Maariko 1
1
Yohana Omubhatisaachi ˆaghaköra anchëra e Yesu
(Mataayo 3:1–12; Ruuka 3:1–18; Yohana 1:19–28)
1Ino niyo simoka e Ngʼana Anchömu e Yesu Kirisito,#1:1 Kirisito. Niwe uno Eryobha ryahwire kobhatoori abhaato na kobhakangata mo‑bhutëmi bhooche. Mööhi angʼana Kirisito mo‑Mangʼana Amaköngʼu. Omoona o Ryobha. 2꞉Niisëëmiri, kinya bhuno ꞉yaandëkuru ighoro yaache mo‑ghitabhu ke murööti Isaaya kubha,
“Mööhi, ˆnekamotoma omutamishi waane
aghukangate ambërë yaacho,
kubha aghukörërë anchëra.”#1:2 Mööhi Maraaki 3:1.
3“Omutamishi waane uyo, naakubha araraghani mwibhara
kwo riiraka ikoro arabhugha,
‘Mukörë anchëra e Mutëmi,
mughöröröki chanchëra chino akohetera!’#1:3 Mööhi Isaaya 40:3.”
4Omutamishi uyo naare arabherekeru Yohana Omubhatisaachi. Naare mwibhara araraghaneri abhaato arabhugha, “Motuukuune amasari ghaanyu, mubhatiisu, kubha Eryobha rebhaabhërë!” 5Abhaato bhaaru koru mo‑moghya o Yerusareemu na mo‑mukööwa woose o Yuteya mbaare bharamutambana Yohana. Abhaato bhayo bhaghatuukuunera amasari ghaabho, akabhabhatiisa mo‑rooche ro Yorotaani.
6Yohana ꞉naabheekiri amaghööti ghano ghaköruru kwo bhwishe bho ngamiya, na naare ariinata oruköbha mo‑keribhichi keeche.#1:6 Changibho chino Yohana are arabheeka, ncheere chetuubhiine na chino omurööti Eriya ꞉abheekiri. Mööhi 2 Abhatëmi 1:8. Ekiinyakurë keeche nkeere changighe no obhooke bho mwiteregho.
7Yohana naare araraghani arabhugha, “Omooto nakuucha anyuma yaane, uno anyi na changuru ghonkera eni. Eni nteekurëngʼaanera koru kwihiinya na ghusaasura chambasani che bhekwera bheeche.#1:7 Ghusaasura chambasani che bhekwera bheeche. Aribha omughëni asöhiri mo‑ka, ngeere emeremo ghe musësë komusaasura ebhekwera na komwishaabhi amaghoro ghaache. 8Eni nekobhabhatiisa kwo manche, amare iwe nakobhabhatiisa gho Körö Ahörëëru.”
Yesu ˆakabhatiisu na ghusakibhu
(Mataayo 3:13—4:11; Ruuka 3:21–22, 4:1–13)
9Eriibhagha riyo, Yesu akaacha koru mo‑moghya o Nasareeti, mo‑mukööwa o Ghariraaya, akabhatiisu na Yohana mo‑rooche ro Yorotaani. 10Hano Yesu are aratiira koru mo‑manche, hayo hayo akarighi erishaaro reriighoka, na Akörö Ahörëëru eriika kinya egheghuuti na ghwikara ighoro yaache. 11Niho eriiraka koru Mwishaaro rekabhugha, “Iye n‑Omoona waane omosiighani, uno neghuchömëru na niiye.”
12Hayo hayo Akörö Ahörëëru ekamukangata Yesu ghuye mwibhara. 13Akabha iyo chaasiko miröngö ene, arasakibhu ne Erishambu. Naare haghirohamu na chatyenyi chi ibhara, na bhamarayika koru Mwishaaro mbaare bharamuhökëri.
Yesu ˆaghasëëma kobhabherekera abhaanabheegha bhaache
(Mataayo 4:12–22; Ruuka 4:14–15, 5:1–11)
14Hano chehetiri chaasiko chaaru, Yohana akabhöhu mwighërëcha.#1:14 Yohana akabhöhu mwighërëcha. ꞉Naaköriiru hangʼu, gho kubha ꞉naamoshaangʼiri omukangati Herote Antibha kwo masari ghaache. Mööhi Maariko 6:14–29. Eriibhagha are mwighërëcha, Yesu aghaye mo‑mukööwa o Ghariraaya, ino araraghani Angʼana Anchömu e Ryobha. 15Eriibhagha are araraghani, naare arabhugha, “Eriibhagha rino rirööturu, ˆrekahika. Wiiki, obhutëmi bho Ryobha ˆbhoghatingʼi. Mbe, motuukuunere amasari ghaanyu, na koyekumi Angʼana Anchömu iyo.”
