Lukka 12
12
Rekusiinda gimmiinnoodeaba geaw
(Mat 10:26-27)
1Damandida bwadeewa geat emeeda nyiit sagalamnyoojiga ea goolleabi geadiin hean gwayeeshsha niny ginealangaaschi, “Afura geat aba hamirayda fuga Farisaayajeega was gimmiitunodeaba geadiin. 2Gilinyoo eedukutta gajeanung' ghwadaajiit, ghana dea funyaat jea ea mwajeanal. 3Eara ng'asheega obalooli aba jeeda misaneeda, gajeayiiy aba heedeesh, nea gea omeang'shi aba ghoorajeega gajearukkwiida aba iheenga ghoorajeega.”
Siida miisa gheawalmeeda
(Mat 10:28-31)
4“Fuga eaduupcheewi, geayeennyi adoawwalli fiisu ammu gwanuus saseedean, ama ng'atta ea manda gil nuut ammu gwasiniin. 5Gaydamiin gheang'deang'wa aba dea jea oawwala, diitta ama nuusiin, ghoammu gwajaksa jeeda duwayda mamissean; asaha geayeennyi oawala niny! 6Neada udabwaraadaji muut meesheahhideawana heelaji iyeenya? Ak ea manda dea jea gwaroosa Aseetta eara akkalealla. 7Eara buudeesu bea iheengeagwean siyiida sean. Asi adoawwalli ng'eang'i, ghoang'waaneewi agooga udabwaradajeega saang'a.”
Masaweega ea gissiheawatta Gristo
(Mat 10:32-33; 12:32; 10:19-20)
8“Ak geayeeshshiineegwa gilinyoo ea siida gil nyoo ghamwasan aba madeeda buuneeda, eara niny gayghamwas Balleanda Siida aba madeeda malaykajeega Aseetta; 9nea siida heawanaan aba madeeda buuneeda gajeaheawa niny aba madeeda malaykajeega Aseetta. 10Siida wassean rugu ng'asheega munyas appadayda Balleanda Siida gajeesamsa; nea siida ang'eawi Gurorooda Ghaydiit ea majeesamsa. 11Ama deeppa eayadeagwa ghooriida sinnealshachcheewa ea fuga ahaaghwa ng'eanyiida ea madeeda gea mideawa gheambalmeeda, ea adoohirbabannyi aba gichchea ashaayda ea ng'asheega jea arukutta; 12aba gideaba gayghoanaleagwa Gurorooda Ghaydiit gichchea arukutta aba damandideani.”
Gissigala meanang'oochcheanda dasha
13Ak gwayeeshsha Siyagi aba jeedeaba eemeetta, “Ginealshoochcheanda, rukusiina oorjeeda iyya gagwalnean haleanjeeda jea dahearan.” 14Gwayeeshsha niny, “Siida, ghwayiinan ng'eaha doaw siichchea goheeldoscheegwa ghana siida jea gwalakkuneegwa haleanjeeda?” 15Ak gwayeeshsha saawa, “Afra geat aba geawunda gheang'da; aba gideaba eaweega siida manda jeeda haleanjeeda saang'a mideawa.” 16Gwarukuteawa gwarukusa saawa galeega nea gwayeeshsha, “Ghayi madamnyeamba siisi was meanang'oochcheanda ghwaheas muuchchi; 17hean gootteemshi nea gwayi, ‘Gaydasin naaha aba gideaba muttandeawa heechchaadayiin boogeasu?’ 18Iiduw gwayi, ‘Gaydasindunu: gaydanyarjeaweada gijigoonngeasu ak geasinnyi suuk geahees; ak gaydayiin boogeasu ea haleanjeedeanyu sean.’ 19Ak gay dayeeshsha geaw, ‘Ea jeedeanyu, ginndeawi haleanjeesaang'a miyaas idiing'deaysi geaw aba gweannyeekka saang'a, fuufa, agiischeena, lesheena, ak gihoosani.’ 20Ak gwayeeshsha Aseetta niny, ‘Rageananeeda! Aweani geegasa eaweegaang'u; abeeda haleanjeeda idiiwusi geaw gay gaba ng'eaha?’” 21Asi nii giduurji siida adiiwwiisa geaw gheaseeda, “Nea meabarursiina gea Aseetta.”
