João 7
7
Ca om howa cocon Jeju xurucun
1Pi' pin iri na ca pijim' nucun Jeju ne, pain Cafarnaum ma', xut mao ac cain na Galileia. Noc inain ca xut mao wa pain Judeia ta na. Xut mao ni ca' nain, xi to ara cacain i cain oro taramaxicon nuxut co to' pa' pin xun nonon ta. 2Wixicam pin ac ne na oro xec nein ca mam' pe wet urut cocon hwanana nuxut pain ca judeu urut ca', pain ca pi'am to qui' cacain tahot pane#7.2 Para pi'am to cacain tahot oro hwanana nucucun oro judeu pane? Om na, taraju pa' je e'. Paca' iri nanain Egito oro hwanana pain cara pane ne, pain ca to e' qui' cacain mahweri pane, om ca to xo' caca. Om nonon iri' xirim. Quep hap e' nanain tahot, pi'am to ximama' ac cacain na quem. Mam' pe wet taxipa' ac cacain na i ma' oro waram winacocon quem. Maqui' iri na oro xec nein ne, pain oro cawaxi' ma', quep ac cacain na tahot, pi'am to ac cacain na quem. Ma' 7 na xec pain oro cawaxi' ca ara cacain quem.. 3Tomi' ac cocon na Jeju xurucun ma': Om xi mon to wet main i ca' ta, mao ximain Judeia cain. Ma' ta querec quequem oro wari' co ja' ja' nenem ma', tomi' querec teterem pain ca an hwet pe main ca hwara' opa nem pain ca ara main ca om ara taxi' ne ca wari' wa ma'. 4Mo ta param momon oro wari' pain ca querec pin' quequem ma', om ca na ne pain ca ara noc xa ac main ca ara ma ma'. 5Ac i ma' na ca tomi' ximama' cocon xurucun ma'. Xi howa cocon ta.
6Tomi' ac tococwa na: Om ca maqui' querec capa' xec nein ca mao tain cain ta'. Wahu' iri na ne, hohot nuhu' oro xec pain ca mama' xin cain hwe. 7Om paxi' na ca noc cucuhu' oro wari' co om tomi' ha' nonon Iri' Jam. Ane noc cacapa' ne. Xi om ne ca pan to' ara tain taraxicocon pain ca pan teretem nucucun ta. 8Wara mama' jein ca tomi' querec te xi' hwe ma' ac tococwa na. Om ta hwet xuhu' ta. Xi maqui' querec capa' xec nein ca mao tain cain ta'. 9Ac i ma' na ca tomi' tococwa ma'. Mon to wet ac cain na Galileia.
Ca mao cain Jerusalém Jeju
10Mama' iri nanain Jerusalém xurucun ne, pain ca tomi' querec te wi xijexi' cocon oro win ma' iri' cwain caca ma', mama' xi' quem ac caparut na Jeju. Om ca taxi' cacaparut oro wari' pain ca mama' nuxut. Mama' xica' to urut.
11Pirao' nonon Jeju oro taramaxicon nuxut pain ca judeu urut ca', co tomi' querec te wi nana cocon oro win ma' caca ma'. Mon wari' cara pane quem nonon oro wari'.
12Mija nana wari' co tomi' hohomu xucucun con. Ma' nana co awi na ta nonon, ma' nana oro xucucun co om ca awi ca ta nonon ma' quem. Mixein nonon oro wari' ta nonon. 13Om ca hwet tomi' xucucun. Tomi' hohomu e' xucucun. Xi jin' ara tococwa oro taramaxicon ta.
14Ximijain oro xec nein ca tomi' querec te nuxut ma' iri na ne, mao ac cain na cote ne xiricon Iri' Jam Jeju. Ca' na toton pain capijacon Te oro wari' ta na. 15In ac tamana ac cocon na oro taramaxicon nuxut pain ca judeu urut ca'. Para taxi' tamana ca ma' ne? Xi ca' na xo' camain' tocwa pain capijacon Iri' Jam ira nana pain ca in ac cocon ma'.
