لوقا 5
5
عیسانینگ اَوَّلکی شَگیرتلِری
مَتّیٰ ۴:۱۸-۲۲؛ مَرقُس ۱:۱۶-۲۰
1بیر گون عیسی جِنیسارِت دِریاسینینگ#۵:۱ جِنیسارِت دِریا – بو جلیل دِریانینگ باشغا آدی. کِناریندا واغیظ اِدیَرکَه، خالق خودایینگ سُزونی دینگلِمِک اوچین، اُنونگ داشینا اویشدیلِر. 2شُندا عیسی دِریانینگ کِناریندا دوران ایکی قاییقی گُردی. بالیقچیلار قاییقلاردان دوشوپ، تُرلارینی یوووپ دوردیلار. 3عیسی قاییقلارینگ بیرینه مینیپ، قاییقینگ اِیه‌سی شمعوندان بیرآز اوزاقلاشماغی کِناردان خاییش اِتدی. سُنگرا اُل قاییقدا اُتوران یِریندِن خالقا اُورِتمَگه دوردی. 4عیسی سُزونی تاماملاندان سُنگ، شمعونا: «دِریانینگ چونگّور یِرینه گیدینگ-ده، بالیق توتماق اوچین تُرلارینگیزی سووا زینگینگ» دییدی. 5شمعون اُنگا: «اُستاد! تامام گیجه جان یاقدیق-دا، هیچ زات توتوپ بیلمِدیک، یُنه سِنینگ سُزونگ خاطیراسینا تُرلاری یِنه زینگایلینگ» دییدی. 6مونی آیدیلیشی یالی اِدِنلِرینده، اُلار شِیله بیر کَن بالیق توتدولار وِلین، تُرلاری-دا ییرتیلیپ باشلادی. 7شُنگا گُرَه اُلار بِیلِکی قاییقداقی یُلداشلارینینگ گِلیپ کُمِکلِشمِکلِری اوچین، اِل‍لِرینی بولاپ ایشارات اِتدیلِر. اُلار گِلیپ، ایکی قاییقی-دا بالیقدان دُلدوردیلار. قاییقلار تاس سووا باتیپدی. 8شمعون پِطرُس مونی گُرِنده، عیسانینگ آیاغینا ییقیلیپ: «اِی آقام! مِنینگ یانیمدان آیریل، مِن بیر گونَه‌لی آدام!» دییدی. 9توتان بالیقلارینینگ کَندیگینه اُنونگ اُزی و یانینداقیلارینگ هِمّه‌سی حایران قالدی. 10شمعونینگ یانینداقی یعقوب بیلِن یوحنا آدلی زِبِدینینگ اُغول‍لاری هِم مونگا حایران قالدیلار. عیسی شمعونا: «قُرقما، سِن موندان بِیلَک بالیق یِرینه اینسانلاری توتارسینگ» دییدی. 11شِیلِلیکده، اُلار قاییقلارینی کِنارا چیقاریپ، بار زادی قُیوپ، اُنونگ ایزینا دوشدولِر.
عیسی جُزامینی شِفا بِریَر
مَتّیٰ ۸:۱-۴؛ مَرقُس ۱:۴۰-۴۵
12عیسی شَهرلِرینگ بیریندِکَه، جُزاما دوچار بُلان بیر آدام اُنونگ یانینا گِلدی. اُل عیسانی گُرِنده، دیزینا چُکوپ، اُنگا: «اِی آقام، اِگِر ایسلِسِنگ، مِنی جُزامدان پَک اِدیپ بیلِرسینگ» دییّپ یالباردی. 13عیسی هِم اِلینی اوزاتدی-دا، اُنگا دِگریپ: «بُلیار، پَک بُل!» دییدی. اُل آدام شو واقتدا جُزامیندان پَک بُلدی. 14سُنگرا عیسی اُنگا: «مونی هیچ کیمه آیتماغین. یُنه گیت-ده، اُزونگی کاهینا گُرکِز و پَکلِنِندیگینگی هِمّه‌لِره بِلّی بُلار یالی، موسانینگ تابشیران قربانلیغینی بِر» دییدی. 15اِمّا عیسی حاقینداقی خابارلار باردیغچا یایرایاردی. عیسانی دینگلِمِک و مِریضلِریندِن شِفا تاپماق اوچین، اُنونگ یانینا اولی جِماغات ییغنانیاردی. 16عیسی بُلسا، کَن واقت یِکه اُزی بُش یِرلِره گیدیپ، خودایا دُغا اِدیَردی.
عیسی بیر فِلِجی شِفا بِریَر
مَتّیٰ ۹:۱-۸؛ مَرقُس ۲:۱-۱۲
17بیر گون عیسی خالقا اُورِدیپ اُتیرقا، جلیل‌ینگ هِمّه اُبالاریندان، یهودیه و اورشلیمدِن گِلِن فَریسی‌لِر بیلِن دین عُلَمالار-دا شُل یِردِدیلِر. عیسی خودایینگ قودراتی سِبَبی مِریضلِری شِفا بِریَردی. 18شُل واقت بیرنَچه آدام بیر فِلِجی دوشِگی بیلِن گُتِریپ گِتیردیلِر. اُلار اُنی جایینگ ایچینه سالیپ، عیسانینگ اُوونده یاتیرجاق بُلدولار. 19اِمّا اویشِن جِماغاتدان یانگا اُنی ایچِری سالماغا یُل تاپمانسُنگلار، جایینگ اوستونه چیقیپ، بامی سُکوپ آچدیلار. سُنگرا فِلِجی دوشِگی بیلِن بامدان سالّاپ، عیسانینگ اُوونه دوشوردیلِر. 20عیسی اُلارینگ ایمانینی گُروپ، فِلِجه: «دُست، سِنینگ گونَه‌لِرینگ باغیشلاندی» دییدی.
