Lukka 13
13
Oappuuda ring'eegeagwa imajameewa
1Abeeda damandida gwanda Fiisu rukusa iitta fuga Galilaaya aguuyi Bilatto foojeanda nyaawa sea haleanjeeda sisabwa geadi bea ghadooweeda. 2Ghwasha nea gwayeeshsha, “Agooga ghoaghanyi gili fiisu bea Galilaayaan gaba riing'a muuchchi ea ghang'al fuga Galilaaya suurja, aba gideaba gwasawaneattunu? 3Geayeeshshineegwa, Manda; imoduukkuunani ring'eegeagwa eara agooga gajooshshealda saawa. 4Ghana fukka attamassis bea Siloamu meewa ing'adeesa gheeda geawiin, ghoaghanyi gideaba fiisu niramwas muuchchi ea ghang'al buuneasean abiitta Yerusaleemu? 5Manda; geayeeshshineegwa, imoduukkuunaani eara agooga gajooshshealda gidashealda saawa.”
Gissigala shabogheechcheanda manda haghweega
6Goobaloola galeega nea gwayeeshsha, “Sih ghayi gwandeawa shabogheechcheanda aba jeeda madamnyandaannyi bea msabiibu, iiduw gawa gagasa haghweega ak ea mwanyasa eara akkalealla. 7Gwayeeshsha siida fur madamnyeanda, ‘Nii gweaydeaba samwagu gil nea geahittu dagasa haghweegeaba geedi ak ea mwanyasi eara akkalealla. Laksiina ng'eanyi, aba gideaba gaygweaksa naaha uurda sigeeda?’ 8Ghwasha niny nea gwayeeshsha, ‘Siida mureeda, eanung'waada jeemba gwaanyagi, ghanyi dabarsa nea ghayiinnyi sururuuda. 9Iideeppa gweanyiin gwaji haghweega abeeda ghwahiit; iideeppa ea maji, abeeda gilaksi ng'eanyi.’”
Yeesu ghoahaap gatmooda badeeda eaweeda Sabatto
10Hean eaweechcha nea gonealshi aba jeeda ghoriida sinnealshachcheewa eaweeda sabatto. 11Abeeda gwanda gatmooni sinyuut ng'uttooschi meangeenda nea niiluul gweannyeew damassis, nea nighuumwa ea eamudu ghoammu gwadiiw geaw. 12Daa Yeesu gatmoodida gaguursa ak gwayeeshsha, “Iyya siihaapnyi aba geeyooni ibearjewiin.” 13Ghwayiin geattingaaschi uhuudeaba gatmoodida, deagheatta gwadiiw geaw ak gwaduumsheesha Aseetta. 14Ghwanyareas siida haw ahaaghwa ghooriida sinnealshachcheewa aba gideaba Yeesu ghoahaap siida eaweeda Sabatto, hean gwayeeshsha buuneeda, “Gondeawi eawooji laah jea asnana gadiyeeda, asi apkaani eahhabeagwa askwearjoojusu, ak ea adoapkaannyi eaweeda Sabatto.” 15Hean ghwasha Ng'uttamiida nea gwayeeshsha, “Fuga ammiittugeat! Aba agooga gwanda siida maygwajeassa heaydaannyi ghana digeadaannyi aba seammooda, eaweeda Sabatto ak gawa ghoalleayda? 16Ama ghamneawa gatmooni, was hudeaba Abrahaamu nirada Shattaani gweannyeew damassisiin, mammisiina eettin aba ghealoonigaaschi eaweechcheanji bea Sabattohiini?” 17Rugu ng'asheesu ghabwaspwas sean; gea gwachchi sheang'nyi niny nea gahoosan buuneeda sean aba ng'asheega gheambiideadi sin niny.
Gissigala ghajilleanda haradaali
(Mat 13:31-32; Mark 4:30-32)
18Ghoanyaashta nea gwayeeshsha, “Ghamneawa sugoochcheandumeeda Aseetta gawuurji sea naaha? Ak gaydagalla naaha? 19Gawuurji ghajilleanda geetta suguura haradaali geanu sih ak gwahista aba jeeda madamnyanndaanyi mwanang, ak gwardu ak gwaheedu ea ghoaw geetta, inyeessa gwasin damealga ea gwasissa dariidakka ghoorajeega nyaawa.”
