Génesis 20
20
Abraham judyeyaꞌ Abimelec
1Abraham sacti, Neguevve jịjcaij, Gerarĉan qui bäꞌyi muꞌ, chidyiꞌĉanyaꞌ Cades judyeyaꞌ Shur. 2Aty muꞌĉan p̂eyaqui p̂en muꞌ jéyacsi muꞌĉan bäꞌyity in, yi:
—Sara vojiꞌ nash yụ.
Mọꞌdyes qui muꞌ Gerarĉantyiꞌ ayoꞌ, Abimelec tịj muꞌ, jiꞌvorveꞌ mọꞌ Sara mạꞌjeꞌ tsanꞌ mọꞌcheꞌ vämi. 3Mọꞌdye tsedyedyeꞌ tamiñi muꞌ Abimelec, taminꞌdyeꞌĉan muꞌ Jenꞌ jajiti:
—Säñi raꞌ mi ĉaĉaij na ọij p̂en jiꞌvorves mi vämtyiꞌyas nash mọꞌ.
4Abimelec ạniꞌ chuc jambiꞌ jäqueꞌ mọꞌ Sara. Chat qui yi muꞌ jéte Jenꞌ:
—Yụ́tyiꞌ Ayoꞌ, meꞌ tsanꞌ jam juchaij yụ, ¿mi bu raꞌ ijatim räjtumdye muntyiꞌ yụ? 5Abraham nash jin yụ: "Ọij nash vojiꞌ yụ", judyeyaꞌ chiyiꞌdye mọꞌ. Rụijsisyaꞌ dyijyedyeꞌ jiꞌvorveꞌ yụ, jam nash juchaij yụ —yi jéte Jenꞌ.
6Taminꞌdyeꞌĉan Jenꞌ vorjajiti:
—A nash chị́yepye dyijyedyeꞌ mi, rụijsisyaꞌ dyijyedyeꞌ jiꞌvorveꞌ mi, mọꞌdyes yụ ñutsjeye paj qui jam juchaij mi. 7Q̂uinꞌdye raꞌ jịꞌcaꞌñeyebajte mi mọꞌ p̂en. Vämtyiꞌ raꞌ mọꞌ cọdaqui yụ́cheꞌ mídyes paj qui jam säñi mi, ĉaĉaij nash muꞌ soꞌmetety p̂eyacdyeꞌ yụ. Jam jịꞌcaꞌñeyebajte jụijyam, säñi raꞌ mi räjtumdye muntyiꞌ mi —yi jajiti Jenꞌ.
8Nojno mạyedyeꞌ muꞌ Abimelec sacyi, fayaqui úñity jéyaqui junꞌ chuc tamiñi muꞌ. Muꞌin na anic fer noiꞌyi in. 9Chat qui muꞌ Abimelec jiꞌvorvete muꞌ Abraham, jéte:
—¿Junꞌ dash shejvintutim? ¿Yụ adac meꞌtyeye paj qui ọij därsiꞌ ñịbedyes tuyitim räjtumdye muntyiꞌ yụ? Jam nash jämꞌ joꞌmes jämꞌtaĉaꞌ. 10¿Junꞌ dash joꞌmesyaꞌ meꞌtiĉaꞌ yụ miꞌin? —jajiti.
Vorjete Abraham:
11—Meꞌ dyijyi yụ jiquej, jeñety úĉan bäꞌyity in jam irijyity Jenꞌcheꞌ in, meꞌ ĉọcsi yụ, jeñej raꞌ ijatiĉaꞌ miꞌin p̂endyes yụ, meꞌ ĉúti yụ. 12Chimeꞌdye Sara anicsis nash vojiꞌ yụ, ĉaĉaij nash mọꞌ jenꞌsiꞌ ạvaꞌ yụ, yocsiꞌ qui namꞌ tseꞌ mọꞌ, mọꞌdyes yụ qui vämi mọꞌcheꞌ. 13Mọꞌdyes yoquiꞌdyemꞌ muꞌ Jenꞌ jin jiquej yụ u paj qui yạjquipte yụ jenꞌsiꞌ acaꞌ muꞌ, yụ jétaque Sara: "Meꞌ raꞌ ñịbeꞌjitim, junaꞌ chuc jịjcajaꞌ jụijyaꞌ tsun, mi raꞌ yiꞌ: "uts Abraham vojity yụ" —yi Abraham jéte Abimelec.
14Chat qui muꞌ Abimelec jajiꞌcaꞌñiyibun p̂en muꞌ Sara. Judyeyaꞌ damꞌdye cäch ñịbeꞌjajiti mọꞌcheꞌ jedyeꞌ in, oveca in judyeyaꞌ vaca in judyeyaꞌ chimeꞌ úñity in judyeyaꞌ úñis in, meꞌ meꞌ ñịbeꞌjajiti. 15Jéte chimeꞌ:
—Ọij nash jac yụ cavibutiꞌ, tupuj muꞌĉan bäꞌyi mi junaꞌ ĉụiꞌ mạꞌjeꞌ bäꞌyi jụijyam.
16Chat qui jeꞌ Sara:
—A nash yaꞌijtyiꞌ querec̣ha soꞌmebiye vojity mi, yirity mir querec̣ha anictyity plata, meꞌquiꞌ shupqui muꞌ querec̣ha. Muꞌ nash jịꞌĉoiꞌ itŝiꞌ juchaj mi paj qui jam ñäñin mi muntyiꞌ in.
17-18Ayoꞌ säräꞌ buꞌyiꞌ jayuꞌbuti Abimelecsiꞌ p̂en muꞌ, räjtumdye chätidyeꞌ muꞌ judyeyaꞌ úñis muꞌ, yoquiꞌdyemꞌ jiꞌvorveꞌ Sara jiquej u. Mọꞌdyes muꞌ Abraham cọdaqui Jenꞌcheꞌ Abimelecdyes. Jenꞌ qui jiꞌchäĉajte Abimelec, chimeꞌdye muꞌ jịꞌavayebibajte p̂en muꞌ judyeyaꞌ úñis muꞌ, meꞌquiꞌdye qui säräꞌ buꞌyiꞌ in chat qui ạvaꞌyi in.
Currently Selected:
Génesis 20: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'