لوقا 6
6
سَبَّت گونی بارادا گورّونگ
مَتّیٰ ۱۲:۱-۱۴؛ مَرقُس ۲:۲۳–۳:۶
1بیر سَبَّت گونی عیسی بوغدایلیغینگ آراسیندان گِچیپ باریاردی. اُنونگ شَگیرتلِری بوغدای باشلارینی یُلوپ، اِل‍لِریندَه آورادیپ اییَّردیلِر. 2فَریسی‌لِرینگ کَبیری اُلاردان: «نَمه اوچین سَبَّت گونی قاداغان اِدیلِن زادی اِدیَرسینگیز؟» دییّپ سُرادی. 3عیسی اُلارا: «داوود بیلِن یانینداقیلار آچ قالانلاریندا، سیز داوودینگ نَمه اِدِندیگینی آصلا اُقیمادینگیزمی؟ 4اُل خودایینگ اُیونه گیریپ، کاهینلاردان باشغالارا قاداغان اِدیلِن هُدور چُرِکلِرینی آلیپ اییدی و یانینداقیلارا هِم بِردی» دییدی.#۱ سموئیل ۲۱:۱-۶ 5عیسی اُلارا یِنه-ده: «اینسان اُغلی حتّیٰ سَبَّت گونونینگ-ده حُکومداریدیر» دییدی.
6باشغا بیر سَبَّت گونی عیسی کِنیسه باریپ، خالقا اُورِتمَگه دوردی. اُل یِرده ساغ اِلی قوران بیر آدام باردی. 7دین عُلَمالار بیلِن فَریسی‌لِر عیسانی عاییپلاماقچی بُلدولار: سَبَّت گونی مِریض شِفا بِرِرمیکَه دییّپ، اُنی گُزلِدیلِر. 8عیسی اُلارینگ فیکرلِرینی بیلیپ، اِلی قوران آداما: «یِرینگدِن تور-دا، اُرتا چیق» دییدی. اُل هِم یِریندِن توروپ، اُرتادا دوردی. 9سُنگرا عیسی اُلاردان: «سیزه بیر سُراغیم بار: شِریغاتدا سَبَّت گونی یاخشیلیق اِتمِک دُغرومی یا-دا یامانلیق؟ بیرینینگ جانینی نِجات بِرمِک دُغرومی یا-دا اُلدورمِک؟» دییّپ سُرادی. 10عیسی تُوِرِگیندَکیلِرینگ هِمّه‌سینه گُز گِزدیریپ چیقدی-دا، یانگقی آداما: «اِلینگی اوزات!» دییدی. اُل هِم اِلینی اوزاتدی شو واقتدا، اِلی دِرِّو شِفا تاپدی. 11اُلار بُلسا قاهار-غاضابا مینیپ، عیسانی نَمه اِتمِلیدیگی بارادا اُز آرالاریندا ماصلاحاتلاشماغا باشلادیلار.
عیسی اُن ایکی شَگیردینی سایلایار
مَتّیٰ ۱۰:۱-۴؛ مَرقُس ۳:۱۳-۱۹
12شُل گونلِرده عیسی دُغا اِتمِک اوچین داغا چیقدی و تامام گیجَه‌نی خودایا دُغا اِدیپ گِچیردی. 13گون دُغاندا، شَگیرتلِرینی یانینا چاغیردی. اُلاردان اُن ایکی سانیسینی سایلاپ، اُلاری رِسولّیغا بِلِّدی. اُلار شولاردیر: 14شمعون (عیسی اُنگا پِطرُس لاقابینی بِردی)، اُنونگ دُغانی آندرِیاس، یعقوب، یوحنا، فیلیپُس، بارتولما، 15مَتّیٰ، توما، حَلفینینگ اُغلی یعقوب، قایراتلی شمعون، 16یعقوبینگ اُغلی یهودا و عیسی خایینلیق اِدیَن یهودا اِسخریوطی.
17عیسی اُزونینگ اُن ایکی شَگیردی بیلِن داغدان آشاق دوشوپ، بیر تِکیز یِرده دوردی. اُل یِرده اُنونگ باشغا-دا اِنچِمه شَگیرتلِری اویشوپ، تامام یهودیه‌دِن، اورشلیمدِن، صور بیلِن صیدونینگ دِریا کِنارسیندان سانسیز آداملار گِلیپدی. 18اُلار عیسانی دینگلِمَگه و مِرِضلِریندِن شِفا تاپماغا گِلیپدیلِر. آرخو-جینلاردان حُرلوق چِکیَنلِر-ده شِفا تاپیاردیلار. 19هِمّه آداملار عیسی اِل دِگیرجِک بُلیاردیلار، سِبَبی اُندان چیقیان گویچ اُلارینگ هِمّه‌سینه شِفا بِریَردی.
