João 8
8
Ca xic am pin cain ca caracat nequem caxicam narima' Jeju
1Jeju ma' iri na ne, maji ta ac caparut na, mama' ac urut pain na Pacun Nein Oliveira ma'. 2Iri' xo' xec pin iri na ne, in mama' ac urut pain na cote ne xiricon Iri' Jam ma', pain ca tao' caho' nein ma'. Mija ac caca na oro wari' co to to mam' pin nonon Jeju ma' quem. Xao pe ho' ac tococwa na, ca' na ac tococwa na pain capijacon Iri' Jam. 3Maqui' ac caca na oro fariseu cocon oro co ca' na taxipa' nanain ca xirao' nucun Moisés ma'. An qui' nanam caxicam narima'. Wara querec nanam pain ca quep cam xucun tarama' ira. An mi' iri nonon cam Jeju ne, xat pe rain ximijacocon oro wari' cwa' ta ac cacam na. 4Tomi' ac cocon na Jeju: Querec urut cam narima' cwa', pain ca quep cam xucun tarama' ta taramaxicon co ca' na taxipa' capijacon Iri' Jam. 5Xirao' mi' ca' napari' Moisés pane: Na e' na pain ca to' pa' pin hwehwem oro caxicam narima' co quep caca xucun tarama' ta. To' to' cono' pin jejem pain pacun ta napari'. Wum quem? Ma' carawa ca ara jem maparut cam quem na ca tomi' cocon ma'.
6Wara tomi' xo' ca' xucucun con: Tomi' querec xun e'. Mo ta tomi' pan tem ca, na ac capari' tara pain ca em' na ta xun ta nana.
Ac i ma' paxi' na ca wara tomi' xo' xucucun, ane miri'om tococwa ne. Wina quiji' na, xirao' ac cain na macan' pain micon.
7Tomi' querec mami' ac cocon na, ac ca wara tomi' querec cocon na. In piri' ac ne na winacon. Tomi' ac tococwa na: Mo ta ma' pan cuhu' co om caracat camain' ma', wirico tara co to' cain' nam pain pacun ta tata. 8Wina quiji' mami' ac ca na, xirao' xirao' tiquin' ac cain na macan' pain micon ma'.
9Taraju iri nanain ca tomi' nucun ne, xica' mama' xica' mama' pi' pin ac caca na. Hwerehwet cain' nana co hwanana nana ma', mama' mama' pi' pin ac caca na co om hwanana querec nana quem. Xica' pe na narima' co to wet con Jeju. Tequi' xat cara ac cama na.
10Tequi' pe ac ca na Jeju. Momon caram pacara ne quem xa' ac cam na. Om pin nana co tomi' mi' nenem pain ca mi' pin ra quequem ra?
11Om na ta Taramaxicon ne ac cama na.
Om ca tomi' mi' xim pain ca mi' pin ra xim ca' quem ac cam na. Mao ra. Ta caracat mami' ma me ta ac cam na.
Ca wata' co Iri' Naran ta ca Jeju
12Tomi' mami' ac cocon na oro wari' Jeju: Wata' co Iri' Naran cwa' ta ac ca na. Toha mi' inonon oro wari' pain ximicocon ma', pain ca mi' toton pain ca taraju pa' wa oro caramaxicon Iri' Jam. Wari' co ja' ja' napa' ma', om pin na ca jitacat nein pain ximicon. Xi toha mi' ara ton pain naran ne ca mi' non pain ca e' cara wa ta na ca tomi' tococwa ma'.
13Wum pan na co tomi' hwet pan xijem parut ta ac cocon na oro fariseu. Om ca na ne pain ca howa ac xima ta na ca tomi' cocon ma'.
