Olianyanpi kin 27
27
1Unkan Italia ekta watom unyanpi kta e wanna konzapi, hehan Palos qa wicakaśkapi tokeca kin, akicita tan can wan, Sebastos taobe kin etanhan, Julios eciyapi kin, he wicayuhekiyapi.
2Unkan wita wata wan Adramutium etanhan, Asia makoce kin ekta tuktekten oihunni kte cin he en unkopapi, qa pacanan iyeunyanpi, qa Aristarkos Makedonos, Thesalonike etanhan, he kici unyanpi.
3Unkan ihanḣanna qehan, Sidon en unkihunnipi. Unkan Julios Palos tanyan okiciḣan, takuwicaye cin ekta wicai, qa hena etanhan taku yuhe kta e iyowinkiya.
4Unkan hetanhan pacanan iyeunyanpi, qa Kupros ihukuya watounpapi, tatoheya unyanpi kin heon.
5Unkan Kilikia qa Pamphulia miniwanca kin unkihunnipi qehan, Lukia en Mura eciyapi kin he ekta unhipi.
6Unkan hen wita wata wan Aleksandria etanhan, Italia ekta watom ye kte cin, he akicita tancan kin wanyake c̣a, he en ope unyanpi.
7Unkan anpetu ota iwaśtedan watounpapi qa kitan se Knidos en iyotakons unkipi, tatoheya unyanpi nakaeś, hehan Krete ihukuya, Salmone iyotakons watounpapi.
8Qa he kitan se kapeya unyanpi, hehan makoce wan Oihunni waśte eciyapi kin he en unkipi, he Lasea otonwe kin ikiyadan.
9Wanna anpetu ota, qa watopapi kin okokipe aya, hamdepi tanka kin wanna enakiyapi, hehan Palos wahokonwicakiya;
10Qa hewicakiya, Wicaśta kin, watounpapi kte cin de on wita wata kin taku ohnaka ko yutakunipi kte śni, qa nakun unkiyepi kin iyotanhan iyeunkiyapi kta e imdukcan ce, eya.
11Tuka akicita tancan kin, wahektape cin qa wita wata tawa kin hena anawicakicigoptan, qa Palos ie cin he wicada śni.
12Unkan oihunni kin he en waniyetu osan yukanpi kte cin he waśte śni, heon hetanhan yapi, qa okihipi kinhan, Phenike ekta watom ipi, qa hen waniyetu owanji yukanpi kta, wicota keyapi; Krete en oihunni wan itokagatanhan, wiyoḣpeyata ohna waziyata etkiya huta kin yuśkomya wanke cin hee.
13Unkan okaga tanhan tate kin iwaśtedan hiyu, qa hecen token wacinpi qon wanna ecetu kecinpi, hehan kiyuśkapi qa Krete ikiyedan watopapi.
14Tuka iecadan, tateyanpa wan ohitike cin he en iyapa hiyu, he Tate-taja eciyapi.
15Unkan wita wata kin nina iyapa, hecen tatoheya yapi okihipi śni, hehan kaha iyeunyanpi iyowinunkiyapi.
16Unkan wita wan Klauda eciyapi, he ikiyadan unyanpi, hehan kitan ḣin wata cistinna kin icu unkokihipi.
17He yuwankan ehdakupi, qa icaśke kin unpi, qa wita wata kin opta yuskiskitapi, hehan wiyaka śice cin en iyoḣpeyapi kta kokipapi, qa heon śina on watopapi kin paḣpapi, qa hecen tate on kaha iyewicayapi.
18Qa nina unkakiḣanśicapi, heon ihanḣanna, hehan wata kin etanhan taku tankan eḣpeyapi.
19Qa anpetu iciyamni hehan, unnapepi kin on, wita wata kin en, taku wowinyunyanpi kin minin eḣpeunyanpi.
20Unkan anpetu ota, anpetu wi wicanḣpi ko tanin śni un, qa nina unkakiḣanśicapi, hehan unnipi kta unkecinpi qon he wanna unkayuśtanpi.
21Tuka tehan takudan yute śni unpi kin, hehan Palos wicacokaya najin, qa, Wicaśta kin, anamayagoptanpi qa Krete etanhan pacanan iyeyayapi kte śni iyececa, hecen taku śice c̣a wicakakije cin de nihiyahdepi kte śni tuka.