Adeagana geaw Aseetta
(Mat 6:25-34)
22Hean gwayeeshsha ginealangaaschi, “Asi geayeeshshineegwa, adoodeawiissi eaweegeagwa gajayaaga naah, ea gichchea okkwealana sasanuukkeagwa. 23Aba gideaba eaweega ghwalaabwa hoowa hamiitta ak eara saseeda ghwalaabwa hoowa hang'weakka. 24Ng'ulla udaghuuh: mahissiida nea malachcha, ea mandeawana gijigoonga, ghana gudihoojiga ak ghoarear Aseetta saawa. Ghoang'waneawi agooga muuchchi dariidakka! 25Ng'eaha aba agooga ammu goodeawiit geaw ak ghoahat geawunda aweagaaschi earea geattinagi? 26Asi imoammuusi eara ng'asheanda mwanang'; ghwasaan anda gonneayi geat aba ng'asheega suurja. 27Ang'ulla deakghweeda gidabuwaanda; ea magadiydooschi nea mamanmanna; ak geayeeshshineegwa, eara Sulemaani aba jeeda baruureagaaschi sean miigookkwealsheatta deakghweeni. 28Asi iyakkwealsheesiindunu Aseetta deakghweeda madameega mida askweareeni ama numuji ea sihisa jeeda duwayda, heappi maygwasinneegwa muuchchi agooga, ea fuga manang'i masawi! 29Asi adootteawiichchi iheengeagwa aba gassooda gichchea ayaaga ghana gichchea oaleaha. 30Aba gideaba emoojiga muunda ng'eanyiida gagaaseadayyi haleanjeeni; ak ghwanal Ghweandeang'wa gideaba googasayi. 31Anyoo ghanyi agassa sugoochcheandumeeda Aseetta ak suuh abeeda gajeehheaneegwa.
Meanang'oochcheanduumeeda humng'eeda
(Mat 6:19-21)
32“Adoabealli agoogeeda ng'ay, aba gideaba gagasa Ghweandeang'wa gideaba gahaguuw gagoneegwa sugoochcheandumeeda. 33Ashaayda haleanjeeda ondeawi ak ghoattaydi haleanjeeda sisappa geadi bea ghadooweeda; asissina geat shageeniga mawoosiitta, gheaseeda mayghoashoay aba humng'eeda heeda may gwaneekkiissa mareanghweanda, heeda mayghwaak eara muguyga. 34Aba gideaba heeda mida gheaseadaang'u heechchea goobiida guroroadaang'u.
Soomjooga ang'wearu
35“Arada mananuunatkeagwa nea ghoanung' ghwayeat gheaboonyangeagwa, 36awuurjeewana fuga furda siida haw jea gabiikna nyeangiida, aba gideaba ibiigu ak gagulgul gidaghuut geebay ejeassa. 37Ghang'wana soomjookka hiitta ghweanda nyaawa nea ghoang'wearuun; aba huumwa geayeeshshineegwa, gaygwaradiischi ak gagoneegwa hamitta, nea gagadiyeeseegwa. 38Iihidu buguusta eaweeda ghana beashatta, ak ghwahidu nea gwasindunu, abeeda ghang'wana soomjoosu. 39Asi anala ng'asheanji, gideaba siida bea gheeda inyeeda gayghwanal damanda jea ghwahinna mareanghweanda gayghoang'wearu, mayghamwas gideaba gajeenyarja gheannyi. 40Asi agooga awosa hidaat aba gideaba damanda moorarsiini gayghwahidu Balleanda Siida.”