14Wata' paxi' na co tomi' hwet nuhu' pata' ac tococwa na. Ane iri'o' ne ca tomi' hwet xuhu' ne. Xi taxi' pan ara xije pain ca maqui' tain pawin ta. Taxi' xije pain ca in mao tain ta' quem. Wahu' iri na ne, om ca taxi' mahu' pain ca maqui' ne. Om ca taxi' mahu' pain ca mao ta' ta' quem. 15Wahu' pain ca juiz hwe ma', pain ca tomi' xo' hun wari' pain carawa ca ara ca ma', je pain ca wum co em' ta hun ma', an xiho' e' hwein ca coromicat nein ca wari' wa ta. Wata' iri na ne, om ca em' hwe ta camain' toton oro wari' ta. 16Mo xi ac juiz ton wari' pain ca tomi' xo' ton pain carawa ca ara ca ma', tomi' xo' ac ton xira. Xi tomi' xica' pe ta' pain ca tomi' xo' ton ta. Tomi' xiho' ara xi' napa' Te co hwet roron oro wari' ta napa' ma'. 17Je ca xirao' pe ca hwanana nexi' Moisés cara pane, pain ca tomi' ha' jein ta capari' pane. Je ca tomi' ha' urut hwe ma' quem. Ca' na ca xirao' pe ca Moisés pane: Mo ta ma' 2 caca wari' co tomi' hwet xin nanain carawa ca querec caca ma', mo ta an an ari ne ca tomi' nucucun ma', hohot ac ne na pain ca howa tococwa. Iri'o' na ca tomi' nucucun ta na ca xirao' pe nucun Moisés pane. 18Je ca tomi' xuhu' ca' ac tococwa na. Tomi' hwet xije pahu'. Tomi' hwet ac capa' na Te co hwet roron oro wari' ta napa' pahu' quem na ca tomi' tococwa ma'.
19Main ca pe ca cote ma quem ac cocon na.
Om ca querec pin' mahu' ta ac tococwa na. Om ca querec pin' hun Te quem. Mo xi querec pin' mahu', querec pin' ac hun xira Te quem.
20Je ca tomi' ca Jeju pain ca pijim' pe cain ca tao' caho' nein cote ne xiricon Iri' Jam pane. Pijim' pe ja' pan nain pana ca to ne dinheiro ca mi' cocon Iri' Jam oro wari' ma'. Na paxi' xiroron pain ca quep pe cocon pain i ma', ane om quep cocon ne. Xi maqui' querec ne xec nein ca wara coromicat an pe xo' ca Iri' Jam pain ca quep totoron ta con ta.
Ca tomi' xo' tococwa oro taramaxicon pain ca maqui' nucun
21Tomi' mami' ac tococwa na: Mao ta' ina ta ac tococwa na. Pirao' xun paxi' mahu'. Om ta mam' mahu'. Cono' pa' e' ac hwein tara ca caracat nuhu'. Om ta hwet ac mahu' pain ca pe ta' ta' quem na ca tomi' tococwa ma'.
22Cain' cain' xira quem ac caca na oro taramaxicon nuxut pain ca judeu urut ca'. To' pa' pin xije tara ron? Je ca tomi' ac i ma' capari' pain ca om ta na cuhu' pain ca hwet xun mahu' pain ca pe ta' ta' ca' napari' ron na ca tomi' querec xucucun ma'.
23Om na, wari' nein macan' hwe ta ac tococwa na. Wata' iri na ne, wari' nein pawin ina. Coromicat an xiho' huhun oro wari' nein macan' ca'. Wata' iri na ne, om ca coromicat an xiho' toton wari' nein macan'. 24Je ca tomi' xuhu' ne, pain ca cono' pa' e' jein ca caracat nuhu' xuhu' ne. Iri'o' na ca tomi' xuhu' ca': Mo ta om howa mahu' pain ca tomi' hwet xije pahu' ca', cono' pa' e' ac hwein tara ca caracat nuhu' ta na ca tomi' tococwa ma'.
25Cain' ca wari' ma quem ac cocon na.
Wara tomi' hwet xije pahu' pain cara pane, pain ca xo' pijim' qui' xuhu' pane, tomi' hwet taxipa' xije pahu' ac tococwa na. 26Mija mija wet paxi' napa' oro ca tomi' xim xuhu' ca'. Mija mija wet paxi' napa' oro ca tomi' xo' xim xuhu' pain oro carawa ca ara pan teretem hwe ma' quem, pain ca em' hwe ta xim xuhu' ca' quem. Ane noc tain ne. Xi tomi' hwet e' ara xuhu' pain ca taraju ta' con Te co hwet roron oro wari' ta napa' ta. Iri'o' na ca tomi' nucun quem. Ac i ma' na ca tomi' tococwa ma'.
27Om ca taraju pa' cacain ca tomi' nucun. Om tara Iri' Jam co tomi' ca pain ca Te inon ta ca ma' nonon.