16Tomi' ac tococwa na: Oro ca pijim' ne ca', pain ca ca' na toton pain capijacon Iri' Jam oro wari' cwa', om ca maqui' pan capa'. Maqui' non Iri' Jam co hwet roron oro wari' ta napa' pane. 17Wari' co ara tain nain ca param nucun Iri' Jam ma', querec pin' ac cain tara ca pijim' ne pain ca ca' na tain capijacon ca'. Querec pin' tarain pain ca om maqui' capa' ca'. Querec pin' tarain pain ca maqui' con Iri' Jam. 18Wari' co pijim' e' nain ca coromicat pan nucun ma', param e' tata oro win ma' ca pain ca in ac pan cocon ma'. Wata' iri na ne, param inonon oro win ma' ne pain ca in ac pan cocon Iri' Jam co pijim' ra napa'. Iri'o' na oro ca tomi' ne quem. Om ca mixein camain' ta'. 19Om ca Moisés ca co tomi' hwet nuhu' pain oro ca tomi' nucun Iri' Jam ca tomi' ha' je cuhu' ra? Wirico paxi' na, ane om tomi' ha' iri'o' camain' hwein ca xirao' nucun ne. Para to' pa' pin xim mahu' quem? Tomi' napat a ximahu' pain ca taramaja tain xec nein ca xao to wa e' tara xumuhu' ta capari' Moisés. Xi tomi' ha' iri'o' hun quem ta na ca tomi' tococwa ma'.
20Tamanain ma ta ac cocon na oro wari'. Corom pe ho' nem Caxicon Jam. Ma' co to' pa' pin xim nem quem nonon.
21Tomi' ac tococwa na: An hwet mi' inuhu' pain ca hwara' opa ne pain ca ara tain ca om ara taxi' ne ca wari' wa pain xec nein sábado pane, joc herehe pin ac ne na tucuhu' pane. 22Cain' cain' xihwe quem? Tomi' xin ca wac xirac xine taparinain ca xirac nucun pije' ma'. Ma' 8 pin iri na xec nucun pije' pain ca pan' qui' nucun ma' ne, na e' na pain ca wac xirac xine taparinain ca xirac nucun ta na ca xirao' nucun Moisés cara pane. Om paxi' na ca maqui' con Moisés pane. Wirico Abraão con Isaque con Jacó cara pane, wiricoco co tomi' mi' cain' nanapari' pain ca wac xirac xine taparinain ca xirac nucucun oro hwijima' pane#7.22 Tomi' ac i ma' tata pane. Wirico hwanana Abraão cara pane co tomi' cain' ca Iri' Jam pane, pain ca wac xirac rain taparinain ca xirac nuhu' pain ca tarama' nuhu' ta qui' con pane, mao ac ne ma' na cocon waram winacon con panxica pane. Ma' ta querec pin' xihwe pain ca iri' wari' ne xuhu' ca', je pain ca Iri' Jam ne mahu' ma' quem, ac i ma' na ca tomi' xo' con Abraão Iri' Jam pane. Je ca wac xirac cacain taparinain ca xirac nucucun pain ca tarama' nucucun oro judeu pain xocori ca' quem.. Je ca wac xirac hwein quem. Xec nein sábado paxi' na. Je i ma' ira, wac xirac ac hwein na taparinain ca xirac nucucun. 23Taramaja paxi' hwe pain ca wac xirac hwein taparinain ca xirac nucucun hwijima' pain xec nein sábado ma'. Om na, ane xirao' mi' capari' Moisés pain ca ma' 8 pin ne xec nucucun pane ne, na e' na pain ca wac xirac xin, ma' ta om ari xin ca xirao' nucun Moisés ta ac hwe na. Je xi om mana' mahu' pain ca quep xio pin ton wari' pain xec nein sábado ca' quem? 24Je ca tomi' xuhu' ca' ac tococwa na. Om ca na ne pain ca coromicat mi' hun pain ca caracat wa wari' ma', pain ca om tomi' querec cain' hun pain carawa ca ara ca ma'. Na e' na pain ca tomi' querec cain' hun, coromicat xo' cain' je, tomi' xo' ac hun tara quem na ca tomi' tococwa ma'.