خوشواقتلار و خوشواقتسیزلار
مَتّیٰ ۵:۱-۱۲
20سُنگرا عیسی شَگیرتلِرینه ناظارینی تیکیپ، شِیله دییدی:
«اِی قاریپلار، خوشواقتسینگیز،
چونکی خودایینگ پادیشاهلیغی سیزینگکیدیر!
21اِی شو واقت آچلیق چِکیَنلِر، خوشواقتسینگیز،
چونکی دُیارسینگیز.
شو واقت آغلایانلار، خوشواقتسینگیز،
چونکی شاتلیقدان گولِرسینگیز.
22اینسان اُغلی سِبَپلی آداملار سیزدِن ییگرِنیپ، آرالاریندان کُوان واقتی، سیزه سِووپ، آدینگیزی قارالان واقتی خوشواقتسینگیز! 23شُل گون شاتلانینگ، بِگِنچدِن بُکونگ، سِبَبی آسماندا آلجاق سیلاغینگیز اولودیر. اُلارینگ آتا-بابالاری-دا پیغامبارلارا شِیله اِدِندیرلِر.
24اِمّا وای حالینگیزا، اِی بایلار!
چونکی سیز اِییَم تِسِلّینگیزی آلانسینگیز.
25وای حالینگیزا، اِی شو واقت دُقلار!
چونکی سیز آچلیق چِکِرسینگیز.
وای حالینگیزا، اِی شو واقت گولیَنلِر!
چونکی سیز یاس توتوپ آغلارسینگیز.
26هِمّه آداملار سیزی تعریفلان ماحالی وای حالینگیزا!
چونکی آتا-بابالاری-دا یالان پیغامبارلارا شِیله اِتدیلِر.
دوشمانلارینگیزی سُیونگ
مَتّیٰ ۵:۳۸-۴۸؛ ۷:۱۲
27«اِمّا، اِی مِنی دینگلِیَنلِر، سیزه شِیله دییَّرین: دوشمانلارینگیزی سُیونگ، اُزونگیزدِن ییگرِنیَنلِره یاخشیلیق اِدینگ. 28اُزونگیزه قارغایانلار اوچین یاخشیلیق دیلَنگ، اُزونگیزی اینجیدیانلار اوچین خودایا دُغا اِدینگ. 29بیر یانگاغینگا اورانا بِیلِکی یانگاغینگی-دا توت. دُنونگی آلاندان کُینِگینگی هِم قایغیرما. 30دیلَنه – بِر، اُزونگدِن بیر زات آلاندان ایزینا سُراما. 31آداملار اُزونگیزه نَمه اِتمِگینی ایسلِیَن بُلسانگیز، سیز-ده اُلارا شُنی اِدینگ. 32سیز اُزونگیزی سُییَنلِری سُییَن بُلسانگیز، مونونگ بیلِن نَمه حُرمات قازانیارسینگیز؟ گونَه‌کَرلَر-ده اُزلِرینی سُییَنلِری، سُییَرلِر آخیرین. 33سیز اُزونگیزه یاخشیلیق اِدیَنلِره یاخشیلیق اِدیَن بُلسانگیز، مونونگ بیلِن نَمه حُرمات قازانیارسینگیز؟ گونَه‌کَرلِر-ده شِیله اِدیَندیرلِر. 34ایزینا آلماق تاماسی بیلِن قارض بِریَن بُلسانگیز، مونونگ بیلِن نَمه حُرماتا میناسیپسینگیز؟ گونَه‌کَرلِر-ده بِریپ ایزینا آلماق نییِتی بیلِن گونَه‌کَرلِره قارض بِریَندیرلِر. 35دوشمانلارینگیزی سُیونگ، یاخشیلیق اِدینگ، ایزینا آلماسیز قارض بِرینگ. شُندا سیزینگ سیلاغینگیز اولی بُلوپ، بِییک خودایینگ اُغول‍لاری بُلارسینگیز، سِبَبی اُل قادیر بیلمِزلِره-ده، تِلِکه‌لِره-ده مَهیرلیدیر. 36آسمانداقی آتانگیزینگ رِحملی بُلشی یالی، سیز-ده رِحملی بُلونگ.