28Je ca tomi' ca' tococwa ma': An piri' xat iri xine pain ca Iri' Wari' ta' ca' ne. An piri' xat iri xine pain pana ne, pain ca to' pa' pin xim mahu' ma', querec pin' ac mahu' tara pain ca tomi' iri'o' ta' ca', pain ca tomi' hwet xije pahu' ca'. Querec pin' ac mahu' tara pain ca om ara camain' tain ca param pan ne. Querec pin' ac mahu' tara pain ca tomi' hwet e' tain ca tomi' xo' capa' Te. 29Pe ho' napa' Te co hwet roron oro wari' ta napa'. Om ca an pe pin capa'. Xi om ne ca ara taxipa' ara tain oro carawa ca hohot non ta na ca tomi' tococwa ma'.
30Tomi' iri nain i ma' ne, ma' mija ac caca na oro wari' co howa nonon ma'.
Ca tomi' xo' tococwa pain ca witan iri'o' wa
31Tomi' ac tococwa na oro win judeu urut ma', co howa nonon ma': Mo ta tomi' ha' cara mahu' pain ca tomi' xuhu' ca', taxipa' iri'o' ac mahu' tara. 32Querec pin' ac hwein tara oro ca iri'o' wa con Iri' Jam. Howa iri jun ne, witan ca' ac hwein tara carawa ca quep xat nuhu' ta.
33Cain' cain' xira quem ac cocon na. Xi iri' hwanana ne ara urut con Abraão cara pane ta. Wirico co wanxi' non hwanana nuxut pane. Om ca quep xat camain' caparut carawa. Para witan ca' jein carawa ca quep xat nuhu' ma' maparut quem nonon.
34Om na, je ca tomi' xuhu' ca', tomi' iri'o' inuhu' ta ac tococwa na. Wari' co caracat ma', ac ca quep con na ca caracat nucun. Ac ca taramaja mi' e' ne con na. 35Wari' co taramaja mi' e' non xucun wari' pain xiricon ma', om ca pe ho' cara con taramaxicon nucun. Om ca iri' te con. Panxica ma' iri na ne, pe ho' cara non cote ca. 36Mo ta to' witan xuhu' pain ca Panxica Iri' Jam ta' ca', witan iri'o' ac hwe tara. 37Iri' hwanana ne paxi' hun Abraão cara pane, taxi' inuhu' pain ca iri' hwanana ne hun ma'. Ane to' pa' pin xim mahu' ne. Xi howa hwein ca pijim' xuhu' ta. 38Tomi' hwet inuhu' pain oro carawa ca querec ta' pain ca pe ho' pe ho' wet ton Te pane. Wahu' iri na ne, ara hwein ca ca' na cuhu' cote hwe ma' na ca tomi' tococwa ma'.
39Om na, wirico Abraão cara pane co te urut ca', ac ca te urut con na pain ca wanxi' cocon hwanana nuxut cocon mana coturut pane ac caca na.
Mo xi wanxi' con hwanana nuhu' Abraão pane, mo xi te iri'o' hun, an xiho' ac hun xira pain ca xut xo' nucun ta ac tococwa na. 40Ane to' pa' pin xim mahu' ne, xi om ne ca tomi' hwet ara xuhu' pain capijacon Te ca iri'o' ca', ca taraju ta' ca'. Om ca ac i ma' camain' ca Abraão pane ta. 41Je ca tomi' xuhu' ca': An xiho' hun iri' cote hwe ma' ira na ca tomi' tococwa ma'.
Cain' cain' xima quem? Ma' na coturut ta, wirico Iri' Jam. Om ca te urut con xucun na ca tomi' cocon ma'.