Ca wum co Cristo ra cocon Jeju oro wari'
25Ma' ac caca na wari' nein Jerusalém co tomi' querec ca' xucucun: Om ca wirico ca co to' pa' xi' caca ra? 26Je xi jin' cain ca hwet tomi' wa quem? Noro jun. Je xi tomi' in pin cocon oro taramaxicon quem? Coromicat ni nana ra? Am wirico tara co Cristo ta caca, ac i ma' tara ca coromicat nucucun ra? 27Tara con, xi taxi' ara xin ca maqui' ca co cwa' ta. Maqui' iri tara Cristo ne, om ta taxi' xin ca maqui' ca. Ac i ma' na ca tomi' xucucun oro wari' pain ca i'ina ne ximicocon ma'.
28Pijim' pe iri nain ca tao' caho' nein xiricon Iri' Jam Jeju ne, tomi' mip ac ca na: Iri'o' tara ca querec pin' mahu' ra? Iri'o' tara ca taxi' mahu' pain ca maqui' ne ra? Tara pahu'. Om ca maqui' ta' pain ca param pan ne ca'. Wirico Iri' Jam na co hwet roron ta napa' pahu'. Tomi' iri'o' na quem. Om paxi' na ca querec pin' hun. 29Ane querec pin' pan ton ne. Xi maqui' ara ton ta. Wirico co hwet roron ta napa' pahu' na ca tomi' tococwa ma'.
30Quep xun paxi' nonon Jeju quem, ane om quep ac cocon ne. Xi maqui' querec ne xec nein ca wara coromicat an pe xo' ca Iri' Jam pain ca quep totoron ta con ma'. 31Mija paxi' nana oro wari' co om howa nonon ma'. Ane mija caca co howa pin nonon quem ne. Tomi' ca' nana: Wirico co Cristo ta, xi ma' ca xucun co maqui' ta' ma', co hwara' opa tiquin' ca' non pain ca an hwet pe cain ca hwara' opa nucun pain ca ara taxi' cain ca om ara taxi' ne ca wari' wa ta na ca tomi' xucucun.
32Oro fariseu ma', taraju nonon oro wari' pain ca tomi' hohomu xucucun con Jeju. Tomi' xuxun oro guarda ma' ac cocon na oro taramaxicon nucucun oro sacerdote ma'. Quep totoron Jeju ta nana.
33Tomi' ac ca na Jeju: Pe ho' wijimain ca' xuhu', in hwet ac ton tara Iri' Jam co hwet roron oro wari' ta napa' pane. 34Pirao' xun paxi' mahu', ane om mam' xim mahu' ne. Om ta hwet ac mahu' pain ca pe ta' ta' quem na ca tomi' tococwa ma'.
35Tomi' ac xucucun na oro taramaxicon nuxut pain ca judeu urut ca': Main xi mao ta' ca quem, pain ca om ta mam' ac mahu' ta capari' ma' quem? Hwet toton nonon oro win ma' nexi' co to ho' nonon oro tatirim ra? Ca' na toton pain capijacon Iri' Jam na ra? 36Cain' cain' xira con quem? Tomi' ca' napari': Pirao' xim paxi' mahu', ane om mam' xim mahu' quem napari'. Om ta hwet ac mahu' pain ca pe ta' ta' quem napari'. Para tomi' ac i ma' capari' quem? Ac i ma' na ca tomi' xucucun.