باشغالاری گونَه‌کَرلِمَنگ
مَتّیٰ ۷:۱-۵
37«باشغالاری گونَه‌کَرلِمَنگ، شُندا سیز هِم گونَه‌کَرلِنمِرسینگیز. هیچ کیمی مَحکوم اِتمَنگ، اُندا سیز-ده مَحکوم بُلمارسینگیز. باغیشلانگ، سیز-ده باغیشلانارسینگیز. 38بِرینگ، سیزه-ده بِریلِر. دُس-دُلی دُلدوریلیپ، آغزینا چِنلی اِدیلیپ، قوجاغینگیزی دُلوپ-آقیان اُلچِگ بیلِن دُلدوریلیپ بِریلِر. هایسی اُلچِگ بیلِن اُلچِسِنگیز، سیزی-ده شُل اُلچِگ بیلِن اُلچِرلِر.»
39عیسی اُلارا بیر میثال هِم آیدیپ بِردی: «کُر کُری ایدَپ بیلِرمی؟ ایکیسی هِم چوقورا قاچمازمی؟ 40شَگیرت اُز مُعلِّمیندِن یُقاری دَلدیر، اِمّا کَمیلِّشِندِن سُنگ، هِر کِس اُز مُعلِّمی یالی بُلار.
41«نَمه اوچین سِن دُغانینگ گُزوندَکی چُپی گُریَرسینگ-ده، اُز گُزونگدَکی آغاجی سایغارمایارسینگ؟ 42نَدیپ سِن اُز گُزونگدَکی آغاجی گُرمَن، دُغانینگا: ”دُغان! گِل، گُزونگدَکی چُپی چیقارایین“ دییجِک؟ اِی ایکی‌یوزلی! اَوَّل اُز گُزونگدَکی آغاجی چیقار. شُندا دُغانینگ گُزوندَکی چُپی چیقارماغی قاوی سایغارارسینگ.
باغ و اُنونگ میوه‌سی
مَتّیٰ ۷:۱۶-۲۰، ۲۴-۲۷؛ ۱۲:۳۳-۳۵
43«قاوی باغینگ تِلِکه میوه بِرمِیشی یالی، تِلِکه باغ-دا قاوی میوه بِرمِز. 44باغ اُز میوه‌سیندِن تانیلیاندیر. سِبَبی تیکِنلی بیتیاندان اینجیر، یانداقدان-دا اوزوم ییغیلیان دَلدیر. 45یاخشی آدام یورِگینینگ یاخشیلیق خازیناسیندان یاخشی زاتلاری چیقاریاندیر. یامان آدام یورِگینینگ یامانلیق خازیناسیندان بیدِرِک زاتلاری چیقاریاندیر. اینسانینگ دیلی یورِگیندِن جُشانینی سُزلِیَندیر.
ایکی اُی
مَتّیٰ ۷:۲۴-۲۷
46«نَمه اوچین مانگا: ”یا آقام! یا آقام!“ دییّپ-ده، آیدانلاریمی اِتمِیَرسینگیز؟ 47مِنینگ یانیما گِلیَن، سُزلِریمی اِشیدیپ، اُلاری بِرجای اِدیَن آدامینگ کیمه مِنگزِیَندیگینی سیزه بِیان اِدِیین: 48اُل اُی سالماق اوچین یِری چونگّور قازیپ، اُنونگ پایاسینی قایانینگ اوستونده توتان آداما مِنگزِیَر. سیل گِلِنده، آرنا جُشوپ، بو اُیه اورولسا-دا، اُنی سارسدیریپ بیلمِز، سِبَبی اُل قاوی سالنیپدی. 49اِمّا مِنینگ سُزلِریمی اِشیدیپ-ده، بِرجای اِتمِدیک کیشی چَگَه‌نینگ اوستونده بُنیادسیز اُی سالان آدام یالیدیر. آرنا جُشوپ، اُل اُیه اوران واقتیندا، اُی ییقیلار. اُنونگ دارغایشی-دا قُرقونچ بُلار.»
Επιλέχθηκαν προς το παρόν:
لوقا 6: TUKIR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Turkmen Truth