Roma 4
4
1Heon, Abraham ate unyanpi kin, wicaceḣpi eciyatanhan taku iyeye ciqon tukte e he, unkeyapi kta he.
2Abraham wicoḣan on ihduowotanna kinhan taku iwinkta kte cin hduha, tuka Wakantanka itokamya śni.
3Wowapi wakan kin token eya he. Abraham Wakantanka wacinyan, qa woowotanna kiciyawapi qon.
4Tuwe ḣtani kin he wokajuju kin wowaonśida iyecen kiciyawapi śni, tuka wopetonpi kin he iyeceea.
5Tuka tuwe oḣanye śni, qa tuwe tona waḣtanipi kin wicayaowotanna kin he wacinye cinhan, wacinyanpi kin he wicoowotanna kiciyawapi ece.
6Wicaśta kin tuwe wicoḣan codan Wakantanka wicoowotanna kiciyawa kin wowaśte yuhe cin he Dawid oyake ciqon iyececa:
7Tona taku śica econpi qon wicakicicajujupi, qa waḣtanipi kin yutokan iyewicakiciciyapi kin hena wicayawaśtepi ece.
8Wicaśta kin tuwe Itancan kin woaḣtani kiciyawa śni kin he yawaśtepi ce.
9Unkan wowaśte kin de bakiḣdayapi kin ecedan en au he; qa iś bakiḣdayapi śni kin nakun en au he. Wacinyanpi kin he Abraham woowotanna on kiciyawapi ce, unkeyapi qon.
10Token he on kiciyawapi he; bakiḣdayapi kin en un, qa iś bakiḣdayapi śni en. Bakiḣdayapi en un śni, tuka bakiḣdayapi śni kin en icunhan.
11Qa nahanḣin bakiḣdayapi śni un kin en icunhan, bakiḣdayapi kin he wowapetogten, wowacinye woowotanna ipuspe kin hee icu; hecen tona wacinyanpi kin owasin, bawicaḣdayapi śni eśta, he Ateyapi kta, qa nakun hena e wicoowotanna wicakiciyawapi kta.
12Qa tona bakiḣdayapi kin heceepidan śni, nakun Abraham ateunyanpi, hinaḣin bakiḣdaye śni, he ehan wacinye ciqon, tona he oye kin ohna manipi kinhan, hena iś eya bakiḣdayapi kin en ateyapi kte cin heon.
13Maka kin tawaye kte cin, Abraham iye cinca kin om, iwahoyapi qon he woope kin eciyatanhan śni, tuka wacinyanpi on woowotanna kin eciyatanhan.
14Tona woope kin eciyatanhanpi kin hena tawayapi kte cin eepi hecinhan, wacinyanpi kin ecetuśniyapi, qa wahoyapi qon he nakun takudan okihi śni.
15Woope kin he wocanniye kaga; tukten woope wanica hecinhan hen woaḣtani nakun wanica.
16Heon etanhan, he wacinyanpi kin on, wowaonśida eciyatanhan kte cin heon, qa wahoyapi qon cincapi kin owasin en wicakiciyusutapi kta, tona woope eciy atanhan un kin heceedan śni, tuka tona Abraham, unkiye owasin ateunyanpi kin, wacinye ciqon en opapi kin hena koya.
17Wowapi qon iyececa; Ikcewicaśta oyate ota ateniyanpi kta e ecihde ce; Wakantanka wicaṭe cin ake ni wicaye c̣a, taku tona un śni kin hena taku un kin iyecen cajeyata ece kin he wacinyan kin heon etanhan.
18Oyate ota ateyapi kte cin he apepica śni, tuka wacinyan un kin heon ape, taku eyapi qon iyececa; Nicinca iyenaka kta ce.
19Qa waśagya wacinye cin heon iye tancan kin wanna, kan he awakicin śni, wanna waniyetu opawinge ikiyedan, qa Sara tamni kin nakun wanna ecece śni tuka.
20Qa Wakantanka wahoye cin he ceṭunhda kin on kaktihanhan śni; tuka wacinyanpi on wakiśaka un, qa Wakantanka yatan.
21Qa taku iwahoye cin ho ecen econ kta okihi e he nina wicada.
22Heon etanhan he wicoowotanna kiciyawapi.
23Qa he hecen kiciyawapi kin he iye iśnana on wowapi kin en kagapi śni;
24Tuka unkiyepi on, he unkiciyawapi kte cin heon etanhan, tuwe Jesus Messiya Itancan unkiyapi kin wiconṭe etanhan najin kiye ciqon he wacinunyanpi kinhan.
25Iye waunḣtanipi kin on wicaqupi, qa owotanna unyawapi kte cin on ake najinkiyapi qon.
Currently Selected:
Roma 4: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.