaeka Magadaan ichii paam tingche ruwkuwngna sisa.
Zur Zeit ausgewählt:
METHIU 15: MOYO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.