San Juan 19
19
1Ta saa xa̱ꞌnda chiñu ra Pilato ya ná kani na Jesús xiꞌin kuarta ya núꞌni kàà nuu. 2Ñaa si̱kuaꞌa nda lapa iin corona xiꞌin iñu, ta ki̱ꞌin nda ya chi̱nuu nda xiní Jesús. Saa si̱kundixi nda iin toto ndiꞌi tuun ra, ya kúsiki ndaa nda ra. 3Saa káꞌan nda xiꞌin ra, káchi nda saa:
―Xáa toꞌo ni nde yóꞌo̱ tata, rey nuu na judío ―káchi nda kúsiki ndaa ñaꞌa nda.
Ta ndinuni loꞌo ka káni ñaꞌa nda, xákin nda xaꞌnda nuu ra.
4Saa ke̱ta tuku ra Pilato ndi̱kaꞌan ra xiꞌin nda judío, káchi ra saa:
―Koto ndo, yóꞌó ndáka tuku i ra vaxi ra xiꞌin i keꞌe yóꞌó, ya ná kundaa ini ndo nda iin kuachi ra köo ndi̱taꞌan i ―káchi ra.
5Saa ke̱ta Jesús, ínuu corona iñu xiní ra, ta ndíxi ra toto ndíꞌi tuun.
Saa ndi̱kaꞌan ra Pilato xiꞌin nda, káchi ra saa:
―Koto ndo, ra yóꞌó ku ra ―káchi ra Pilato xiꞌin nda judío.
6Tá xi̱ni nda naꞌnu nuu sutu xiꞌin na policía ikán, ta saa ndi̱ndaꞌi koꞌo na, káchi na saa:
―¡Chinuu ra nuu cruzin, chinuu ra nuu cruzin! ―káchi nda xiꞌin ra Pilato.
Saa ndi̱kaꞌan ra Pilato xiꞌin na, káchi ra saa:
―Ndikiꞌin ndo ra, ta chinuu mií ndo ra nuu cruzin, chi yeꞌe ta köo kuachi ra ndi̱niꞌi i ―káchi ra.
7Saa ndi̱kuiin na judío káchi na saa:
―Ndeꞌe ta kúu mií nde ley nuu káꞌan ya kuvi ra, saa chi káꞌan ra xaꞌa ra ya kúu ra Seꞌe Ndioxi káchi ra ―káchi na xiꞌin ra Pilato.
8Tá xi̱ni soꞌo ra Pilato ya ndi̱kaꞌan na xaꞌa Jesús, ta saa ndi̱ndiꞌvi ni ka ra. 9Saa ndi̱ko koo tuku ra ini veꞌe chiñu, ta ndi̱kaꞌan ra xiꞌin Jesús, káchi ra saa:
―¿Míí chí ki̱xi un? ―káchi ra xiꞌin Jesús.
Ta nda iin ya köo ndi̱kuiin Jesús.
10Saa ndi̱kaꞌan ra Pilato xiꞌin ra, káchi ra saa:
―¿Ndachu köo xíin un ndi̱kuiin un yuꞌu i? ¿Án köo xíni un, yeꞌe ta kúu mií i ichí chinuu i yóꞌo̱ nuu cruzin án ya saña i yóꞌo̱ kuꞌun un? ―káchi ra xiꞌin Jesús.
11Saa ndi̱kuiin Jesús káꞌan ra:
―Tá tu süvi Ndioxi ku ra ndi̱taxi ichí ndaꞌa un ya kaꞌnda chiñu un xaꞌa i, ta nda iin ichí köo kúu mií un, ndi̱kuu. Sundi taa, ra ndi̱taxi yeꞌe ndaꞌa un ta chee ni ka kuachi ndíso ra ikán nuu yóꞌo̱ ―káchi Jesús xiꞌin ra Pilato.