37Xec nein ca pi' pin ta' ne ca tomi' querec te nuxut ma', awi tamana na, awi tiquin' ca' nain oro xijein xec nein ca tomi' querec te nuxut. Maqui' iri na iri' xec nein ne, tequi' pe ac ca na Jeju. Tomi' ac ca na, tomi' mip na: Wari' co jain jain nain com ca mi' nain ca e' wa pain pawin cain, hwet ac capa' tara, mi' ac ton pain tara ta. 38Win ne ca xirao' pe xine capijacon Iri' Jam ca': Wari' co howa napa', weweweo qui' ac nein ximicon tara ca hoi hoi ne com ca mi' nain ca e' cara wa ta na ca xirao' pe nein na ca tomi' tococwa ma'.
39Tomi' mi' nain Tamataracon Iri' Jam ca mi' xun tococwa co howa nonon ma'. Om ca mi' querec tococwa pain, xi mi' pin querec ca Jeju ta. Om ca e' mami' querec ca, om ca in hwet querec con Cote ca, om ca taramaxicon wi querec con pain pawin quem.
40Oro wari' co taraju nonon Jeju pain ca tomi' ca ma', ma' nana co tomi' ca' nana: Wirico co cwa' profeta co winim' iri' cwa' ira nana.
41Ma' ac caca na oro xucucun co tomi' ca' nana quem: Wirico co Cristo ta nana. Ane tomi' in pin cocon oro xucucun ma' ne. Ma' tara ca maqui' ac cain Galileia Cristo ra? 42Xi xirao' pe ara ne capijacon Iri' Jam ta. Tomi' pe ca' na: Winacon Davi tara Cristo. Pan' pe tarain Belém ta, je iri' macaracon Davi ca pe pan ca pane na ca xirao' pe xine capijacon Iri' Jam ta nana#7.42 Oro wari' co tomi' ac i ma' nana con Jeju pane, taxi' paxi' nonon pain ca hwara' pe cain Nazaré pain Galileia, ane om taxi' cocon pain ca pan' pe cain Belém ne..
43Ac i ma' na ca coromicat ni ca' xucucun oro wari' con Jeju pane. 44Ma' paxi' nana co quep xun nonon ma' quem, ane om ca wari' co quep non ne.
Ca om howa cocon Jeju oro taramaxicon nuxut pain ca judeu urut ca'
45Oro guarda cara ne, in mama' ac cacain na ca to pan caca oro taramaxicon nucucun oro sacerdote cocon oro fariseu ma'. Tomi' querec pan ac caca na oro taramaxicon: Je xi an qui' hun Jeju quem nonon.
46Xi ma' camain' ca wari' co an xiho' non pain ca pijim' nucun ta nana.
47Cain' cain' xihwe quem ac tococwa na. Mixein turuhu' quem ra na ca tomi' caca oro fariseu ma'. 48Ma' tara win taramaxicon urut co howa non ra? Ma' tara win fariseu urut co howa non quem ra? Om na ta! 49Oro caxicon wari' ma', co om taraju pa' camain' nanain ca xirao' nucun Moisés ma', xica' to nana caram ma' co howa nonon ta. Wixicaracao' mi' ma' totoron pain cote ne xe Iri' Jam ne na ca tomi' noro caca ma'.
50Tomi' ac ca na Nicodemos ma', co win ma' ne nonon oro fariseu ma', co tomi' towa non Jeju pain cara pane. Tomi' tata oro win ma' ca: 51Om ca em' ma ta ac xun wari' pain carawa ca ara ca pain ca om taraju cain' xun pain ca tomi' nain ho' xucun ta. Win ne ca tomi' capari' ca xirao' nucun Moisés ta na ca tomi' tococwa ma'.
52Cain' cain' ma quem? Ac ca maqui' main Galileia na ta! Mo xi noro tamana main capijacon Iri' Jam ma', taxi' ac ma xira pain ca om ma' camain' ca profeta co maqui' nain Galileia ta! Ac i ma' na ca tomi' in pin cocon ma'.
53Pi' pin iri na ca tomi' nucucun ne, in mama' in mama' xam' ac cacain na xiricocon.
Επιλέχθηκαν προς το παρόν:
João 7: TBPN
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright 2023 Missão Novos Tribos do Brasil