Gissigala hamiira
(Mat 13:33)
20Iiduw gabiikta gichcha gwayeeshsha, “Gaydagala naaha sugoochcheandumeeda Aseetta? 21Gawuurji sea hamiireeda geanu gatmooda ak ghwayiin jeemba sooscheew samwagu bea dearanga, ak ghwanung' ghaghuut geat sean.”
Gidaghuutta mwariis
(Mat 7:13-14, 21-23)
22Hean ghang'eat gawa nea gwasik mujiinajeega ea gharang'weakka, gonealshi nea gagal Yerusaleem. 23Ghoanyaash siida nea gwayeeshsha, “Ng'uttamiida fuga jea ghwalalaan gajeang'ayi?” Hean gwayeeshsha saawa, 24“Amilmiliitta ak goosikchi gidaghuutta mwanang'; aba gideaba geayeeshshineegwa, gaygagasa fuga saang'a gwasik ak ea mayghoammu. 25Gayghwahidu damanda jea ghang'eat siida bea gheeda ak ghwajap gidaghuutta, hean goobissi amiinaada ak googulgulli gidaghuutta, nea gooyeennyi, ‘Ng'uttamiida, jasseasa.’ Ak gayghwasha niny nea gwayeeshsha, ‘Mwaanali heedooleabu.’ 26Ak gajayeeshshina, ‘Aseasa ghayi geembuttoschchi nea geleeshachchi sea ang'iing'i nea ginealshachchi aba mujiineedeanya.’ 27Ak gaygwayeeshsha, ‘Geayeeshshineegwa, mwaanali heedooleabu, ang'amwana heedeanyu, agoogeeni sina ng'asheega munyasiin!’ 28Abeeda gayghwahidu shookka ea giwiirrooda geeshatka, iyoadaayi Abrahaamu ea Isakka ea Yakkobo ea sibanga sean aba jeeda sugoochcheandumeeda Aseetta nea agooga ea sihisaneegwa jarooda. 29Ak gay ghapka Fuga jea gwaleabu heeda ghayeawa ea heeda biyeara, ea wilooda ng'eanyiida ghayeawa ea wilooda ng'eanyiida biyeara, ak gaygweagiischi aba jeeda sugoochcheandumeeda Aseetta. 30Asi ang'ulla fuga huydean gayghoaw fuga madeeda, nea fuga madeeda gayghoaw fuga huydean.”
Bariinyeega Yeesu bea Yerusaleemu
(Mat 23:37-39)
31Aba damandida ghapka headaanyi Farisayajeesu ng'ay ak gwayeeshsha, “Ng'amwana hiji, aba gideaba Heroode gagasa gwanuusnyi.” 32Ng'atta gwayeeshsha saawa, “Aweayeena ak gooyeeshshi fureayootta, ‘Ng'ulla askwareani ea numuji gaydearuutta meangeenda nea ghaahaapchi fuga miyeani, eaweedeaba samwagu gaydaahiit gadiyeedeanyu. 33Eara gwasa gammiisean dang'ng'waay naweedeanyu askwareani ghanea numuji ghanea niseerida; aba gideaba mammiisiina gideaba gajeenuuksa sibaneeda heeda mawosa Yerusaleemu.’ 34Ea Yerusaleemu, Yerusaleemu, gibarayi sibanga nea guftayi aba lagheanga fuga siichcheagu headaang'u! Neagasay niba hada damuughuushta diibigaagu gidamguurriida nghaghooda dayeagaaschi aba jeesinga meang'eagaaschi, ak ghoaheawi!” 35Ang'ulla, ghaheang'wa sinung'usa heeda. Ak geayeeshshineegwa, maygudu abiikta adaahaan ea eaghuus ayeena, “Sibadiischeesa siida wuna gheawunga Ng'uttamiida!”
Actualmente seleccionado:
Lukka 13: DTGANT09
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Datooga New Testament © Bible Society of Tanzania, 2009.