12Saa ta ndikun mií hora ikán kua xa̱á xíka ini ra ndá kuꞌva koo saña ra Jesús. Sundi na judío ta ndáꞌi koꞌo na nuu ra káꞌan na xiꞌin ra, káchi na saa:
―Tá ná saña un ra, ta süvi ka migo ra rey César kúu un, chi ndá ka na káꞌan kúu na rey ta na kuakiꞌvi contra ra rey César ku na ―káchi na xiꞌin ra Pilato.
13Saa tá xi̱ni soꞌo ra Pilato tuꞌun ikán ta xa̱ꞌnda ra chiñu ta̱va na Jesús. Saa ndi̱kunduꞌu ra nuu tai toꞌo itun íin keꞌe nuu si̱kuaꞌa na xiꞌin nina yu̱ú. Ta ñaꞌñu ikán náni ya Gabatá tuꞌun mií na judío. 14Ta siin kivi kumani saa tindaa viko pascua, ta kúu ya iin kuꞌva kàà uxi uvi nduvi. Saa ndi̱kaꞌan ra Pilato xiꞌin na judío, káchi ra saa:
―¡Yóꞌó íin rey ndo! ―káchi ra xiꞌin na.
15Saa ndee ni ndikuiin na, káchi na saa:
―¡Ná kuvi ra! ¡Ná kuvi ra! ¡Chinuu ndo ra nuu cruzin! ―káchi na.
Saa ndi̱kaꞌan ra Pilato xiꞌin na, káchi ra saa:
―¿Án kúni ndo ya chinuu i rey ndo nuu cruzin? ―káchi ra xiꞌin na.
Saa ndi̱kuiin nda naꞌnu nuu sutu, káchi nda saa:
―¡Köo ka inka rey kúu mií nde, iindaa ra rey César ku rey nuu nde! ―káchi nda.
16Saa ndi̱taxi ra Pilato Jesús ndaꞌa nda lapa ikán ya chinuu ñaꞌa nda nuu cruzin, ta saa ndi̱kiꞌin nda ra kuaꞌan xiꞌin nda.
Ya ku̱u nuu chi̱nuu na Jesús nuu cruzin
(Mt. 27:32-50; Mr. 15:21-37; Lc. 23:26-49)
17Ta saa ke̱ta Jesús ndíso ra cruzin kuaꞌan ra xiꞌin na. Ta ndi̱xaa ra xiꞌin na ñaꞌñu nuu náni Leke Xiní Ndìì, ta tuꞌun hebreo náni ya Gólgota. 18Ta ikán chi̱nuu nda Jesús nuu cruzin, ta saa ti̱so tu nda uvi nda kuiꞌna nuu cruzin, iin nu iin nda ndóso nda nuu, ta maꞌñu nda ndíchi cruzin nuu ínuu Jesús. 19Saa xa̱ꞌnda chiñu ra Pilato ya chinuu na iin vitun xiní cruzin nuu ínuu Jesús. Ta xa̱ꞌnda ra chiñu ya ná ta̱a na letra nuu nu kachi ya saa: “Jesús ra ke̱e ñuu Nazaret, ra ku rey na judío ku ra yóꞌó”, káchi ya. 20Ta uni nuu tuꞌun ku ya ndóso nuu vitun ikán, ta iin káꞌan uni saa ya, ta xiꞌna tuꞌun mií na judío kua ta̱a na, saa ta̱a na tuꞌun griego xiꞌin tuꞌun na Roma, ya latín. Ta kuaꞌa ni na judío ka̱ꞌvi tuꞌun ndóso nuu vitun ikán, saa chi yati nuu ñuu Jerusalén kua chi̱nuu na Jesús nuu cruzin. 21Saa ndi̱kaꞌan sutu, nda naꞌnu nuu na judío xiꞌin ra Pilato, káchi nda saa:
―Väꞌa káꞌan tuꞌun ya ta̱a un, chi káꞌan ya: “Ra yóꞌó ku rey na judío”. Vaꞌa ka taa un ya yóꞌó: “Ra yóꞌó káꞌan ra kúu ra rey nuu na judío, káchi ra” ―káchi nda xiꞌin ra Pilato.
