METHIU 16
16
Jesu ningna Laetho yndangnii enjong
(Luk 12.54-56; Mk 8.11-13)
1 #
Met 12.38; Luk 11.16 Pharisi aere thiimthang aenche Jesu ningna theng aeka menkenta enchii khaena keningna thangbaen tanii laetho mandangla enchii. 2Changvakonchu Jesu ing eningna abasang, “Khuri ajungvirae nenuw ing vaangseng takna, khuw sakvaata nenchiinah. 3Ziing ahenpha nachembe vaangseng takna lamkho uwna; ataniive khuw suwrvaata nenchiinah. Nenuw ing minvaen ziih inuwzii ing ynchii suwhvaate ichii nemanghuwsa, changvakonchu laetho apha chuve nenuw manghuw chehmah tanuw. 4#Met 12.39; Luk 11.29Ichamah vokhehkho ichuwhmah siti aenche laetho yndangchu ajongnah ae, changvakonchu Jona laetho yndang chumah naka reentaang laetho yndangnii pimah ningchuw.”
Pharisi aere Saduki ae Chor
(Mk 8.14-21)
5Sebok aeng siaeka chiilaar engkah nuwna tar ireen embahirchu engaansiipa. 6#Luk 12.1Chutahnache Jesu ing eningna ariir, “Nenuw Pharisi aere Saduki ae chor khaena ynriimruw.”
7Enuw enareersahna yngkheh yngkheh chongsae, “Ama ing ariir havi inuw ing tar ynreenmah khaenava.”
8Amachu Jesu ing amanghuw tahnache ariir, “O topoh pangti thacha om ae, nenuw ing tar nenreenmah khaena nentaksahna ynchii khaena ichong vachuw? 9#Met 14.17-21Nenuw ing ataenpha nemanghuwmah riva? Tar runga ing mee lishing runga ympika amanche abarii buruk aajaehmeh nemangkong nengaansiimahva? 10#Met 15.34-38Changpang mahka athar tar sarii ing mee lising manrii ympika amanche abarii buruk aajaeh nemangkong? 11Ki ing tar khaena ichong mahping ichii ynsaangkhe nenuw ing nemanghuw mahva? Chukhaenache Pharisi aere Saduki ae chor khaena ynriimruw.”
12Changlaenche chor ynvae tar khaena ichong mahva, Pharisi aere Saduki ae chongzeer nakhe ynriimruw achiiniiva ichii emanghuwpa.
Pitar ing Jesu chu Khrista va taka ariir
(Mk 8.27-30; Luk 9.18-21)
13Jesu ing Kesaria Philipi paam nache ahungsirae ama ing asebok ae ningna asii, “Mee aencha Mee Sapa i achuwva ta aeka ariirnah ae?” 14#Met 14.1,2; Mk 6.14,15; Luk 9.7,8Enuw ing enriir, “Achuw yngkheh ing Baptis Johon vachii, achuw yngkheh ing Elija vachii, areh aenche Jeremia chuva amanche Thangnang Jaephar chuva ta eka ariirnah ae.”
15“Nenuw incha ki i achuwva ynchiinahchuw?”
16 #
Jhn 6.68,69 Simon Pitar ing abasang, “Iring Thangnang sapa Khrista chuvachii.”
17Amana Jesu ing Pitar ningna abasang, “Simon Bar-Jona, nang saknachii! Havi laaruw hakchaang re sii ing naninga imanriir vachii chongmahva, changvakonchu havi chuve thangbaenna ong kapa ning-taniiva. 18Amatah nache naningna kariirnah amachuve nang i Pitar vachii, hava rung takline ki karuwrthiing mangiirva kata, amachu ithii ruwreng inche utaenkho chehmahnii. 19#Met 18.18; Jhn 20.23Ki ing thangbaen iruwng lipah longtingchu naningna pivakachii; laaruw paamna nang ing naphuwpchu thangbaen nakho ynphuwp vaata, amanche laaruw paamna nabathenchu thangbaen nakho ynthen vaata.” 20Ama aanuwnache Jesu ing asebok ae ningna ki i Khrista chuva ichii achuw ningnakho riirmahdehruw taka ajeerpa.
Jesu ing Ijachaam Phavachii vokhehkho Thikvachii maen ing Ajeer
(Mk 8.31; Mk 9.1; Luk 9.22-27)
21Amanache basenka Jesu ing asebok ae ningna isajaeh ing ariirpa, “Ki Jerusalem ting siningka upa ae, aanchung jaethiim ae amanche thiimthang ae kikna ijachaam aajaeh kakhaang inuwna ithehvaatae, changvakonchu aanuw inii nithum nache hangring vakata.” 22Amana Pitar ing Jesu chu ruwka arakuh, “Aafhuw, Thangnang ing rumahnii, ama changchiichu naningna utaenkho suwhmahnii.” 23Jesu ing Pitar ningting vaanlehka ariir, “Umlae, katuknung ting ong! Nang ing kama namansiknah, akhaechuve nang ing namanden ive Thangnang tanii mahva, laaruw paam taniiva.”
24 #
Met 10.38; Luk 14.27 Amana Jesu ing sebok ae ningna ariir, “Achuw yngkheh ing kaanuw jiiningka tanave, ataksah ing ynjuursa rasiing, vokhehkho akhros chu idomsana ijiirasii. 25#Met 10.39; Luk 17.33; Jhn 12.25Achuw yngkheh aringkum karningka achii mee inche imaangchu phavaata; changvakonchu ki kakhaena aringkum imaang mee chuve iringchu phavaata. 26Achuw yngkheh ing laaruw paam vakhae phakhang nakho, alaetha mamaang nacha ynchii kaaniivaate? 27#Met 25.31; Rom 2.6Mee Sapa inche ampa aruwreng thoh, avaarmee aethoh ajuwnglaenche, mee vakhae ing ama ama ing atu ari inuwzii ing nongmen phasa vaata. 28Ki ing neningna atatak ing kariirnah, havane mee topoh ingiir ae i Mee Sapa ing aaruwng lipah thoh ijuwngchu emumahtaang ithiichu mumahnii ae.”
Zur Zeit ausgewählt:
METHIU 16: MOYO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.