16Orosiko rumu, hano Yesu are araheta rubhareka ro nyancha e Ghariraaya, akarighi abhaato bhabhere, Simiyooni haghirohamu na Andereya ömööbhö waache. Bhayo bhabhere mbaare bhararëkëra charwërö mo‑nyancha, gho kubha m‑bhaweesani ꞉bhaare. 17Yesu akabhabhoorera akabhugha, “Muuche, muntambane. Eni nekobhaköra mubhe abhaweesani bha bhaato.”#1:17 Abhaweesani bha bhaato. Egheteemoro keeche n‑kubha, kobharuusi abhaato koru mo‑masari ghaabho na kobhakoma haghirohamu bhabhe mo‑rikinda re Ryobha. 18Hayo hayo, bhaghatigha charwërö cheebho, bhakamutambana Yesu.
19Hano Yesu are haghirohamu na abhaanabheegha bhaache bhaare bhabhere, aghiishuka ambërë hasuuhu, akarighi Yakobho no omonyi waache Yohana, bhërëëti bha Sebhetaayo, bhaanyi mo‑bhwato bhoobho bharaköra charwërö cheebho. 20Eriibhagha riyo riyo, akabhabhoorera kubha bhamutambane, bhabhe abhaanabheegha bhaache. Bhakamotigha ishe haghirohamu na abhahöki bhaache bha meremo mo‑bhwato, bhakamutambana Yesu.
Yesu ˆakëërëki changuru cheeche
(Ruuka 4:31–37)
21Niho Yesu na abhaanabheegha bhaache bhane bhaaghaye mo‑moghya o Kabherenawumu. Hano orosiko ro Riikane rohikiri, bhaghasöha mo‑risinaghooghi, na Yesu aghasëëma kweghi. 22Abhaato bhoose bhano ꞉bhaare bharamutëghëërëra, bhakaroghoorera ameeghi ghaache. ꞉Ngaaroghooriri gho kubha ameeghi ghaache ghataare kinya gha bheeghi bhaabho bha meghiro,#1:22 Abheeghi bha meghiro. Mbaare abhasömi bhano bhasömiri amëërëkërëri gha Musa, na ghoghateemora na kobheeghi abhaato amëërëkërëri na chaasughara cheebho. Mööhi Abheeghi bha meghiro mo‑Mangʼana Amaköngʼu. amare ꞉neeghiri kinya omooto uno anyi no obhotoro.
23Mo‑risinaghooghi reebho, naare‑mu omooto uno are no omusambu. Aghatiiri eriiraka, 24arabhugha, “Iye Yesu o Nasareeti, neke okwënda ghokwito! Kana, wichiri ghotosireekereri? Nekweche niiye we, iye n‑Omutööbhiyu o Ryobha onyi.”
25Yesu akawohiinya omusambu uyo akabhugha, “Okiri omonu waacho! Omoru omooto uno!” 26Omusambu uyo okamosingisi omooto uyo gho changuru chwee, okamara okarera kwo riiraka ikoro okamoru. 27Abhaato bhoose bhakahagha chwee, bhakabhoorani bharabhugha, “N‑ngʼana ke ino? Ameeghi amahë ghano, ngaanyi no obhotoro! Wiiki, mööhi, naanyi na changuru che kuhatëka koru emisambu, ghyose ghemosooka.” 28Kwo riibhagha ighuhe amangʼana ghaache ghaghasancha bhwango, abhaato bhaaru koru mo‑mukööwa o Ghariraaya bhaakabha bhooghwire amangʼana ghayo.
Yesu ˆakabhahöri abhaato bhaaru
(Mataayo 8:14–17; Ruuka 4:38–41)
29Hano bharuure mo‑risinaghooghi, bhaaghaye haghirohamu na Yakobho na Yohana, awaache Simiyooni na Andereya. 30Hano bhahikiri, Yesu akabhooreru kubha nyinabhiyaara Simiyooni naanyi mo‑nyumba amisiri, naghööturu ne ekihëënö kihaari chwee. 31Niho Yesu akamwishukerera omukari uyo, akamughööta okubhökö, akamobhooki. Hayo hayo nyinabhiyaara Simiyooni akahöra ekihëënö, aghasëëma kobhahökëri.