21دین عُلَمالار بیلِن فَریسی‌لِر: «خودایا دیل یِتیریَن بو آدام کیم؟ گونَه‌لِری یِکه خودایدان باشغا کیم گِچیپ بیلِر؟» دییّپ، ایچینده کِپلِمَگه باشلادیلار. 22اِمّا عیسی اُلارینگ نَمه فیکر اِدیَندیکلِرینی بیلیپ، اُلارا: «نَمه اوچین یورِگینگیزَه بِیله فیکرلِر گِتیریَرسینگیز؟ 23هایسینی آیتماق آنگسات: ”گونَه‌لِرینگ باغیشلاندی“ دییمِکمی یا-دا ”تور-دا، یُری“ دییمِک؟ 24اِمّا سیز اینسان اُغلونینگ یِر یوزونده گونَه‌لِری باغیشلاماغا-دا ایختییارینینگ باردیغینی بیلیپ قُیونگ» دییدی. سُنگرا اُل فِلِجه: «سانگا دییَّرین، تور، دوشِگینگی آل-دا، اُیونگه گیت» دییدی. 25اُل هِم هِمّه‌لِرینگ گُزونینگ اُوونده دِرِّو یِریندِن توردی و دوشِگینی ییغنادی، خودایی اُووپ اُیونه گیتدی. 26هِمّه آداملار حایران قالیپ، خودایی اُودیلِر. اُلاری قُرقی قاپلاپ آلدی، اُلار: «بو گون شِیله بیر گِنگ زاتلار گُردوک» دییّشدیلِر.
عیسی لاوینی چاغیریار
مَتّیٰ ۹:۹-۱۳؛ مَرقُس ۲:۱۳-۱۷
27شوندان سُنگ عیسی داشاری چیقاندا، مالییات آلیانچی لاوینی اُتیرقا گُروپ، اُنگا: «مِنینگ ایزیما دوش!» دییدی. 28اُل هِم یِریندِن توردی-دا، هِمّه زادی گُیبِریپ، اُنونگ ایزینا دوشدی. 29لاوی اُز اُیونده عیسی اوچین بیر اولی میهمانچیلیق قوردی. ساچاغینگ باشیندا اُلار بیلِن بیرتُپار مالییات آلیانچیلار و باشغا-دا کَن آداملار ناهار اییّپ اُتیردیلار. 30فَریسی‌لِر بیلِن دین عُلَمالار اُنونگ شَگیرتلِرینه: «نَمه اوچین مالییات آلیانچیلار و گونَه‌کَرلِر بیلِن بیله اییّپ-ایچیَرسینگیز؟» دییّپ زِیرِنیَردیلِر. 31عیسی اُلارا: «طِبیب ساغ آداملارا دَل-ده، مِریضلِره گِرِکدیر. 32مِن دُغری آداملاری دَل-ده، گونَه‌کَرلِری توبا چاغیرماغا گِلدیم» دییّپ جُغاپ بِردی.
آرازا توتماق بارادا سُراق
مَتّیٰ ۹:۱۴-۱۷؛ مَرقُس ۲:۱۸-۲۲
33اُلار عیسی: «یحیانینگ شَگیرتلِری باسیم-باسیمدان آرازا توتوپ، دُغا اِدیَرلِر، فَریسی‌لِرینگ شَگیرتلِری هِم شِیله، اِمّا سِنینگ شَگیرتلِرینگ اییّپ-ایچیپ یُرلِر» دییدیلِر. 34عیسی: «طُویدا داماد دُستلارینینگ یانینداقا، سیز اُنونگ میهمانلارینا آرازا توتدوروپ بیلِرسینگیزمی؟ 35اِمّا داماد اُلاردان آلینجاق گونلِری گِلِر، شُندا اُلار آرازا توتارلار» دییّپ جُغاپ بِردی.
36عیسی اُلارا شو میثالی آیدیپ بِردی: «هیچ کیم تَزه لِباسدان ییرتیپ، کُهنه لِباسا یاما سالماز. بِیتسه، تَزه لِباس هِم ییرتیلار، تَزه لِباسدان آلنان یاما-دا کُهنه لِباسا گِلیشمِز. 37هیچ کیم تَزه شِرابی کُهنه مِشیکلِره قویماز. یُغسا تَزه شِراب مِشیکلِری بُوسوپ، شِراب یِره دُکولِر، مِشیکلِر-ده ضایالانار. 38تَزه شِراب تَزه مِشیکلِره قویولمالیدیر. 39هیچ کیم کُهنه شِرابی ایچِندِن سُنگ تَزَنی ایسلِمِز، ”کُهنه‌سی قاوی“ دییِر.»
Επιλέχθηκαν προς το παρόν:
لوقا 5: TUKIR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Turkmen Truth