22Saa ndi̱kuiin ra Pilato ndi̱kaꞌan ra:
―Tuꞌun ya xa ta̱a i, ta xa ta̱a i ya. Küvi ka sama ya ―káchi ra.
23Sindiꞌi tá chi̱nuu nda lapa ikán Jesús nuu cruzin, saa ti̱in nda toto ra ndi̱taꞌvi nda ya kumi ñaꞌñu, saa ndi̱kiꞌin nda iin ñaꞌñu iin nda. Ta toto maa ra ta köo tiku ya, iin káchi káa ya nda ni̱nù iin saa nda ni̱nu̱. 24Saa ndi̱kaꞌan nda lapa xiꞌin taꞌan nda, káchi nda saa:
―Ndäta yo ya, vaꞌa ka ná chikaa yo suerte sata ya, ta saa kuni yo unku yo ndoo ya ndaꞌa ―káchi nda xiꞌin taꞌan nda.
Saa ku̱u nuu si̱xinu nda ya káꞌan tuꞌun Ndioxi káchi ya saa: “Ndi̱taꞌvi nda toto i, ta chi̱kaa nda suerte sata ya”, káchi tuꞌun Ndioxi. Tá kuꞌva káꞌan tuꞌun ikán saa íyo ya i̱kan nda lapa ikán xiꞌin toto Jesús.
25Ta yati xaꞌa cruzin nuu ínuu Jesús ndíchi siꞌí ra xiꞌin kuꞌvi yá, xiꞌin yá María síꞌi ra Cleofas xiꞌin yá María Magdalena. 26Tá xi̱ni Jesús siꞌí ra ndíchi yá xiꞌin inka ra xi̱taꞌan xiꞌin ra, ra ku̱ꞌvi ni ini ra xi̱ni ñaꞌa ra, saa ndi̱kaꞌan ra xiꞌin siꞌí ra, káchi ra saa:
―Nana, ra yóꞌó nduu seꞌe un vitin ―káchi ra xiꞌin yá.
27Sindiꞌi saa ndi̱kaꞌan ra xiꞌin ra xi̱taꞌan xiꞌin ra, káchi ra saa:
―Yá ñaa nduu siꞌí un vitin ―káchi ra xiꞌin ra.
Nda kivi ikán ndi̱kiꞌin ra yá íyo yá veꞌe ra.
28Jesús ta xa kúndaa ini ra, ya xa xa̱a súvi ndiꞌi ra chiñu ya ta̱xi Ndioxi ndaꞌa ra, saa ndi̱kaꞌan ra inka tuꞌun, ya xa̱a súvi ra tuꞌun Ndioxi, ya ta̱a na xinaꞌa, káchi ra saa:
―Íchi ni i tikuii ―káchi ra.
29Saa íyo iin kisi chútu ndaa vinu iyá ini ya, ta si̱ndaxin na iin kachi xiꞌin vinu ikán, ñaa chi̱nuu na ya nuu iin itun, ta chi̱nuu ndaa na ya yuꞌu ra. 30Tá ndiꞌi xi̱ꞌi Jesús nduta vinu iyá ikán saa ndi̱kaꞌan ra:
―Vitin ku nuu ndi̱xinu ndiꞌi ya ―káchi ra.
Saa ndi̱kuita ndee xiní ra ta ndi̱taxi ra ya vaꞌa ra ndaꞌa Ndioxi, ñaa ndi̱xiꞌi ra.