42Mo xi te iri'o' hun Iri' Jam ma', om ac ne xira ca noc mahu' ta ac tococwa na. Xi maqui' ara ton Iri' Jam ta. Je ca pe ho' xuhu' ca'. Om ca maqui' ta' pain ca param pan ne. Wirico Te co hwet roron ta napa' pahu'. 43Je xi taraju pa' mahu' pain ca tomi' xuhu' ca' quem? Ane noc hwein ca taraju wet wa ne. 44Te hun Caxicon Jam ma' ira. An xiho' hun quem. Wara to' pa' taxipa' non wari' pain ca xo' quep qui' xine macan' pane, mao ac ne ma' na con, je curucun mao na. Noc nain ca tomi' iri'o' wa. Om ca tomi' iri'o' taxi' ca. Tomi' mixein iri na ne, ara e' nain carawa ca maqui' nain ximicon. Xi tomi' mixein taxipa' ara ca ta. Wirico co ja' tomi' mixein nonon oro wari' co tomi' mixein nana ma' quem. 45Je ca om howa mahu' pain ca tomi' iri'o' xuhu' ca'. 46Om ca ma' camain' ca wari' co querec inon pain ca caracat ca pane ac napa' ma' pahu'. Tomi' iri'o' e' ina. Je xi howa mahu' quem? 47Wari' co te non Iri' Jam ma', tomi' ha' nain capijacon. Wahu' iri na ne, om ca tomi' ha' hwein capijacon Iri' Jam. Xi te hun ta na ca tomi' tococwa ma'.
Ca tomi' xo' tococwa pain ca wara ma' ca' con Abraão cara pane
48Tomi' ac cocon na Jeju oro taramaxicon ma'. Iri'o' na ca tomi' urut pum pane ac cocon na. Caxicon wari' ma. Ac wari' nein Samaria ma. Corom pe ho' quem Caxicon Jam ma' ira nonon.
49Om na, om ca corom pe ho' capa' Caxicon Jam ta. Tomi' ha' e' inon Te ta. Wahu' iri na ne, tomi' napat e' mahu'. 50Om paxi' na ca jain jain toton oro wari' pain ca awi na ta cacapa' ca'. Ane ma' ca xucun co jain jain nonon oro wari' pain ca awi na ta cacapa' ma' ne. Wirico Te na co awi na jun ta nonon pata'. Wirico co Juiz. Wirico co querec pin' napari' pain ca tomi' nexi'. 51Je ca tomi' xuhu' ca', tomi' iri'o' inuhu': Wari' co tomi' ha' nain ca pijim' ne ca', om ta mi' pin camain' ca ta na ca tomi' tococwa ma'.
52Taxi' pin urut pum pain ca corom pe ho' quem Caxicon Jam ma' ta ac cocon na. Pain cara pane ca mi' pin ca hwanana nuxut Abraão pane. Pain cara pane ca cono' caca oro profeta pane quem. Je xi om tomi' ac i ma' ma pain ca wari' co tomi' ha' nain ca pijim' ne ca', om ta mi' pin camain' ca ta ma ma' quem? Cain' cain' xima quem? 53Hwara' opa tiquin' ca' inon xi' ma mon hwanana nuxut Abraão co mi' pin cara pane ra? Hwara' opa tiquin' ca' inonon xi' ma momon oro profeta co cono' nana pane quem ra? Cain' cain' xima quem? Tomi' xec xec a xima ta! Ac i ma' na ca tomi' cocon ma'.
54Om na, mo xi awi ina pan ta', tomi' ximao e' xita'. Ane awi ma ta pan capa' Te co Iri' Jam ne hwe ne. 55Om ca querec pin' camain' hun ta. Wata' iri na ne, querec pin' inon. Mo xi tomi' ca' ta': Om ca querec pin' ton, mo xi tomi' ac i ma' ta', tomi' mixein ac ta' xira. Win hwe ma', pain ca tomi' mixein hwe ma'. Ane querec pin' ton ne. Tomi' ha' inon quem. 56Hwanana nuhu' Abraão cara pane, tomi' querec te tamana napa' pain ca maqui' tain macan' ca'. Querec napa' pain ca maqui' ne. Tomi' querec te ac capa' na quem na ca tomi' tococwa ma'.
57Cain' cain' xima quem? Om ca hwet querec main ca 50 ne cawaxi' nem ta. Ma' na ca querec ac mon Abraão cara pane na ca tomi' cocon ma'.
58Je ca tomi' xuhu' ca', tomi' iri'o' inuhu' ta ac tococwa na. Wata' co wara ma' pane. Wara ma' ca' inon Abraão pain ca om pan' querec ne ca pije' nucun pane ta na ca tomi' tococwa ma'.
59Cut ac cacain na pacun, to' to' mi' pin xun pain pacun ta ac caca na quem. Ane xa mao ca Jeju ne. Hwet ca' ac cain na ca tao' caho' nein xiricon Iri' Jam.
Επιλέχθηκαν προς το παρόν:
João 8: TBPN
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright 2023 Missão Novos Tribos do Brasil