MATIU 28
28
Chisɔsi‑a a kɔɔ sɔ, a ka saya ɔ
(Maki 16:1-10; Duku 24:1-12; Chɔn 20:1-10)
1Suin tee chɛ ben‑da kɛn, mbɛ Tɛnɛ kan kɔ dɔɛ sayi ma che‑a. Mɛi min ka‑a Makadaa duu ɔ, a ta‑a wan kamba chɛ ma, an fea Mɛi dɔndɔɛ a. 2A yen ko gbɛ, an tɛnɛ‑a a a, mbɛ duu gboo bun‑da samba‑a, mbɛ Mansa Yataa 'a maeka dɔndɔ wɛɛ yii‑a. Maeka chɛ‑a faa gban chɛ ka wan kamba chɛ da a, mbɛ a si‑a a kun ma. 3Ɛ si ɔ kɛn nɔ, a ni man tena wan, yɔ banda manɛ, mbɛ a ma koa wɛɛ gbɛenɛ ɛ fo fo, yɔ fande funku. 4Soya miin ni ka kamba chɛ kun ma fɛn‑da, an chian‑da wan a ma kaka. Chɛ‑a a ma wan, mbɛ an bea‑a duu ma, an chima‑a yɔ su.
5Chɛɛ maeka chɛ‑a a fɔ wan musu chɛ n ye, a ɔ, “Wo ma chian. A mu min na, n‑na a ɔ sɔn fan, mbɛ wo e wo ya a kan tena Chisɔsi an na, an‑na min gbangban kɔn gbengbandenɛ ma, a tɔn‑da kaina. 6A ee nɛ. Yataa‑a a ma, a‑a a a sɔ a ka saya ɔ, yɔ a wandi na‑a a fɔ buɛ min dɔ, mbɛ ɛ ma‑a ka wan. Wo na nɛ. Wo ni nɔ yen, a ni sa ɔ kaina min. 7Mbɛ n 'na sakana bai an nɛ wo tena gbɛ. Wo yɛ gbɛ bui‑a, wo ni a fɔ a fɛ mɔɛ n ye, wo ɔ, Yataa‑a a kɔɔ sɔ a ka saya ɔ. Wo ɔ, a sin, ɛ ta tena an ya ɔ Kadidi chɛnyɛ ɔ, an mbe a yen‑da kaina min pɛnɛnɛ.”
8Mbɛ an yɛ‑a bui chɛ bui chɛ‑a. An ta‑a, chiandia ɛ an dɔ, chɛɛ an bu ɔ ni di kaka. Mbɛ an ta‑a koe chɛ ɔ yian koe a a fɛ denɛ n na.
9An mbe ta‑a bui chɛ chɛ an na, mbɛ a yen ko, an‑na Chisɔsi yen sɔ ɔ an ya ɔ. Mbɛ a‑a an kɔndɔn, a ɔ, “Wo en chɛɛ n na.” A‑a an kɔndɔn kɛn, mbɛ an bea‑a a chen na, an‑na a chen kana bia, mbɛ an‑na a fai. 10Mbɛ Chisɔsi ɔ an ma, “Wo ma chian. Wo ta, wo ni a fɔ n suun ma nyɔɛ n ye, mbɛ an ni ta Kadidi chɛnyɛ ɔ. An mbe n yen‑da wan nɔ.”
Kamba ma koe, soya n‑na a ɔ yian
11Musu chɛ n mbe yɛ‑a, a yen ko, mbɛ soya chɛ dɔ n bɛɛ yɛ‑a duu ɔ. Mbɛ an si‑a ko ɔ ko ma, maeka chɛ‑a min ma kamba chɛ ma, an‑na a ɔ yian Chu n tɛ mɔɛ nu Yataa a, an 'na mansa n na. 12An‑na bai chɛ a min, soya chɛ n‑na min dɔ yian. Mbɛ an‑na an kun puin fan kaina dɔndɔ, an bɛ Chu n 'na gbakoo n na. Mbɛ an‑na kɔpɔ sɛmbɛnden ya, mbɛ an‑na soya chɛ nu, miin ni kamba chɛ kun ma fɛn tena, an‑na an da a tɔn a a. 13An dɔ, “Ni mɔ ɔ mɔ‑a wo ɔ tisa, a si Chisɔsi su tuin koe ma kamba chɛ ɔ, wo‑a a fɔ dechee, mbɛ wo to‑a sa ɔ chinɔɛ ɔ wan, mbɛ a fɛ denɛ n na‑a su ɔ, mbɛ an‑na a su kanka.” 14An yɛ‑a wan to, an‑na soya chɛ n too ɔ dia. An dɔ, an faa ma gbaa, ni kɔfana‑a a a min bɛɛ, mbɛ an chinɔ‑a wan. An dɔ, an mbe koɔ‑a wan a tena, min mbe a ma, ko ɔ ko ee bɔ‑a a ɔ.
15Mbɛ an‑na kɔpɔɛ chɛ bia, an‑na a ma yɔ a fɔ‑a buɛ min dɔ an ye. A ka gbɛ a tima chɛ ma, a che gboo chɛ nyɛn tima ma, Chu mɔɛ n mbe bai dɔndɔ gbe chɛ an dɔ yian. Mbɛ Chisɔsi fɛ denɛ n fan na‑a a su kanka, a bɔ kamba ɔ.
Chisɔsi‑a a wandi yian a fɛ denɛ n na
(Maki 16:14-18; Duku 24:36-49; Chɔn 20:19-23; Chisɔsi 'a Sɔ Mɔɛ Nu 1:6-8)
16Mbɛ Chisɔsi fɛ den tan kun ma dɔndɔɛ miin to‑a ka, an ta‑a Kadidi chɛnyɛ ɔ. An ta‑a wan kɔnkɔɛ dɔndɔ ɔ, Chisɔsi na‑a a fɔ an ye, an ni ta kaina. 17Kɔnkɔɛ chɛ ɔ ni, mbɛ an‑na Chisɔsi yen. A na‑a an tan kɛn, mbɛ an bea‑a a chen na, mbɛ an‑na a fai. Chɛɛ an dɔ nu, an nii ma dan ni a a chɛndɛ chɛ ni an nɛ. 18Mbɛ Chisɔsi gbɛn‑da an ma, mbɛ a ɔ, “Fa min mbe banda bu ɔ, a‑a gbasaya gbɛɛ be n ma, fen fen kan kɔ kan kun ma, banda bu ɔ a basan dunya chɛ ma a. 19Chɛ an‑na a fɔ, wo ta mɔɛ n gbɛɛ tena dunya chɛ gbɛɛ ɔ, mbɛ wo‑a an ma n fɛ denɛ n na. Wo ni yɛ, wo ni yii chɛ an kunɛ ɔ Fa Yataa tɔɛ ɔ, n tɔɛ ɔ, a basan Yataa Nyina tɔɛ ɔ a. 20A sin, wo ni mɔɛ n kan sawa chɛ n gbɛɛ bia koe a, n na‑a miin be wo ma. Wo sin ni dan to a a, mbɛ n mbe ma‑a wan wo fɛ tima ɔ tima, aan dunya chɛ ni ban bɛɛ.”
Zur Zeit ausgewählt:
MATIU 28: KONONT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
New Testament in Kono © The Bible Society of Sierra Leone, 2006.