Daa 4
4
Kainu ń Abɛlio
1Adamu a na Ɛva dɔ̃̀ nɔɛ ũ, ɔ̃ à nɔsì, à Kainu#4.1 Bee mɛ̀ ma nɛ'ì ì. Ɔ̃ à mɛ̀: Ma gɔ̃ɛ ì ń Dii gbãao. 2Ɔ̃ à aà dãuna Abɛli ì lɔ. Abɛli kɛ̀ sãdãna ũ mɛ́ Kainu kɛ̀ sɛ̃wana ũ. 3Gɔɔewa Kainu mɔ̀ ń a buapɔɔ à Dii gbà. 4Abɛli sɔ̃ à mɔ̀ ń a sãnɛ sɛ̃ia mɛkpaao. Abɛli yã kà Diigu, ɔ̃ à aà gba sì.#Hɛb 11.4 5Kainu sɔ̃, aà yã i ka Diiguo, ɔ̃ i aà gba sio. Ɔ̃ Kainu pɔ pà maamaa, aà oa ɔ̃ɔkpà. 6Ɔ̃ Dii ò Kainuɛ: Bɔyãi n pɔ fɛ̃̀ii? Bɔyãi n oa ɔ̃ɔkpài? 7Tó n zɛ ń yãmaao, n oa aɔ weeao le? Tó ni zɛ ń yãmaao sɔ̃o, duuna naalɛnɛ n kpɛɛlɛ. N ni lɛ́ aà dɛ, sema ǹ zĩblewà.
8Ɔ̃ Kainu ò a dãuna Abɛliɛ: Wà gɛ́ sɛ̃u. Kɛ́ aa kà we, ɔ̃ à fɛ̀lɛ ń a dãunao, à aà dɛ̀.#Mat 23.35; 1 Zãa 3.12; Yud 1.11 9Dii Kainu là à mɛ̀: Má n dãuna Abɛli kuui? A wèwà à mɛ̀: Má dɔ̃o. Ma dãuna dɔ̃anan ma ũa? 10Ɔ̃ Dii mɛ̀: Bɔ́ ń kɛ̀i? N dãuna au lɛ́ lɛzumazi za tɔɔlɛ mà zɛanɔ.#Hɛb 12.24 11Tiasa ńyɔ̃ gɔ̃ láaipɔ ũɛ, ní zãkũ ń tɔɔlɛ pɔ n dãuna au mì n ɔzĩo. 12Tó n sɛ̃wà, tɔɔlɛ a kãfĩakɛnɛo. Ńyɔ̃ɔ sɔ̃kĩikpakpa ǹyɔ̃ liaaliaa dũniauɛ. 13Ɔ̃ Kainu ò Diiɛ: Ĩadamapi gbãa dɛmala, má fɔ̃o. 14Nlɛ ma ya tɔɔlɛu la gbãɛ. Máɔ kɛ̃amaɛ sa. Máɔ sɔ̃kĩikpakpaɛ, míɔ liaaliaa dũniau, gbɛ̃́ pɔ kpàaũmanɔ i ma dɛ. 15Ɔ̃ Dii òɛ̀: Màa no! Tó gbɛ̃e n dɛ, wa n pɔ tɔsinɛ gɛ̃n soplaɛ. Ɔ̃ Dii wɛ̃sãe kɛ̃̀ Kainuwa, kɛ́ gbɛ̃́ pɔ kpàaũaanɔ su aà dɛo yãi. 16Ɔ̃ Kainu dà zɛ́u à kɛ̃̀ Diiwa. À gɛ̀ zɔ̃̀lɛ Nɔdi busuu Edɛni gukpɛ oi.
17Kainu wùlɛ ń a nɔo, ɔ̃ à nɔsì, à Ɛnɔki ì. A gbɛa Kainu wɛ̃lɛ kàlɛ, ɔ̃ à a nɛpi tɔ́ kpàɛ̀. 18Ɛnɔki Iladi ì, Iladi Mɛuyaɛ ì, Mɛuyaɛ Mɛtusaɛ ì, Mɛtusaɛ Lemɛki ì. 19Lemɛki nɔsɛ̀ mɛn plaɛ, ado tɔ́n Ada, ado Zila. 20Ada Yabali ì. Ɔ̃mɛ pɔdãna pɔ aaìɔ ku zwãakpɛuɔ dezikaau ũ. 21Aà dãuna tɔ́n Yubali. Ɔ̃mɛ mɔɔnlɛnaɔ ń kulɛpɛnaɔ dezikaau ũ. 22Zila sɔ̃, ɔ̃mɛ Tubali Kainu ì. Sian aà ũ, ì pɔpii pí ń mɔsio ń mɔgotɛ̃o. Aà dãe tɔ́n Naama. 23Lemɛki ò a naɔnɛ:
Ada ń Zilao, à ma yãma,
ma naɔ, à swãkpa ma yãi.
Gbɛ̃e ma kɛ'ĩa, ɔ̃ ma aà dɛ̀,
ɛwaasopi ma lɛɛ, ɔ̃ ma aà kàalɛ.
24Wa Kainu pɔ tɔsiɛ̀ gɛ̃n soplaɛ,
ma Lemɛki ma pɔ sɔ̃,
gɛ̃n baaɔ̃kwi ń soplao.#Mat 18.22
25Adamu wùlɛ ń a nɔo lɔ, ɔ̃ à nɛgɔ̃ɛ ì. À tɔkpàɛ̀ Sɛti,#4.25 Bee mɛ̀ gɛ̃ɛ asa à mɛ̀ Lua a gba nɛ pãle Abɛli pɔ Kainu aà dɛ̀ gɛ̃ɛ ũɛ. 26Sɛti sɔ̃ à nɛgɔ̃ɛ ì, ɔ̃ à tɔkpàɛ̀ Ɛnɔsi. Za zĩ́ bee ɔ̃ wà nà Dii sisiawa.
Επιλέχθηκαν προς το παρόν:
Daa 4: Boo2024
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Boko Bible © SIM International, 2024.