32Orosiko ruyo omughörööbha, hano Eriikane resiriri,#1:32 Hano Eriikane resiriri. Orosiko ruyo n‑chumamoosi omughörööbha roore, gho kubha Abhayahuuti mbaare bharabhara orosiko korwera omughörööbha mbagha atabhoori yaache omughörööbha. Abheeghi bha meghiro ghe Musa ꞉mbeeghiri kubha abhaato bhataakwëndëru kuhöru mo‑rosiko ro Riikane. Kurëngʼaana na ghayo, abhaato ꞉mbaaghanyiri mbagha omughörööbha niho bhakamurëëtëra Yesu abhabhabharu bhaabho. abhaato bha mo‑moghya o Kabherenawumu mbaare bharamurëëtëra Yesu abhabhabharu bhaaru, na bhano ꞉bhaare ne emisambu. 33Niho abhaato bhaaru koru mo‑moghya uyo bhaghatëmëërana mo‑riigho re nyumba e Simiyooni na Andereya. 34Yesu akabhahöri abhaato bhano ꞉bhaare na amabhabharu haghare haghare. Wiiki, akaruusi emisambu myaru, amare taghiishereriiri emisambu ghosiikëra, gho kubha ꞉ngeemumënyiri kubha iwe n‑Omoona o Ryobha.
Yesu ˆakaraghani Angʼana Anchömu Ghariraaya
(Ruuka 4:42–44)
35Yesu akamwecha moomake, aghaye ahaghiro hano hataare na abhaato, aghasëëma ghusabha. 36Simiyooni na abhaghëndi bhaache bhaaghaye komutabhara. 37Hano bhamobhwine, bhakamobhoorera bhakabhugha, “Abhaato bhaaru mbiichiri, n‑iye bhaghutabhara!”
38Yesu akabhagharokeri akabhugha, “Ntughëndë mo‑meghya eghende ghe haghuhe na hano, netore kuraghani Angʼana Anchömu iyo, gho kubha niichiri ghuköra emeremo ghiyo.” 39Niho aghaye mo‑mukööwa woose o Ghariraaya na kuraghani mo‑masinaghooghi ghaabho, na kobharuusi abhaato emisambu.
Yesu ˆakamuhöri omooto uno anyi na ambiti
(Mataayo 8:1–4; Ruuka 5:12–16)
40Orosiko rumu, omooto umu uno anyi na ambiti akamusëëta Yesu. Akabhuna ebheru, akamusasaama akabhugha, “Örëënda, noghotora koomusa!” 41Niho Yesu akamoghwera bheghongi, aghaghöröröki okubhökö kooche na komoturi omubhabharu uyo, akabhugha, “Nekwënda, omusu!” 42Hayo hayo obhubhabharu bho mbiti bhokamoru, akamusu. 43Yesu akamoruusi hayo bhwango, 44akamokumereri arabhugha, “Mööhi, otabhoorera omooto wowoose angʼana ino! Amare, nooghi wiyërëkani mo‑muchaama,#1:44 Omuchaama. Kurëngʼaana ne emeghiro ghe Musa, omuchaama niwe are arahëënëhi kubha omooto namusuru ambiti. Mööhi angʼana Abhachaama mo‑Mangʼana Amaköngʼu, na Abharaawi 14:1–32; Kohiita kwo Meghiro 24:8. na koruusi amaruusi kinya emeghiro ghe Musa ghe kwërëkërëri, abhaato kubha nuhöriri.” 45Amare, omooto uyo aghatanura hayo, aghasëëma kuraghani haghiro hoose amangʼana gha kuhöru kooche. Gho ghayo, Yesu taatoriri wiiki ghusöha haheero mo‑meghya ghyoghyose ghiire.#1:45 Yesu taatoriri wiiki ghusöha haheero mo‑meghya ghyoghyose ghiire. Abhaato bhaaru mbangamwikomaniire kubha abhahöri. Akabha ariikara anche e moghya hano abhaato bhataanyi, koru hangʼu abhaato mbaare bharamutambana koru chambaara choose.
Currently Selected:
Maariko 1: ntk
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved