Smnlean 23
23
Maruy Dxeral Rbungan na Sarah ka Abraham
1Betaq 1'20 kndusan na ka Sarah, kiya ka kana kndesan na. 2Mhuqil Qiryat Arba gaga Kenaan hiya, kiya ka Xebron ka hiya. Abraham we meyah tsdamac Sarah mklmingis nheya ka heya. 3Kiya de mtutuy ka Abraham, mlatac berah seediq nhuqil. Mosa rmengo seediq Xet: 4“Yaku we seediq ku mtnooda, nii ku meniq yamu hini. Srwai ku hiya, biqi ku 1 dxeral habung, sskuun mu mqedil mu. So uxe meniq berah mu ka heya.” 5Rmengo Abraham ka seediq Xet: 6“Pusu qbsuran mu, qbahang. Paru su ba mdudul spruun qmita ckceka nami hini ka isu. Seku rmabang bale malu dxeral menan hini ka seediq mnhuqil su. Yami we mpuuka ani ima ka mphetur isu mpseku su seediq mnhuqil su meniq dxeral habung na.” 7Kiya de, mtutuy ka Abraham, tmgakac thmuku mquri seediq Xet ka heya. 8Rmengo dheya: “Netun namu smruwa phabung ku mqedil mu hini, so maha uka meniq berah mu ka heya, braho namu bale bhangi ku hiya. Sai ku hiya rmengo ka Epron laqi Coxar. 9Pbrigi ku hiya kenan ka lhengo Makpelah gaga ssiyo puting bale dxeral na hiya. So bbaruy bale ba knkrayan na namu brigun namu kenan, ngngalun mu dxeral habung meniq ckceka namu.” 10Ciida, ga tleung ckceka seediq Xet ka Epron. Cmiyuk rmengo Abraham ka Epron seediq Xet, srengo na dseediq Xet ga mkkesa rhengun alang hiya: 11“Uxe, pusu qbsuran mu qbahang. Bege mu sunan ka dxeral nii, ani so lhengo gaga ckceka dxeral hiya uri we bege mu sunan uri. Meniq ku berah doriq kana dseediq mu mege sunan, so su maha rmeus seediq mnhuqil.” 12Kiya ka tmgakac thmuku berah dseediq hiya ka Abraham. 13Rmengo Epron ka heya ma, pqbhangun na kana seediq hiya uri: “Netun su smruwa, braho su bhangi ku hiya. Bege mu sunan ka bbaruy mu dxeral. Braho su bale ngali ka pila nii. Kiya de maha ka malu rmeus seediq mnhuqil mu hiya da.” 14Cmiyuk Abraham ka Epron: 15“Pusu qbsuran mu qbahang, 4'00 skere ging ka dxeral kiya we, maha so knhenu tikuh meniq ckceka ta ka kiya da peni? Sai phabung hiya ka seediq mnhuqil su wa!” 16Mbahang kari Epron ka Abraham. Abraham we muyu bnhangan na peeyah dseediq Xet de, mangal ging, seengun na 4'00 skere ging wada na sbege Epron.
17So kiya de, Epron we wada na qhdeun maruy ka qnpahan Makpelah ga sipo Mamre, lhengo ckceka hiya ma, kana qhuni ssiyo dxeral hiya. 18Meniq berah doriq dseediq Xet mkkesa rhengun alang hiya, wada na brigun Abraham ka dxeral na. 19Bobo na, Abraham we ngalun na ka mqedil na Sarah, pbqresun na lhengo qnpahan Makpelah sipo Mamre, Xebron we dxeral Kenaan hiya. 20Peeyah ciida, dxeral kiya ma lhengo ckceka qnpahan kiya we speeyah seediq Xet wada sbege Abraham mpdxeral habung Abraham da.
Zur Zeit ausgewählt:
Smnlean 23: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020