22Qa nakaha ceciciyapi ce, cante waśtepo; tuwedan niṭapi kte śni, tuka wita wata kin hecedan.
23Wakantanka ohowada, qa iye mayuhe cin he taohnihde ye cin hinhan en mahinajin.
24Qa, Palos kokipe śni wo; Kesar itokam inayajin kta, unkan tona om watoyape cin owasin Wakantanka nic̣u ce, eya ce.
25Heon etanhan, wicaśta kin, cante waśte po; Wakantanka wicawada, token emakiye cin he ecetu kte.
26Tuka wita wan en iyeunyanpi kta ce, eya.
27Unkan otpaza iaketopa kin, hehan Adria miniwanca kin ohna kaha iyeunyanpi kin icunhan, hanye cokaya hehan watope wicakiyapi kin makoce wan ikiyadan upi kecinpi.
28Qa hehan mazasu haḣonta ikoyake cin minin iyeyapi, qa akatinpi wikcemna nonpa e iyeyapi. Hetanhan kitanna kapeya yapi, hehan ake econpi, unkan wanna akatinpi ake zaptan.
29Unkan imnija kin en iyewicayapi kta e kokipapi, heon wahektapa kin etanhan maza aspeic̣iyapi tom minin iyeyapi, qa anpao kta e cinpi ḣinca.
30Unkan watope wicakiyapi kin wita wata kin etanhan najicapi kta akitapi, qa wata cistina qon he mini kin ekta yuhukun iyeyapi, watokapa tanhan maza aspeic̣iyapi min in iyeya konzapi.
31Unkan Palos akicita tancan kin akicita ko hewicakiya; Dena wita wata kin ohna yukanpi śni kinhan, yanipi oyakihipi kte śni ce.
32Hehan akicita kin wata cistina haḣonta ikoyake cin bapsakapi, qa kun iyeyapi.
33Wanna anpao kta hehan Palos owasin taku yutapi icu wicaśi, qa heya, Nakaha takudan yute śni yaunpi anpetu iake topa kin he dee, hehanyan takudan iyacupi śni.
34Heon ceciciyapi ce, taku yutapi icu po, on waniśakapi kta ce, paha nitawapi sukaza wanjidan hinḣpaye kte śni ce.
35Hena hecen eya hehan aguyapi icu, qa owasin wicitokam Wakantanka cekiye c̣a, kiyuśpe c̣a yuta.
36Hehan owasin cante waśtepi, qa woyute icupi.
37Unkan wita wata kin ohna, wicanagi owasin opawinge nom sanpa wikcemna śakowin sanpa śakpe unyakonpi.
38Unkan taku yutapi on imnanpi hehan wita wata kin yukapojedanpi, qa aguyapi su kin minin eḣpeyapi.
39Unkan wanna anpa kamdeze c̣ehan, makoce kin iyekiyapi śni; tuka kaḣmin wan huta oihunni waśte kin he wanyakapi, qa okihipi kinhan, he en wita wata kin aipi kta, keyapi.
40Hehan maza aspeic̣iyapi kin bapsag iyeyapi, qa minin cḣpeyapi, qa iyupse yuza icaśke kin kiyuśkapi; hehan śina watopekiyapi tanka kin yuwankan iyeyapi, qa huta kin ekta yapi.
41Tuka tukten miniwanca nom kokijuya hiyu kin he en iyoḣpayapi, qa hen wita wata kin azi yapi. Unkan watokapatanhan kin he sutaya ihan, tuka wahektapatanhan kin taja on kamden iyeya.
42Unkan akicita kin wicakaśkapi kin hena wicaktepi kta e konzapi, okinni wanjikji huta kin ekta niwanpi, qa najicapi kta, keyapi.
43Tuka akicita tancan kin iś Palos nikiye kta cin kin, heon taku econpi kte cin iyowicaki śni; qa hehan tona niwan okihipi kin hena tokaheya minin eḣpeiciyapi qa huta kin ekta niwanpi kta, keya.
44Hehan tona nahaḣin en un kin hena, hunḣ canmdaska akan, qa hunḣ iś wita wata etanhan onśpaśpadan akan iyayapi. Unkan hecen owasin huta kin ekta tanyan iyohipi.
Currently Selected:
Olianyanpi kin 27: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.