Soomjeanda doabiiwaat ea dea midoabiiwaat
(Mat 24:45-51)
41Gwayeeshsha Betro, “Ng'uttamiida, ng'asheesu igalli geadiin girukuneasa aseasa akghwahidi ghana irukusi eara buuneasean?” 42Hean gwayeeshsha Ng'uttamiida, “Gajea ng'eaha gil was haghweadoochcheanda doabiiwaat biissa ea bwaraawuh, jea ghoahaaghwa gheannyi nea ghoadaw siida haw goombal, ak ghoadaw buuneeda gichcheaghwaak aba damandaanyiin? 43Ghang'wana soomjeanda jea gabiigu siida haw ak ghwahiitta nea gwasindunuun. 44Aba huumwa geayeeshshineegwa gayghwanung' goombal haleanjeedaannyi sean. 45Ama eeshsha geaw soomjeandida aba jeadaannyi, nishing'da siida haw aba hinnooda, ak ghoang'eat bayiiga soomjeandidean was headiga ea gadeemga, ak gweagiischi nea gwaleeshi ak gaboogit, 46gaygabiigu siitta haw bea soomjeandida eaweeda mararsiina ea damanda mwanala. Gayghwaaga ghoorjooda ak ghwayiin hijagi sea fuga miidobiiweadi. 47Nea soomjeanda nal gidabwariiy siida hawiin ak ea mwang'aabwa geaw nea masna gidasubwariiyiin, gajeabwar muuchchi. 48Nea siitta mwanalaan ak gwasin gida miisa bayiigean, gajeabwar gil mwanang'. Gilinyoo eattaw gasaang'a aba headaannyi gajeegasa gasaang'a nea dea siittaw ghoahaghwa gasaang'a muuchchi, aba headaannyi gajeegasa gasaang'a ea ghwanawda.
Yeesu gweadu dardeayda
(Mat 10:34-36)
49“Aniini ghaawunnyi dajaksa beasta jeeda ng'eanyiida; ak gidabal ea ning'atta giiyeetta! 50Ak gwanda giibattiisanda miisa gideaba gajeeppattiisanan ea eaghus anihiit! 51Agooga ghoaghanyi gili awunnyi deadu hoyyoo jeeda ng'eanyiida? Manda, Geayeadu dardeayda; 52ghang'eada ghamneawa aba jeeda gheedassagi gaygwanda fii muut dardaawaat samwagu fuurji iyyeenya nea gafuurji iyyeenya gea assamwagu; 53gayghwadarda ghweanda ea ballanda ea balleanda ea ghwaan, ak ghwadarda gheamatta ea huda ea huda ea ghamwaat, nea ghwadarda ghamasiyeeda ea gatmooda ballanda ea gatmooda balleanda ea ghamasiyeeda.”
Nalooda damanda
(Mat 16:2-3)
54Ak gwayeeshsha emeeda, “Iyoadaayi shamooghooda aba heeda biyeara, deagheatta gooyeennyi ‘Ghwaan roopta;’ ak ea huumwa gil ghwahidu. 55Inyeessa iighuudu jeammeeda leabu wiilooda ng'eanyiida ghayeawa goyeennyi, ‘Gayghwaraanya daknooda;’ ak gwasa. 56Fuga ammiittu geat! Ghoanalli arukuni giduurji ng'eanyiida ea humng'eeda ak ea moanaldaniin arukuni damani bea ghamneawean?”
Dupcheewana weajoochchandaang'u
(Mat 5:25-26)
57“Ghwasaan anda agooga moammusi alaja girgweageedeang'wa nea gobeayi geadi? 58Aba gideaba ideayeewi siida ahaaktaneey madeeda siida laja girgweaguutka, hiji duu andeewana naweedean ghang'wana goduupchi ada ghwaannyi ea ghoahiittaneey madeeda siida laja girgweaguutka, ak ghwayiinnyi siida laja girgweaguutka geattinga shirikkarajeanda ak gwajakseey shirikkarajeanda ghealooniga. 59Aba humwa geayeeshshineey mayritteawana ghealooniga ea eaghus ea niidaydi helajeanda huydean.”
Actualmente seleccionado:
Lukka 12: DTGANT09
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Datooga New Testament © Bible Society of Tanzania, 2009.