Iin ra lapa tu̱vi ra itun íyo kàà nuu ñaꞌñu xiín Jesús
31Ta mi kivi ya kána viko pascua kua ikán, ta xáa súvi tu na kivi ndíkundee na kivi ií ni nuu na. Yakan köo ndi̱xiin na judío ndoo ikin kuñu nda kundoso ya nuu cruzin, xaꞌa ya kúu ya kivi i̱í ni. Ta xaꞌa ya ikán kua ndi̱xaꞌan na ndu̱ku na ya mani nuu ra Pilato, ya ná kaꞌnda ra chiñu ya kaꞌnu na siꞌin nda. Ta saa kuvi kama nda, ta ndundaa ikin kuñu nda nuu cruzin. 32Saa ke̱e nda lapa ndi̱xaꞌan nda ndi̱xaꞌnu nda siꞌin nda ikán, ta xiꞌna iin ra ínuu xiín Jesús ndi̱xaꞌnu nda siꞌin, saa ndi̱xaꞌnu nda siꞌin inka ra. 33Ñaa ku̱yati nda nuu ínuu Jesús, ta saa xi̱ni nda ra ya xa ndi̱xiꞌi ra, xaꞌa ya ikán kua köo ndi̱xaꞌnu nda siꞌin ra.
34Sundi iin ra lapa ikán tu̱vi ra itun íyo kàà nuu ñaꞌñu xiín Jesús, tá tu̱vi soꞌva ra ya ta ndikun ke̱e nií xiꞌin tikuii. 35Ta ra ndítuꞌun ya yóꞌó ku iin ra xi̱ni xiꞌin nuu ya, ta ndíkuiin ra xaꞌa ya káꞌan ra ya kúu ya ndaa ni ya ná kandixa tu ndóꞌo̱ va ya káꞌan ra. 36Köo ndi̱xaꞌnu na siꞌin Jesús, ta xaꞌa ya yóꞌó kua xa̱a súvi na ya ta̱a na xaꞌa ra xinaꞌa, chi ya ta̱a na xaꞌa ra káchi ya saa: “Nda iin leke ra täꞌnu”, káchi ya. 37Ta inka tuku ñaꞌñu nuu tuꞌun Ndioxi káchi ya saa: “Koto na nuu taa, ra ka̱an na kandika xiꞌin itun íyo kàà nuu”, káchi ya.
Nuu sínduxin na Jesús
(Mt. 27:57-61; Mr. 15:42-47; Lc. 23:50-56)
38Ta sindiꞌi tá ku̱u ndiꞌi ya yóꞌó, saa ndi̱xaꞌan ra José ra ke̱e ñuu Arimatea, nuu ra Pilato ndu̱ku ra ichí nuu ra, ya taxi ra ikin kuñu Jesús ndaꞌa ra ya sinduxin ñaꞌa ra. Ta saa ta̱xi ra Pilato ichí ndaꞌa ra ya kuꞌun ikin kuñu Jesús xiꞌin ra si̱nduxin ra. Ta ra ikán xi̱ndikun sěꞌe ñaꞌa ra, xaꞌa ya íꞌvi ra nuu na chiñu nuu na judío. 39Ta ndi̱xaa tu inka ra náni Nicodemo va, xa yachi ndi̱xaꞌan ra nuu Jesús, ñuu ndi̱xaꞌan ra xi̱to ñaꞌa ra. Ta vitin ndi̱xaa ra níꞌi ra oko uxi kilo ya tami xáꞌan ndi̱xaa xiꞌin ra, ta ya ikán náni ya mirra xiꞌin aloé. 40Uvi saa nda ikán, ra Nicodemo xiꞌin ra José, ki̱ꞌin nda ikin kuñu Jesús su̱vi nda xiꞌin toto ya náni lino, toto vaꞌa ni ku ya ikán, ta si̱kuchi ndiꞌi nda ya xiꞌin ya tami xaꞌan, saa chi saa ini na judío ñuu na, saa íkan na xiꞌin na ndíi tá xa kuꞌun na nduxin na. 41Ta ñaꞌñu nuu xi̱nuu ikin kuñu Jesús nuu cruzin, íyo ni itun kuiꞌi ta ikán íyo iin kava ya xa̱á, nuu täꞌan nduxin nda iin na. 42Ikán si̱nduxin na Jesús, saa chi ndee ni kúu xáa súvi na kivi i̱í viko pascua, ya ndíkundee na judío, ta xaꞌa ya yati íyo kava ikán yakan ndi̱xaꞌan nda si̱nduxin nda Jesús.
Currently Selected:
San Juan 19: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.